Podoaa 17
17
Tukono i haruni mebunga
17:1-13
1Mepau Ira i Ue ndi Musa, 2”Pauako iramo to Isaraeli kai pinoweeako asa tuko inso a sompo suku, inso a sompo petewawado, sompo-sompo suku, luwuno hopulu ka orua tuko. Ka i'amba buriomo neeno sompo petewawa a ntukono. 3A ntukono i Lewi asalakono kau burio koa neeno i Haruni. A sompo petewawa suku asalakono hinao asa tuko. 4Umarino atuu asalakono kau naao luwuno atuu i larono Kema Tepotowoa i arono Buruano Songka, po'ianga Kuwela tepohaweakomu. 5Mia anu bininiki-Ku, tukono ta mentumba; kanandiomo kuliahakono inso ndi Ongkue pewuruki anu pinaudo to Isaraeli ndi omiu.” 6Mansano mepau i Musa a nto Isaraeli, luwuno petewawado mpoweeakono asa tuko, singge mia inso a sompo petewawado, porokono hopulu ka orua tuko, ka tukono i Haruni kongko i olono luwuno tuko atuu. 7I Musa numaao luwuno tuko atuu i aro-Do i Ue a laro kema po'iangano songka-Do. 8#Ibr. 9:4Tisomono mansano mewinso i Musa a laro kemano songka atuu, tengkitaomo tukono i Haruni inso a inuleno i Lewi mentuntaomo, mensisi, mebunga ka mewuaako wua badami. 9Ka i'amba i Musa wawao luwu tuko atuu meluarako inso i aro-Do i Ue a luwuno bawaa Isaraeli. Domengkitao, ka i'amba singge mia umalao tukono.
10Mepau Ira i Ue ndi Musa, ”Pokuleomo tukono i Haruni i arono buruano songka kai ninaa gagi petondoni a luwuno mia bunto, ka mokotampulao pewurukido mongkona Ongkue, kasi domemate.” 11Iweweuomo i Musa kana parenta-Do i Ue ndi onae; kanatuumo iweweuo. 12Sine to Isaraeli mpotaeakono i Musa, ”Mentee ntu'u kami memate, kami metampula, luwumami kami metampula. 13Maupo isema anu umpeda a Ngkema Mempori-Do i Ue, manasa ta mate. Asalakono ke kami pingko metampula?”
Currently Selected:
Podoaa 17: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
