I MARAKUSU 10
10
Teposuaa
10:1-12
(Mat. 19:1-9)
1Inso i tu'ai Ondae i Yesu melungka lumako i wita Yudea ka i wita asatowano koro Yarade ka i tu'ai mbo'u mia hadio mehawe nggumowo ira; ka Dopaguru ira mbo'u kana gau-Do mpiha. 2Ka mehawe iramo to Parisi, ka hangano ira me'ara-arahako Ira i Yesu mpesikeno ira ndi Ondae, ”Moiko koake aasa tama ba iteposuaakono beineno?” 3Sine Dosangki ira, ”Hapa parentano i Musa ndi omiu?” 4#Win. 24:1-4; Mat. 5:31Mesangki ira, ”I'indu kami koa i Musa teposuaakono, poolo moweweu wunta teposuaa.” 5Ka Do'amba motaeako ira i Yesu, ”Hangano koa moteano aroamiu onaemo ka iburiakomiu i Musa parenta andio. 6#Teg. 1:27; 5:2Hangano a pompu'uano wawontolino, Dopokogagi ira Ue Ala tama ka beine, 7#Teg. 2:24onaemo pu'uno tama ta binta ira amano ka ineno ka ipe'asaakono beineno, 8ranta orua ira atuu gagi asa ihi. Kanandiomo ondae komba orua mbo'u, tendeano aasa. 9Onaemo pu'uno, hapa anu Dopo'asaomo Ue Ala, nahi moiko iponsuao mia.”
10Tempono hawe Iramo i raha, mpesikeno ira mbo'u ana guru atuudo ndi Ondae i Yesu mongkona pinau-Do atuu. 11#Mat. 5:32; Luk. 16:18; 1Kor. 7:10-11 Ka Do'amba motaeako ira, ”Ba isema teposuaakono kombiano ka i'amba mekombiaako beine susua, onae tuwu a laro ponsosaboa a beineno atuu. 12Ka tewala beineno teposuaakono tamano ka mekombiaako mbo'u tama susua, onae monsosabo.”
Ondae i Yesu rumonso ira nana'ote
10:13-16
(Mat. 19:13-15; Luk. 18:15-17)
13Ka do'amba mia mewawa ira nana'ote kodei ndi Ondae i Yesu, ka Do'angga ira; sine ana guru-Do tekudaako ira mia atuudo. 14Mansa-Do kumitao i Yesu anu gagi atuu, tekuda Ira ka Dopotaeako ira, ”Po'inee ira nana'ote atuudo me'aiwa ndi Ongkue, si me'onsoi ira, hangano mia anu kana ondaemo atuu anu mpe'umbuo Poparentaa-Do Ue Ala. 15#Mat. 18:3; Luk. 18:17 Kupauakomiu: Menteeano ba isema nahi tarimao Poparentaa-Do Ue Ala kana aasa nana'ote kodei, onae nahi ta mewinso i larono.” 16Ka Do'amba i Yesu kumopui ira nana'ote atuudo ka kontongaa-Do numaao kae-Do i wawodo ka Doronso ira.
Mia kaea motungko ipewinso a Poparentaa-Do Ue Ala
10:17-27
(Mat. 19:16-26; Luk. 18:18-27)
17I tempono Dopelungka i Yesu Ira motilaloakono pelempaa-Do, haweomo aasa mia melulu-lulu tepohaweako Ira ka kontongaano menggolontu i aro-Do onae mesikeno, ”Guru anu moiko, hapa anu asalakono kuweweuo ka kupohawe tuwua anu nahina tampulaano?” 18Sumangki Ira i Yesu, ”Tembio ka upotae Ongkue moiko? Nahina maupo te'asa mia anu moiko sangkadio butu inso ndi Ondae Ue Ala. 19#Pel. 20:12-16; Win. 5:16-20 Manasa uto'orio luwuno parenta-Do Ue Ala: Si pompepate, si ponsosabo, si ponako, si pesakosii megaupi, si pompokorugi pe'asa miamu, pelangkai ira amamu ka inemu!” 20Ka i'amba motae mia atuu ndi Ondae, ”Guru, luwuno atuu kutondaomo mompu'u da kumongura.” 21Sine Ondae i Yesu mengkita ndi onae ka Dopehohawao, ka Do'amba motaeakono, ”Aasapo mbo'u makuramu: lakomo, asaomo hapa anu pine'uemu ka peweengakonomo atuu a mia memongkokolaro, asalakono komohawe arataa i suruga, umarino atuu aiwamo ramai ka tonda Akumo.” 22Rumongeo pau atuu gagiomo masusa, ka i'amba lumako masusa aroa, hangano hadio arataano.
