Mika 6
6
Potuntu-Do i Ue a bawaa-Do
6:1-16
1Rongeomo hapa anu pinau-Do i Ue,
pentademo, pauomo potuntumu i arono luwuno torukuno
ka po'ineeomo luwuno pongku rumongeo pepaumu!
2Rongeomo, oo luwuno torukuno potuntu-Do i Ue,
ka ta'oomo biri, oo luwuno empehino tolino!
Hangano Ondae i Ue hinao potuntu-Do a bawaa-Do,
ka Ondae mekara-kara saru Isaraeli.
3”Bawaa-Ku, hapake anu Kuweweuomo ndi omue?
Saru hapake Kupokomokendoakomu? Sangki Akumo!
4 #
Pel. 4:10-16; 12:50-51; 15:20 Menteeano Ongkuemo anu tumaateko meluarako inso i wita Masiri,
motolako inso a raha tepe'ataa
ka tumenao i Musa wawako,
saru i Haruni ka i Miriami.
5 #
Pod. 22:2–24:25; Yos. 3:1–4:19 Bawaa-Ku, impewowoloomo hapa anu tinoono
i Balaki, mokole i Moabi,
hapa sangkino
i Bilea anano i Beori ndi onae
ka pelempaa inso i Sitimi hawe i Giliga,
ka upokonto'orio luwuno wineweu-Do i Ue anu moleo.”
6”Saru hapake bakanaano kulako me'aro ndi Ondae i Ue
ka menggolontu mesomba ndi Ondae Ue Ala anu a mantandeano?
Asalakono ke aku lumako me'aro ndi Ondae saru pesomba tinunu,
saru ana nsapi anu tinuwuno asa nta'u?
7Dopekonao i Ue ke a nsowuno bimba lakino,
a pulu nsowu lana tinawa?
Asalakono ke kupesombaakono anaku anu aka hangano salaku
ka ana ngkoroiku hangano halaku ongkueku?”
8”Oo mia, umariomo upinauako hapa anu moiko,
ka hapa anu tinuntu-Do i Ue inso ndi omue
umarino melelu moleo, kumekewoio petenunu,
ka tuwu me'urumako i aro-Do Ue Alamu?”
9Rongeomo, Ondae i Ue mebooliakono kota:
Tedoa moiko dumoitoakono nee-Do,
”Rongeomo, oo tongku ka mia a ngkota!
10Kombake a rahano mia mosa'o gauno da hinao arataa mosa'oa
ka ponsa'u efa anu makura ka tetotonaa atuu?
11Nde Aku mokomenteeo ke
pontimba nahi mentee ke kadu-kadu me'ihi watu pontimba anu nahi sompo?
12Luwuno mia mompoli i kota atuu mpoweweu hadio pobobarasaia,
palilino mpegaupi
ka elo a laro ngangado bukeako pompopo'oo.
13Ongkue mbo'u sumepiko ranta mahaki,
lumondahiko hangano halamu.
14Omue komongkaa, sine nahi komowohi,
ka mokoninggoa kongko mpiha ndi omue;
omue komompekaria hapa-hapa, sine nahi upokokaduduio,
ka hapa anu pinokokaduduimu Aku meweengakono a mponai.
15Omue komorawo inii, sine nahi kosumowi,
omue komonsesa wua saitu, sine nahi ko'umurapiakono lana koroimu;
ke monsesa wua anggoro, sine nahi komo'inu anggorono.
16 #
1Mok. 16:23-34; 21:25-26 Omue metakokomo a luwuno pompakosino i Omiri
ka a luwuno wineweuno somborino i Ahabi.
Omue moweweukomo montonda tinoodo,
ranta Kuweweuko gagi londa
ka palilimu gagi pontiiano pomansu;
kanandiomo komiu mentembio pontatado bawaa-Ku.”
Currently Selected:
Mika 6: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
