I MARAKUSU 11
11
Ondae i Yesu tinotowo i Yerusale
11:1-11
(Mat. 21:1-9; Luk. 19:28-38; Yoh. 12:12-15)
1Tempono Ondae i Yesu ka ana guru-Do umpeda Iramo i Yerusale, umpeda i Betipage ka Betania anu po'iangano a Pongku Saitu, Ondae i Yesu tumena ira orua ana guru-Do 2saru pe'oliwi, ”Ilakomo a inia anu i aromiu atuu. Tempono ipewinso i tu'ai, komiu ronga humaweo aasa kalide mongura tinanggo, anu napi hori dompesawikio mia. Ipotolaomo tanggono ka iwawaomo ramai. 3Ka tewala hinao mia anu motaeakomiu: Tembio ka ipoweweu kanatuu, isangkio: Dokereo i Ue. Ira koa ronga mokuleo i ndi'ai.” 4Lumako iramo, ka dohaweo aasa kalide mongura tinanggo i arono pewowa i bungkuno, a wiwi nsala, ka do'amba motolao tanggono. 5Ka ba opia mia i tu'ai mpotaeako ira, ”Hapa tinoomiu motolao tanggono kalide atuu?” 6Ka do'amba sumangki kana Dopauako iramo i Yesu. Onaemo ka dopo'inee ira mia atuudo. 7Ka do'amba wawao kalide atuu ndi Ondae i Yesu, ka domelampiakono sangkado, ka Do'amba i Yesu mesawi i wawono. 8Hadio mia anu mewileo sangkado a nsala, hinao mbo'u anu me'empehiakono sampa-sampano keu da momata anu inalado inso a lere. 9#Pud. 118:26 Mia anu mpelempa i arono ka ondae anu mpetonda inso i bungkuno mpebooli,
”Hosana!
Rinonso Iramo anu hawe a nee-Do i Ue,
10rinonsoomo Poparentaa anu hawe, Poparentaado amato i Daudi,
hosana a mpo'ianga anu i wawono ntu'u!”
11Sahawe-Do i Yerusale mewinso Ira a Raha-Do Ue Ala. I ra'ai Doparesao luwu, sine hangano tamo ronga wongi meluarako Ira lumako i Betania meronga saru hopulu ka orua ana guru-Do.
Ondae i Yesu tumotonaao keu ara
11:12-14
(Mat. 21:18-19)
12Tisomono umari-Do i Yesu ka ana guru-Do mebitao Betenia, Ondae i Yesu mompemokoninggo. 13Ka inso olai Dokitao keu ara anu meleweomo. Dorangkuhio Ira kumitao ba mansa mohawe Ira hapa-hapa a ngkeu atuu. Sine tempono Dohawe i tu'ai, nahi Dopohawe hapa-hapa sangkadio butu leweno, hangano komba tempo pewuaano ara. 14Onaemo ka Dopotaeakono keu atuu, ”Siimo mbo'u maupo te'asa mia mongkaa wuamu ranta nahina tampulaano!” Ka domerongeo mbo'u ana guru-Do.
Ondae i Yesu mokomemporio Raha-Do Ue Ala
11:15-19
(Mat. 21:12-13; Luk. 19:45-48; Yoh. 2:13-16)
15Ka i'amba hawe Iramo i Yesu ka ana guru-Do i Yerusale. Mansa-Do mewinso i Yesu a Raha-Do Ue Ala, mompu'u Iramo sumaari ira mia anu mpo'asa ka mpo'oli a kintalano Raha-Do Ue Ala. Luwuno meda pontobosia doi ka luwuno bangkudo anu mpo'asa marapatii Dowalite ira, 16ka nahi Do'eheako ira mia mewawa ira sangka ntelalo a kintalano Raha-Do Ue Ala. 17#Yes. 56:7; Yer. 7:11 Ka Do'amba paguru ira, Dopotae, ”Kombake hinao teburi: Raha-Ku ta nineeako raha mpekakaiado luwuno tongku? Sine omiu andio impokogagiomo po'iangado mia mporontu!” 18Domerongeo petewawado sando mpesomba ka anu mponto'ori Taura mongkona anu gagi atuu, ka dome'ungkeakono ka dompokopepate Ira, hangano medoito ira ndi Ondae, mengkitao luwuno mia hadio mengkohali-haliakono pompaguru-Do. 19Tamo wongi mpeluarako ira mbo'u inso a ngkota.