23Ka Do'amba i Yesu mengkita a ana guru-Do limbu-limbu ka Dopotaeako ira, ”Motungko ntu'u mia hadio doino mewinso a laro Poparentaa-Do Ue Ala.” 24Mengkohali-hali ira ana guru-Do merongeo pinau-Do atuu. Sine Dosombuo mbo'u i Yesu, ”Ana-Ku luwu-luwu, motungko ntu'u mewinso a laro Poparentaa-Do Ue Ala. 25Moruanaopo aasa unta telalo a bolono seu sekonopo aasa mia kaea mewinso a laro Poparentaa-Do Ue Ala.” 26Tepahe iramo ntewuka ka dompepau-pau pada ondaedo, ”Tewala kanandio, isemake anu pinokokadudui?” 27Ondae i Yesu mengkita ndi ondae ka Dopotae, ”A mia mongkona atuu nahi polio, sine komba kanatuu ndi Ondae Ue ala. Hangano luwuakoano Dopolio Ue Ala.”
Tambo tumonda Ira i Yesu
10:28-31
(Mat. 19:27-30; Luk. 18:28-30)
28Motaeomo i Peturu ndi Ondae i Yesu, ”Omami andio kimebintaomo luwuakoano ka kimentonda Komiu!” 29Sumangki Ira i Yesu, ”Kupauakomiu, menteeano sompo mia anu hangano Ongkue ka hangano Lele Mawongkoa ka ibintao rahano, pepaekompono tama ke pepaekompono beine, ineno ke amano, luwuno anano ke lereno, 30mia atuu kanandio-andio i tempo koa mbo'u andio ta wali tumarimao meluka asa etu: raha, pepaekompo tama, pepaekompo beine, ine, ana ka lere, maupo tinondaako mperupa-rupa pobobarasaia, ka a tempo anu ta hawe onae ta tumarimao tuwua anu nahina tampulaano. 31#Mat. 20:16; Luk. 13:30Sine hadio mia anu tese'elu ta gagi anu pokotompa ka anu pokotompa ta gagi anu tese'elu.”
Pompopoto'ori kopentoluno mongkona tebobarasai-Do i Yesu
10:32-34
(Mat. 20:17-19; Luk. 18:31-34)
32Ondae i Yesu kontongaa-Do a mpelempaa saru ana guru-Do melako i Yerusale ka Ondae i Yesu i arono. Ana guru-Do mensalalaro ka mia mbo'u anu mentonda Ira medoito. Pohonapo mbo'u Dopoboi ira i Yesu ana guru-Do anu hopulu ka orua ka Dopompu'u pauako ira hapa anu ta gagi a ngkoroi-Do, 33Dopotae, ”Kanandio-andio kita melako i Yerusale ka i Ana Manusia Ira pineweengako a mpetewawado sando mpesomba ka guru agama, ka ira mempakosiao Ondae hinuku mate. Ka Ira pineweengako a luwuno tongku anu nahi domento'ori Ira Ue Ala, 34ka Ira pinasinggiri, inonui, sinepi ka pinepate, ka umarino otolu oleo Ira mewangu.”
