I MARAKUSU 2
2
Mia luuka pinokotompa
2:1-12
(Mat. 9:1-8; Luk. 5:17-26)
1Ka i'amba, umarino telalo ba opia oleo, tempono Do'aiwa mbo'u i Yesu i Kapenau, tepaleleomo lele, nine kongko Ira i raha. 2Onaemo ka mehawe iramo mia mpenggowo ranta nahina mbo'u po'ianga, tendeano maupo i arono pewowa nami hina. Kontongaa-Do montutuluako ira pau-Do i Ue, 3hinao mia mehawe mewawao ndi Ondae aasa mia luuka, domenselao opaa mia. 4Sine nahi dompokowawao ndi Ondae hangano mia hadio atuu, ka do'amba me'ungkahio ato anu i wawono; mansano te'ungkahi dompotiio poturia, pepomboleano mia luuka atuu. 5Mansa-Do kumitao pompe'ala-alado, mepau Iramo a mia luuka atuu, ”Hei ana-Ku halamu inampuniomo!” 6Sine i tu'ai hinao mbo'u mpentoro ba opia guru agama, dompewowoloo i laro aroado, 7”Tembio mia andio ka ipepau kanatuu? Ipepauikoako Ira Ue Ala. Isema anu mokompo'ampuni hala sangkadio Ondae Ue Ala?” 8Sine Doronga mokonto'orio i Yesu i laro aroa-Do, nine mpompewowolo ira kanandio, ka Do'amba motaeako ira, ”Tembio ka impompewowolo kanatuu i laro aroamiu? 9Isuake anu moruanaopo, motaeakono mia luuka andio: Halamu inampuniomo, ke motae: Pewangumo, tamdeomo poturiamu ka pelempa? 10Sine ka imento'orio, nine i wawontolino andio i Ana Manusia pabawa mo'ampuni hala” — Dopotaeakono mia luuka atuu —, 11”Ndi omue Kupepau, pewangumo, tandeomo poturiamu ka pekulemo i rahamu!” 12Ka mewanguomo mia atuu, mompari-pari tumandeo poturiano ka ilako i bungkuno i arodo mia hadio atuu, ranta ka domengkohali-hali luwu ka do'amba me'unde-unde Ira Ue Ala, dompotae, ”Anu kanandio napi tohori mpongkita.”
I Lewi puu pompupu sima'ulu tumonda Ira i Yesu
2:13-17
(Mat. 9:9-13; Luk. 5:27-32)
13Umarino atuu Ondae i Yesu lumako mbo'u a wiwi rano, ka luwuno mia hadio me'aiwa ndi Ondae, ka i'amba paguru ira. 14Ka i'amba tempono Dopelempa telalo i tu'ai, Dokitao i Lewi anano i Alipeu mentoro a raha sima'ulu ka Do'amba motaeakono, ”Tonda Akumo!” Ka mentadeomo i Lewi ka i'amba tumonda Ira. 15Ka i'amba tempono Dopongkaa i Yesu a rahano mia atuu, hadio puu pompupu sima'ulu ka mia ntehala mpongkaa mperonga-ronga saru Ondae i Yesu ka ana guru-Do, hangano hadio mia tumonda Ira. 16I tempono domengkitao anu mponto'ori Taura inso a nto Parisi, nine Ondae mongkaa saru puu pompupu sima'ulu ka mia ntehala atuu, dompotaeako ira ana guru-Do, ”Tembio ka Dopongkaa merongaako ira puu pompupu sima'ulu ka mia ntehala?” 17Dorongeo i Yesu ka Dopotaeako ira, ”Komba mia madoo anu mongkere sando, sine mia mahaki; Komba ndio Aku hawe mompoboi mia mentee, tendeano mia ntehala.”
Mongkona puasa
2:18-22
(Mat. 9:14-17; Luk. 5:33-39)
18I asa tempo, tempono ana guruno i Yohane ka to Parisi kontongaado mempuasa, mehawe iramo mia ka mempauako Ira i Yesu, ”Tembio ana guruno i Yohane ka ana gurudo to Parisi ka domempuasa, sine ana guru-Miu naahi?” 19Sumangki ira i Yesu, ”Polioke ira mempuasa sambe'eno umbu ngkoroi tama sekono umbu ngkoroi tama atuu merongaako ira? I tempo umbu ngkoroi tama atuu merongaako ira, nahi ira mempuasa. 20Sine ta hawe tempono umbu ngkoroi atuu inala inso ndi ondae, ka i tempomo atuu ira mempuasa. 21Nahina maupo te'asa mia anu motompeliako asa nsore sawu wo'ohu a lemba anu laano, hangano tewala kanandio sawu potompeli atuu ta berio, anu wo'ohu ta berio anu laano, ka i'amba kolangka-langkaino teberino. 22Kanatuu koa mbo'u nahina maupo te'asa mia mo'ihii anggoro anu da sarai a ngkadu kuli anu tehineomo, hangano tewala kanatuu anggoro atuu ta berio kadu kuli atuu, ranta anggoro atuu ka kaduno oruano tinadi. Sine anggoro anu da sarai asalakono ninaa a laro ngkadu anu da sarai mbo'u.”
Ana guru mpo'opu wua gandu a oleo Saba
2:23-28
(Mat. 12:1-8; Luk. 6:1-5)
23 #
Win. 23:25
I asa tempo, a oleo Saba, Ondae i Yesu melempa telalo a lere gandu, ka kontongaado mpelempa ana guru-Do mpo'opu tonggino gandu. 24Ka mpotae iramo to Parisi ndi Ondae, ”Kitao! Tembio ka domeweweu aasa anu inonto a oleo Saba?” 25#1Sam. 21:1-6 Dosangki ira, ”Napi horike mebasao hapa anu wineweuno i Daudi, tempono onae ka ondae anu mentondao memakura ka memokoninggo, 26#Ima. 24:5-9 kana'umpe ipewinso a laro Raha-Do Ue Ala tempono i Abiata gagi Sando mpesomba Langkai ka i'amba kumaano roti pesomba atuu – anu nahi moiko ikinaa sangkadio luwuno sando mpesomba – ka ipoweeako ira mbo'u anu mentondao?” 27Ka Do'amba i Yesu motaeako ira, ”Oleo Saba wineweu tiano mia komba mia tiano oleo Saba, 28gagi i Ana Manusia Ueno koa mbo'u oleo Saba.”
Currently Selected:
I MARAKUSU 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
