Nahumi 1
1
Puu mpau
1:1
1 #
Yes. 10:5; 14:24-25; Sep. 2:13 Pinau-Do anu mempori mongkona Niniwe. Wunta pongkitano i Nahumi, to Elikosi.
Tekuda-Do i Ue
1:2-8
2Ondae i Ue atuu Ue Ala anu meposiri ka puu mpombalo,
Ondae i Ue atuu puu mpombalo ka bukeako tensilano tekuda,
Ondae i Ue atuu puu mpombalo a luwuno anu umewai Ira
ka monaa aroa a luwuno iwali-Do.
3Ondae i Ue atuu tedoa sabara ka langkai pabawa-Do,
sine tedoa ntu'u nahi Dopotola ira mia mensala inso a mpohuku.
Ondae i Ue melempa a laro lompiu ka angi mokora pelempa-Do
ka seru onaemo awu a pelengkaru-Do.
4Dotekudaakono tahi ka mokomotu'io,
ka luwuno korono Doweweuo mo'are.
Basani ka Karameli gagi londa
ka bunga Libano gagi moleu.
5Luwuno torukuno melelu i aro-Do,
ka luwuno pongku loono.
Tolino tetande i aro-Do,
wawontolino saru luwuno palilino.
6Isema mokompentade umaropio tekuda-Do?
Ka isema mokompeteao tekuda-Do anu tensila?
Tensilano tekuda-Do te'uwu kana api,
ka luwuno torukuno watu ntebangku hangano Ondae.
7Ondae i Ue atuu moiko;
mepekadudui i tempono masusaa;
Doperio ira mia anu mepekadudui ndi Ondae
8maupo a laro mowo anu umaluo.
Dopingko ira ntu'u po'iangado anu me'ewa,
ka iwali-Do Dosaario a laro wongi-wongi.
Pau-Do i Ue ndi Yehuda ka Niniwe
1:9–2:2
9Maupo hapa anu tinoomiu umewai Ira i Ue,
Ira koa pingkoo luwu;
masusaa nahi ta me'umbaako anu kompenduano!
10Hangano, maupo ondae kana enano rui, ka mpo'inu kana mia wela molangu,
ira pingko mengkinaa kana seami mokari.
11Kombake inso ndi omue me'umbaako
mia anu montoo mosa'oa umewai Ira i Ue,
mia anu mompatudu lambaha?
12Kanandiomo pau-Do i Ue,
”Maupo domekongko luwu ka mehadio ira,
ta pingko luwu memate.
Maupo Kupokokongdeikomo,
nahi Aku mokongkodeiko mbo'u.
13Kanandio-andio, Aku puduo pasangano inso a oweamu,
ka umotuhio luwuno pongumu.”
14Dopakosiomo i Ue mongkona omue,
”Nahi ta hina mbo'u inule mompake neemu.
Inso a rahano pinesombaimu susua Aku mokotampulao tinaha pesomba pina'o
ka tinaha pesomba tinawa;
kaburumu Aku patindao, hangano nahina tudumu.”
15 #
Yes. 52:7
Kitaomo! A wawo luwuno torukuno
pelempaado mia anu mpowawa lele,
anu mpopalele rodoa ka manangaia.
Rame-rameomo oleo langkaimu, oo Yehuda,
owahiomo pontangamu!
Hangano nahi ta hina mbo'u mia lambaha sumapoiko;
onae pinokotampulaomo mpiha!
Currently Selected:
Nahumi 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