Po'emado i Yakobu ka i Yohane
Komba meparenta tendeano mompekakaako
10:35-45
(Mat. 20:20-28)
35Ka do'amba i Yakobu ka i Yohane, anano i Sebedeu, rumangkuhi Ira i Yesu ka dopotaeako Ira, ”Guru, kiperorohio ka I'induo aasa po'emamami!” 36Dosangki ira, ”Hapa anu inehemiu ba Kuweweuakomiu?” 37Ka do'amba motae, ”I'ehea kami koa mentoro a laro marambaa-Miu te'ipua, anu asa mia i koana-Miu ka anu asa mia mbo'u i manggali-Miu.” 38#Luk. 12:50 Sine Dopotaeako ira i Yesu, ”Nahi ito'orio hapa anu inemamiu. Komiu polioke uminuo ihino tonde anu asalakono Aku uminuo ka binahoako pobaho anu asalakono Aku tumarimao?” 39Sumangki ira, ”Kami koa polio.” Dopotaeako ira i Yesu, ”Lano, komiu koa uminuo ihino tonde anu asalakono Aku uminuo ka komiu binahoako pobaho anu asalakono Aku tumarimao. 40Sine mongkona mentoro i koana-Ku ka i manggali-Ku, komba to'oria-Ku meweengakono. Anu atuu ira mewineeako mia tiano isema atuu pinatindaako.”
41Rumongeo atuu hopulu ana guru anu mehano tekudaako ira i Yakobu ka i Yohane. 42#Luk. 22:25 Sine Dopoboi ira i Yesu ka Dopotae, ”Imento'orio, nine ondae anu nineeako mia meparenta a luwuno tongku meparenta mokora ira palilido, ka luwuno anu langkai potorodo mpolempao pabawado dumadai ira. 43#Mat. 23:11; Mrk. 9:35; Luk. 22:26 Komba kanatuu i olo omiu. Ba isema mingki gagi langkai i olomiu, asalakono ka igagi puu pompekakakomiu, 44ka ba isema mingki gagi petewawa, asalakono ka igagi atamiu luwu. 45Hangano i Ana Manusia mbo'u hawe komba ka Dopinekakaako, tendeano mompekakaako ka meweengakono penaa-Do gagi tolosino hadio mia.”
Ondae i Yesu mokotompao i Baratimeu
10:46-52
(Mat. 20:29-34; Luk. 18:35-43)
46Ka i'amba hawe Iramo i Yesu ka ana guru-Do i Yeriko. Ka tempono Dopeluarako i Yesu inso i Yeriko, mperonga-ronga saru ana guru-Do ka mia hadio anu ntehuhu, hinao asa mia puu mpo'ema-ema anu morawu, meneeako i Baratimeu, anano i Timeu, mentoro a wiwi nsala. 47Mansano rumongeo, nine atuu Ondaemo i Yesu to Nasare, mompu'uomo mebooli, ”Oo Yesu, Anano i Daudi, Ipehohawa akumo!” 48Hadio mia kumuahakono ka si pohohoi. Sine komero-merokuno ipebooli, ”Anano i Daudi, Ipehohawa akumo!” 49Ka Do'amba i Yesu menaa-naa ka Dopotae, ”Imempoboio!” Domempoboio mia morawu atuu ka dompotaeakono, ”Pokorosoo aroamu, pentademo, Dopoboiko.” 50Ka i'amba lumohuo lemba meloeno, mompari-pari onae mentade ka ilako tepohaweako Ira i Yesu. 51Mesikeno Ira i Yesu ndi onae, ”Hapa anu inehemu ba Kuweweuakomu?” Sumangki mia morawu atuu, ”Guru, ineheku ka kupongkita!” 52Ka Do'amba i Yesu motaeakono, ”Lakomo ikaduduikomo pompe'ala-alamu!” I tempo koa mbo'u atuu onae mongkitaomo, ka i'amba tumonda Ira i Yesu a mpelempaa-Do.
Currently Selected:
I MARAKUSU 10: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
