I MARAKUSU 4
4
Potundaano mongkona mia anu morawo
4:1-20
(Mat. 13:1-23; Luk. 8:4-15)
1 #
Luk. 5:1-3
I asa tempo Ondae i Yesu mompu'u mbo'u mompaguru a wiwi rano. Ka mehawe iramo mia hadio anu tedoa mehadio ira menggowo Ira, onaemo ka Dopewuatako a bangka anu tekonai mesonda ka Do'amba mentoro i tu'ai, sine mia hadio atuu a ntuwu wita, a wiwi rano atuu. 2Ka hadio rupa Dopaguruako ira a mpotundaano. A pompaguru-Do atuu Dopotaeako ira, 3”Imerongeomo! Hinao aasa mia melere lumako ta morawo inii. 4Tempono iporawo asa ntia inii atuu tedonta a wiwi nsala, ka do'amba mehawe manu-manu mengkaano hawe ka ipingko. 5Asa ntia tedonta a wita anu melaro watu, anu nahi hadio witano, ka i'amba inii atuu ronga tuwu, hangano witano monipi. 6Sine mansano saba oleo, moleuomo ka gagi mokari hangano nahi pehaka. 7Asa ntia mbo'u tedonta a laro ewo rui, ka i'amba kolangka-langkaino ewo rui atuu ka ihidio ranta ka imate, onaemo ka nahi pewua. 8Ka asa ntia tedonta a wita anu moiko, onae tuwu mewalo ka mewua, hasilino hinao anu meluka tolu pulu, hinao anu meluka nomo pulu, hinao anu meluka asa etu.” 9Ka Dopotae, ”Isema anu mebiri ka iporonge moikoomo irongeo!” 10Tempono asa-asa-Do, luwuno anu tumonda Ira ka hopulu ka orua ana guru-Do atuu mpesikeno ndi Ondae mongkona potundaano atuu. 11Sumangki Ira, ”Mewineeako komiumo rahasiano Poparentaa-Do Ue Ala, sine a mia i bungkuno luwuakoano pinohawe a mpotundaano, 12#Yes. 6:9-10 ka i'amba:
Maupo domengkitao, nahi domperioo,
maupo domerongeo, nahi dompokonto'orio,
ka si dompepokule ka mpohawe po'oninia hala.”
13Ka Do'amba motaeako ira, ”Nahi mpokonto'orioke potundaano andio? Tewala kanandio kana'umpe komiu mpokonto'orio luwuno potundaano anu susua? 14Puu mporawo atuu morawo pau-Do i Ue. 15Mia anu a wiwi nsala, porawoa pau-Do i Ue atuu, ondaemo anu merongeo pau-Do i Ue, ka i'amba haweomo i Mosa'o ka i'alao pau anu da iaopo irinawo ndi ondae. 16Kanatuu koa mbo'u anu rinawo a wita anu melaro watu, ondaemo mia anu merongeo pau-Do I Ue atuu ka ronga mentarimao saru memawongko, 17sine nahi dompehaka ka sarai koa ipo'ia. Tewala lembuino hinao pompokonsiia ke pobobarasaia hangano pau-Do i Ue atuu, sarai koa ka dompehapu. 18Ka anu mehano onaemo anu rinawo a laro ewo rui, ondaemo anu merongeo pau-Do i Ue atuu, 19ka i'amba sala-larono wawontolino andio ka pompopo'oono kaeaa ka hadio rupa anu minosisiriako mewinso humidio pau-Do i Ue atuu ranta nahi pewua. 20Ka poko'ariano anu rinawo a wita anu moiko, ondaemo mia anu merongeo ka mentotowoo pau-Do i Ue atuu ka i'amba mewua, hinao anu meluka tolu pulu, hinao anu meluka nomo pulu, ka hinao anu meluka asa etu.”
Potundaano mongkona hulu ka mongkona ponsa'u
4:21-25
(Luk. 8:16-18)
21 #
Mat. 5:15; Luk. 11:33 Ka Do'amba i Yesu motaeako ira, ”Mia mowawa hulu komba ka ininaa a ntoto basu ke a ntoto poturia, tendeano ka ininaa a wawo pentoroano hulu. 22#Mat. 10:26; Luk. 12:2 Hangano nahina maupo hapa anu tewuni anu nahi ta pinokomengkaa, ka nahina maupo hapa anu rahasia anu nahi ta pinosaba. 23Ba isema mebiri ka iporonge, moikoomo irongeo!”
