I MARAKUSU 5
5
Ondae i Yesu monsaari onitu nsa'o inso a nto Gerasa
5:1-20
(Mat. 8:28-34; Luk. 8:26-39)
1Ka i'amba mehawe iramo i asatowano rano, i witado to Gerasa. 2Da iaopo Dopetii i Yesu inso a bangka, aiwaomo aasa mia anu pinewinsokino onitu nsa'o inso a mpekaburua tepohaweako Ira. 3Mia atuu mo'ia i ra'ai ka nahina mbo'u maupo te'asa mia anu polio ponguo, maupo mompake rante, 4hangano mararuomo ipinongu ka rinante, sine ranteno ibiteo ka ponguno ibite-biteo, ranta nahina maupo te'asa mia anu moroso mokomoneao. 5Meene wongi ipo'itu-itu a mpekaburua ka pongku-pongku ka ikokora-kora ka tumunduhiakono watu koroino. 6Tempono ikita Ira i Yesu inso olai, meluluomo tepohaweako Ira ka i'amba mesombai Ira, 7ka meroku ikokora-kora, ”Hapa ta mbinio-Miu ndi ongkue, hei Yesu, Ana-Do Ue Ala Anu Lalu i wawono? A nee-Do Ue Ala, si bobarasai aku!” 8Hangano se'eluno Dopotaeakono i Yesu, ”Hei omue onitu nsa'o peluarakomo inso a mia andio!” 9Ka Do'amba sumikenoo mia atuu, ”Isema neemu?” sangkino, ”Neeku i Legio, hangano mehadio kami.” 10Tedoa i'emao ntu'u ka si Dosaari ira i Yesu onitu nsa'o atuudo mpeluarako inso i wita atuu.
11Hinao i ra'ai a pongku asa bawaa boe tekonai mpo'ungke kaangado, 12ka i'amba onitu nsa'o atuudo me'emao ndi Ondae, dompotae, ”Itena kamimo ka kimpelimba a laro boe atuudo, Ipo'inee kamimo mpewinsoki ira!” 13Do'induo i Yesu po'emado. Ka i'amba mpeluarako iramo onitu nsa'o atuu ka mpewinsoki ira boe atuudo. Bawaano boe anu bara'ura rua nsowu hadiono atuu mpentoa inso a wiwi wingke a laro rano ka memate mo'opo i larono.
14Onaemo ka dompolai anu mpodagai boe atuu ka mentutuluo anu gagi atuu a ngkota ka a luwuno inia petengi-tengino. Ka i'amba mpeluarako iramo mia ira mengkitao hapa anu gagi. 15Me'aiwa ira ndi Ondae i Yesu ka domengkitao mia anu pinewinsokino onitu nsa'o atuu mentoro, mesangkaomo ka me'aroaomo moiko, mia anu hieno ipewinsokio i legio atuu. Onaemo ka domedoito. 16Mia anu mengkitaakono matado mongkona atuu mentutuluo ndi ondae mongkona hapa anu gagiomo a mia anu pinewinsokino onitu nsa'o atuu, ka mongkona boe atuudo. 17Ka do'amba medadai Ira i Yesu ka Dobintao witado. 18I tempono Dope'ula mbo'u i Yesu a laro bangka, mia anu hieno ipewinsokio onitu nsa'o atuu mo'ema, ka Dobeheo tumonda Ira. 19Nahi Dobeheo i Yesu, sine Dopotaeakono mia atuu, ”Pekulemo i rahamu, a mia pe'asa iniamu, ka pauako iramo luwuakoano anu Doweweuomo i Ue ndi omue ka ba kana'umpe Dopehohawako!” 20Lumakoomo mia atuu ka mompu'u paleleo i wita Dekapoli luwuno hapa anu Doweweuomo i Yesu a ngkoroino ka luwudo gagi mengkohali-hali.
