Mika 7
7
Ponsabangi hangano mosa'ono gaudo to Isaraeli
7:1-6
1Masola akumo ntu'u! Hangano teweweuku kana puu mpobini wua umarino popumpua wua tempono motu'i-tu'i,
umarino po'opua mbo'u wua anggoro:
nami hina mbo'u wua anggoro ta kinaa,
ke wua ara anu ineheku.
2Mia mpope'ala-ala tampulaomo i witano,
ka nami hina mbo'u mia moleo i olodo mia.
Ondae luwudo mponsikori rea,
singge mia mo'ohoako buani pe'asa miano.
3Kaedo pande ntu'u mpoweweu mosa'o;
petewawa motuntu tambo, puu mpobitara montarima pompowee nahi pototo;
Anu langkai potorono mompowee pomputusi po'eheno aroano,
ka luwuno domemposuleo!
4Mia anu lalu moiko i olodo kana ewo rui,
anu lalu moleo i olodo kana wala rui.
Haweomo oleono a luwuno puu mpopadasomu, oleo pohukuamu.
Kanandio-andio ta gagi tewukaa i olodo!
5Si mpe'ala-alao walimu,
si pomperorohi a nsambe'e!
Dagaiomo wiwimu,
tamoako a beine anu mepombole a mpa'amu!
6 #
Mat. 10:35-36; Luk. 12:53 Hangano ana ntama mompokongkodei amano,
ana beine mentade umewaio ineno,
poni beine umewaio ine mponino;
iwalino aasa mia onaemo luwuno mia asa laro rahano.
Pomperorohi moleoa tiano Yerusale
7:7-13
7Sine ongkue andio sumisikori Ira i Ue,
momperorohi ndi Ondae Ue Ala anu kumadudui aku;
Ondae Ue Alaku Ira rumonge aku!
8Si po'undeakune, hei iwaliku!
Maupo kutebangku, aku koa mewangu mbo'u,
maupo kupentoro a laro wongi-wongi,
Ondae i Ue onaemo wantaku.
9Aku tumembio tekuda-Do i Ue,
hangano tehala akumo ndi Ondae,
ranta ka Do'ungkeakono kara-karaku
ka tumeahakono moleoa ndi ongkue.
Ira wawa aku a mewantaano,
ka kukitao moleo-Do.
10Iwaliku ta kumitao
ka mokoko'iio ta lumimbuo
anu mepau ndi ongkue,
”Isua Ira i Ue, Ue Alamu?”
Mataku ta kumitao;
kanandio-andio onae linolanda
kana rege a nsala.
11Ta hawe oleono rere watumu wali winangu;
ia oleo atuumo petidaamu ta pinokomolue.
12Ia oleo atuu mia ira mpe'aro ndi omue
inso i Asuri ka luwuno kota i Masiri,
inso i Masiri hawe a ngkoro Eparata,
inso a ntahi hawe a ntahi, inso a ntorukuno hawe a ntorukuno.
13Sine witado ta gagi boni-boni, hangano palilino
gagi wuano wineweudo.
Pekakai mo'ema pabawa ka pompehohawa-Do Ue Ala
7:14-20
14Bawaa-Miu Ipakambiako iramo tuko-Miu,
bawaano bimba lano Omiu ueno,
anu mo'ia asa-asano a laro ntobu
i tonga-tongano lere wua ngkeu.
Po'ineeomo domengkaano ewo i Basani ka i Gileadi
kana i tempono ndi'ipua.
15Kana i tempono upeluarako inso i Masiri,
Aku mopokitao a bawaa-Ku luwuno kinohali-haliako!
16Po'ineeomo luwuno tongku mengkitao mongkona atuu ka gagi mongkoko'iiako
luwuno mosiado.
Po'ineeomo dometompoakono kae ngangado,
ka birido gagi mobongo.
17Po'ineeomo domposile'i pampawu kana ule,
kana kondehora melele i tolino;
po'ineeomo dompeluarako saru mpondende inso a mpekorahakodo,
ka me'aiwa ndi Ondae i Ue, Ue Alamami, saru mpondende;
po'ineeomo ka domedoito ndi Omiu!
18Isemake kana Omiu Ue Ala anu mo'ampuni hala,
anu nahi pompototoi salado toreano bawaa anu lano Ondae me'ueo,
ka nahi kongko mpiha a laro ntekuda-Do,
tendeano umehe mokomengkaao petenunu pompehohawa?
19Po'ineeomo Dowali mehohawa kita,
pahihio luwuno salato
ka metadiakono luwuno halato
a laro luwuno wingke ntahi.
20Po'ineeomo Ipopokitao petenunu-Miu ndi Yako
ka pompehohawa-Miu ndi Burahima
kana anu Idandiomo
saru mesumpa ndi ondae uempu'umami
mompu'u i ndi'ipua!
Currently Selected:
Mika 7: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