24 #
Mat. 7:2; Luk. 6:38 Ka Do'amba motae mbo'u, ”Impe'ihi laroomo hapa anu rinongemiu! Ponsa'u anu pinakemiu mponsa'uako ta sina'uako ndi omiu, ka umarino atuu komiu mentiniangiako mbo'u. 25#Mat. 13:12; 25:29; Luk. 19:26Hangano isema anu hina, ndi onae ta pinowee, sine isema anu nahina, hapamo koa anu hina ndi onae ta inala inso ndi onae.”
Potundaano mongkona inii anu tuwu
4:26-29
26Ka Do'amba motae i Yesu, ”Kanandiomo mongkona Poparentaa-Do Ue Ala atuu: pinotundaako kana mia anu morawo inii a wita, 27ka i'amba tempono wongi onae moturi ka meene onae mewangu, ka inii atuu mentumba ka tumbano atuu ko'onda-ondauno, kana'umpe teweweuno nahi to'orio mia atuu. 28Tolino moluarako onaeno wua, amba-ambano tangkeno, ka i'amba tonggino, umarino atuu labano anu buke ihino a ntonggino atuu. 29#Yoe. 3:13 Tewala wua atuu motahaomo, mompari-pariomo mia atuu sumowio, hangano haweakoomo konsowia.”
Potundaano mongkona wuku rawoho
4:30-34
(Mat. 13:31-35; Luk. 13:18-19)
30Dopotae mbo'u, ”Saru hapa kita mongkenaakono Poparentaa-Do Ue Ala atuu ke saru potundaano hapa ba togambaraakono? 31Mongkona Poparentaa atuu pinotundaako wuku rawoho anu rinawo a wita. Lano wuku mpinopaho atuu anu lalu kodei inso a luwuno rupano wuku mpinopaho anu hina i tolino. 32Sine tewala rinawo, onae tuwu ka gagi langkaiopo sekono anu mehano ka moluarako hadio sampano anu langkai, ranta manu-manu i laro meene mpokompeseno a laro mpe'engoano.”
33I larono hadio potundaano anu kanatuu Dopaleleo pau-Do i Ue ndi ondae menunu saru ponto'orido, 34ka ba nahi a mpotundaano nahi Dopepau ndi ondae, sine a ana guru-Do Dopauako ira luwuakoano butu ondae.
Angi mokora Dopokotemontoo
4:35-41
(Mat. 8:23-27; Luk. 8:22-25)
35A oleo atuu, tempono ngkiniwiaomo, Dopotaeako ira i Yesu, ”Aiwamo ka tomelako i asatowa.” 36Domebinta ira mia hadio atuu ka do'amba melako wawa Ira i Yesu merongaako ira a laro bangka anu lano mentoro Iramo i Yesu ka hadio mbo'u bangka susua merongaako Ira. 37Ka i'amba mepuuriomo angi mokora anu tedoa mongkokongiri ka bomba merumpa mewinso a laro bangka, ranta bangka atuu mompu'uomo bukeako uwoi. 38I tempo atuu Ondae kontongaa-Do moturi a ulimano a asa ompeo. Onaemo ka dowangu Ira ana guru-Do ka dompotaeako Ira, ”Guru, nahi perioo ba kita memate?” 39Mewangu Iramo, kumuahakono angi atuu ka Dopepauakono rano atuu, ”Penoro-noro! Pomperodomo!” Ka i'amba angi atuu temonto ka rano atuu gagi maante ntu'u. 40Ka Do'amba motaeako ira, ”Tembio ka itedoa medoito? Tembio ka nahi mpompe'ala-ala?” 41Gagi iramo tedoa medoito ka dompepau pada ondaedo, ”Isema tokoa Ondae andio, ranta angi ka maupo rano momperorongeako ndi Ondae?”
Currently Selected:
I MARAKUSU 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