Ondae i Yesu wanguo anano i Yairu ka mokotompao aasa beine anu mahaki merea
5:21-43
(Mat. 9:18-26; Luk. 8:40-56)
21Mansa-Do hawe i Yesu i asatowa, mia hadio ntehuhu me'aiwa ka do'amba menggowo Ira. Kontongaa-Do a wiwi rano, 22haweomo aasa mia petewawa a raha tepumpua anu meneeako i Yairu. Mansano kumita Ira i Yesu, menggolontuomo a mpuu karu-Do 23ka tedoa mepepehohawa ndi Ondae, ”Anaku beine kontongaano mahaki, tamo ronga mate, po'ineeomo ka i'aiwa dumampoakono kae-Miu i wawono, ka itekadudui ka ikongko tuwu.” 24Ka Do'amba i Yesu lumako saru mia atuu. Mia hadio ntehuhu tumonda Ira ka mpehihidi umpedaako Ira.
25Kongko i tu'ai aasa beine anu hopulu ka orua nta'umo tehineno imahaki merea. 26Mararuomo domempakulio mperupa-rupa sando, ranta ipingkoomo luwuno anu hina ndi onae, sine nahina tuduno tendeano koteti-tetiangino hakino. 27Irongeomo luwuno lele mongkona Ondae i Yesu, onaemo ka ipe'oloako i tonga-tongano mia hadio atuu rumangkuhi Ira i Yesu inso i bungku-Do ka i'anggao lemba meloe-Do. 28Hangano potaeno, ”Polomo koa ka ku'anggao lemba meloe-Do, aku tompa.” 29I tempo koa mbo'u atuu menaa-naaomo mereano ka ipodeao, nine koroino tompaomo inso a hakino. 30I tempo koa mbo'u atuu Doto'orio i Yesu, nine hinao roso anu meluarako inso a ngkoroi-Do, ka Do'amba mewolili i olono mia hadio ka mesikeno, ”Isema anu umanggao lemba meloe-Ku?” 31Mesangki ira ana guru-Do, ”Ikitao kana'umpe mia hadio andio dompehihidi rumangkuhi Komiu, ka Ipesikeno: Isema anu umangga Aku?” 32Ka Do'amba mengkita limbu-limbu ka Dokitao isema anu moweweuomo kanatuu. 33Beine atuu, anu gagiomo doito ka mondidi-ndidi mansano tumo'orio hapa anu gagiomo a ngkoroino, aiwa ka ipenggolontu i aro-Do i Yesu ka a moleono aroano ipauako Ira luwuakoano. 34Onaemo ka Dopotaeakono i Yesu beine atuu, ”Hei ana-Ku, ikaduduikomo pompe'ala-alamu. Lakomo tekadudui ka tompamo inso a hakimu!” 35Tempono Ondae i Yesu da mepau haweomo mia inso a mpe'etuno petewawa a raha tepumpua atuu ka ipotae, ”Anamu mateomo, pombio mbo'u upokomasusaako Ira Guru?” 36Sine nahi Doperioo i Yesu paudo ka Dopotaeakono petewawa a raha tepumpua, ”Si doito, pompe'ala-alamo!” 37Ka Do'amba i Yesu nahi Dopo'eheako maupo te'asa mia tumonda Ira, sangkadio i Peturu, i Yakobu ka i Yohane, pepaekompono i Yakobu. 38Mehawe ira a rahano petewawa a raha tepumpua, ka i ra'ai Dokitao mia mpohoho, mpengese ka mposabangi meroku. 39Mansa-Do mewinso Dopotaeako ira mia atuudo, ”Tembio ka impohoho ka mpengese? Nana'ote andio komba mate, sine moturi!” 40Sine dompengingisii Ira.
Onaemo ka Dosaari ira luwu mia atuudo, ka Do'amba wawao amano ka ineno nana'ote atuu ka ondae anu merongaako Ira mewinso a bolongkono nana'ote atuu. 41Ka Do'amba uminio kaeno nana'ote atuu, Dopotae, ”Talita kum,” anu pengkonaano, ”Hei ana, Kupauakomu, pewangumo!” 42I tempo koa mbo'u atuu nana'ote atuu mewangu ka ipentade ka melempa, hangano tinuwuno hopulu ka orua nta'umo. Luwuno mia anu mehawe mengkohali-hali. 43Do'oliwi ira ntu'u, ka si hina maupo te'asa mia anu tumo'orio mongkona atuu, ka Do'amba tumena ira mempakao nana'ote atuu.
Currently Selected:
I MARAKUSU 5: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
