Nahumi 2
2
1Puu mperumpa aiwa ndi omue;
dagaiomo bente,
tangkoroomo sala,
peboo ntongamo temoroso,
pumpuomo luwuno rosomu!
2Menteeano, Ondae i Ue Ira momuleakono marambano i Yako,
kana marambano Isaraeli;
hangano puu mporontu umari iramo merontuo
ka mpepateo luwuno sampano.
Iwali sumolangio Niniwe
2:3-13
3Kantado puu mpetea motaha,
sorodaduno mpesangka motaha kirimisi;
kareta tesosangkilo kana langano api pehulu
ia oleo pepatindaano,
ka luwuno ngara mpelonso-lonso medanggara.
4Kareta magasi ntu'u a nsala,
mpepolu-polulu a ntanalapa;
tengkita kana langano api,
mompalari kana koliki.
5Luwuno puu mpetea mpinerorohino irambeo,
sine tetidu ira domelako;
mpopari-pari ira mpelulu te'aro a rere watuno kota,
sekono parewa perumpa pinontadeomo.
6Luwuno pewowano korono inungkahiomo,
ka langkanae gagi ntewuka.
7Pinakosiomo: Kota atuu linolohi
ka winawa,
luwuno atano beine mpopau masusano aroado kana u'unino marapatii
saru mpontopa-topa rada.
8Niniwe kana limbo uwoi
ka uwoino melulu meluarako.
”Penaa-naa! Penaa-naa!” peboolido mia,
sine nahina anu mewolili.
9Pomuruomo salaka, pomuruomo wulaa!
Hangano nahi hori pingko arataa pinatinda,
hadio ntu'u sangka masuli olino!
10Londa, telondahi ka pompokotampulaa!
Aroa gagi telusa ka oluntuu telelu!
Tonga mokalu luwu,
ka rupano luwuno mia momite ntu'u.
11Isuamo pewuniado singa
ka kunepodo singa mongura,
po'iangado singa mpekule-kule,
po'iangano anano singa, ba isua nahina rumerenggotio?
12Mararu singa atuu momperangkami ka isompo kaangado anano,
montolonggeo pinerangkamino tiado wainono,
ka aano ibuketiakono kaanga
ka pinerangkamino a mpewuniano.
13Kitao, Aku gagi iwalimu,
kanandiomo pau-Do Ueno luwuakoano,
Aku tumunuo karetamu gagi ahu,
ka ponai ta pingko kumaano singa monguramu;
Aku mokotampulao kaangamu inso i wawontolino,
ka pepaudo tinenamu nahi ta teronge mbo'u.
Currently Selected:
Nahumi 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