Keu Ara anu mokariomo
Patudu-Do i Yesu mongkona pekakai
11:20-26
(Mat. 21:20-22)
20Mo'o-mo'oru tempono Dotelalo i Yesu ka ana guru-Do, domengkitao keu ara hieno mokariomo hawe a luwuno hakano. 21Onaemo ka ipasimpewowoloo i Peturu hapa anu gagiomo, ka i'amba motaeako Ira i Yesu, ”Guru, Ikitaomo, keu ara anu tinotonaa-Miu atuu mokariomo.” 22Dosangki ira i Yesu, ”Pe'ala-ala Iramo Ue Ala! 23#Mat. 17:20; 1Kor. 13:2 Kupauakomiu: Menteeano ba isema motaeakono torukuno andio: Pelimbamo ka tetadiako a laro ntahi! Poolo nahi nanta-nanta aroano, sine ipe'ala-alao, nine hapa anu pinauno atuu ta gagi, asalakono atuu ta gagi ndi onae. 24Onaemo pu'uno ka Kupauakomiu: hapamo koa anu inemamiu ka impekakaiako, impe'ala-alaomo nine imentarimaomo, asalakono mongkona atuu komiu mewineeako. 25#Mat. 6:14 Ka tewala mpentade komiu mpekakai, ime'amampuniomo ari ba mansa hinao kodei aroamiu a mpe'asa miamiu, ka Ondae mbo'u Amamiu i suruga umampunio luwuno salamiu.” [26Sine tewala nahi me'ampunio, asalakono Ondae mbo'u Amamiu anu i suruga nahi Ira umampunio luwuno salamiu.]
Pesikeno mongkona pabawa-Do i Yesu
11:27-33
(Mat. 21:23-27; Luk. 20:1-8)
27Ka Do'amba i Yesu ka ana guru-Do hawe mbo'u i Yerusale. Tempono Dopelempa i Yesu a kintalano Raha-Do Ue Ala, mehawe iramo ndi Ondae petewawado sando mpesomba, anu mponto'ori Taura ka mia memota'u, 28ka dompesikeno ndi Ondae, ”Saru pabawa hapake Ipoweweuako luwuno atuu? Ka isemake anu moweea-Komiu pabawa atuu, ranta ka iweweuo luwuno atuu?” 29Sumangki Ira i Yesu ndi ondae, ”Aku mesikeno aasa rupa ndi omiu. Imesangki Aku ka Ku'amba pauakomiu saru pabawa hapa Kuweweuo luwuno atuu. 30Pobahono i Yohane atuu, inso i suruga ke inso a mia? Imesangki Aku!” 31Dompepau-pauakono pada ondaedo, ka dompotae, ”Tewala mpotae kita: Inso i suruga, Ira motae: Tewala kanatuu, tembio ka nahi impe'ala-alao? 32Sine, komba kita mpotae, Inso a mia!” Hangano medoito ira a mia hadio, hangano luwuno mia mpotae nine i Yohane mentee ntu'u aasa nabi. 33Ka do'amba mesangki Ira i Yesu, ”Nahi kimento'orio.” Onaemo Ondae i Yesu ka Dopotae ndi ondae, ”Tewala kanatuu, nahi Aku mbo'u pauakomiu saru pabawa hapa Kuweweuo luwuno atuu.”
Currently Selected:
I MARAKUSU 11: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
