I MARAKUSU 3
3
Ondae i Yesu mompokotompa a oleo Saba
3:1-6
(Mat. 12:9-14; Luk. 6:6-11)
1Ka Do'amba i Yesu mewinso mbo'u a raha tepumpua. I tu'ai hinao aasa mia anu mate asa mbali kaeno. 2Dompekokoongako Ira i Yesu, ba mansa Dopokotompao mia atuu a oleo Saba, ka ihina pesalaado mpokonsalao. 3Dopotae i Yesu a mia anu mate asambali kaeno atuu, ”Aiwa, pentademo i tongano!” 4Ka Do'amba motaeako ira, ”Hapa anu pinemoiko a oleo Saba, moweweu moiko ke moweweu mosa'o, mongkadudui penaano mia ke mompepate mia?” Sine butu ira mengkomino. 5Mompemasusa Ira hangano pe'ulu watudo ka saru tekuda mengkita Ira limbu-limbu ndi ondae ka Do'amba motaeakono mia atuu, ”Tasiakono kaemu!” Ka itasiakono, ka tompaomo kaeno atuu. 6Ka i'amba mpeluarako iramo to Parisi ka mpopari-pari mpedandi mpoweweu mosa'o saru to Herodia ka dompepate Ira.
Ondae i Yesu mompokotompa hadio mia
3:7-12
7Ka Do'amba i Yesu saru ana guru-Do meliahako lumako a rano, ka hadio mia inso i Galilea tumonda Ira. Ka anu inso mbo'u i Yudea, 8inso i Yerusale, inso i Idumea, inso i asatowano Yarade, ka inso i wita Tirusi ka i Sidoni me'aiwa hadio mia ndi Ondae, umarido merongeo luwuno anu wineweu-Do. 9#Mrk. 4:1; Luk. 5:1-3 Dotena ira ana guru-Do patindaako Ira aasa bangka hangano mia hadio atuu, ka si mansa dome'asi Ira. 10Hangano hadio mia pinokotompa-Do, onaemo ka dompegugurompo ndi Ondae luwuno mia memahaki mingki me'angga Ira. 11Tewala domengkita Ira onitu nsa'o, ira mentebangku tepantundu i aro-Do ka mpebooli, ”Omiumo Ana-Do Ue Ala.” 12Sine Do'onto ira ntu'u mempauo isema Ondae.
Ondae i Yesu mompoboi hopulu ka orua tinena
3:13-19
(Mat. 10:1-4; Luk. 6:12-16)
13Ka i'amba mewuatako Iramo i Yesu a wawo pongku. Dopoboi ira mia anu inehe-Do ka ondae mbo'u me'aiwa ndi Ondae. 14Dopakosio hopulu ka orua mia anu wela wali-Do ka anu ta tenaa-Do mompalele Lele Mawongkoa 15ka Dopoweeako ira pabawa ka domposaari onitu nsa'o. 16Hopulu ka orua mia anu pinakosi-Do onaemo: i Simo, Anu nineeako i Peturu, 17I Yakobu anano i Sebedeu, ka i Yohane pepaekompono i Yakobu, anu oruano Doneeako ira i Boaneregesi, anu pengkonaano anano rundu, 18ka i'amba i Andarea, i Pilipu, i Batolomeu, i Matiu, i Toma, i Yakobu anano i Alipeu, i Tadeu, i Simo to Seloti, 19ka i Yudasi Karioti, anu meweengako Ira.
Ondae i Yesu ka i Belesebu
3:20-30
(Mat. 12:22-32; Luk. 11:14-23)
20Ka Do'amba i Yesu mewinso a aasa raha. Ka mehawe iramo mbo'u mia hadio mpenggowo, ranta maupo mongkaa nami Dotengko'ala. 21Tempono domerongeo pe'etu-Do anu gagi atuu, me'aiwa ira mingki umala Ira, hangano potaedo nami Dope'aroa moiko mbo'u. 22#Mat. 9:34; 10:25; 12:24; Luk. 11:15 Ka anu mponto'ori Taura anu mehawe inso i Yerusale mpotae, ”Ipewinsoki Ira i Belesebu,” ka, ”Tadulakodo koa onitu nsa'o Doponsaariako onitu nsa'o.” 23Dopoboi ira i Yesu, ka Do'amba motaeako ira a mpotundaano, ”Kana'umpe i Mosa'o mokosaario i Mosa'o? 24Tewala aasa poparentaa tetia-tia, poparentaa atuu nahi ta mokompo'ia mpiha, 25ka tewala aasa sombori tetia-tia, sombori atuu nahi ta mokompo'ia mpiha. 26Kanatuu koa mbo'u tewala i Mosa'o umewaio koroino onaeno ka tewala onae tetia-tia, nahi ta mokompo'ia mpiha, tendeano haweomo pokotampulaano. 27Sine nahina maupo te'asa mia mokompewinsokio rahano asa mia anu moroso ka irontuo arataano tewala nahi ponguo se'elu mia moroso atuu. Umarino atuu ka i'amba mokorontuo ihino raha atuu. 28Kupauakomiu: Menteeano luwuno hala ka pompepaukido anano mia ta inampuni, oo, luwuno pompepaukiako anu pinaudo. 29#Mat. 12:32; Luk. 12:10 Sine tewala asa mia mompepaukiako Penaa Mempori, onae nahi pohawe po'ampuni halano ranta nahina tampulaano, tendeano sala hangano moweweu hala anu nahina tampulaano.” 30Dopotae kanandio hangano mpotae ira nine ipewinsoki Ira onitu nsa'o.
Ondae i Yesu ka pepaekompo-Do
3:31-35
(Mat. 12:46-50; Luk. 8:19-21)
31Ka i'amba hawe iramo ine-Do i Yesu ka luwuno pepaekompo-Do i Yesu. Kontongaado mpentade i bungkuno, mpontena ira mia moboi Ira. 32Hinao mia hadio mpentoro lumimbu Ira, dompotaeako Ira, ”Kitao, ondae ine-Miu ka pepaekompo-Miu mekongko ira i bungkuno, ka mingki tepohawea-Komiu.” 33Dosangki ira i Yesu, ”Isema ine-Ku ka isema pepaekompo-Ku?” 34Mengkita Ira a mia anu mpentoro lumimbu Ira atuu ka Dopotae, ”Ndiomo ine-Ku ka pepaekompo-Ku! 35Ba isema weweuo po'ehe-Do Ue Ala, onaemo pepaekompo-Ku tama, onaemo pepaekompo-Ku beine, onaemo ine-Ku.”
Currently Selected:
I MARAKUSU 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
