Mika 5
5
I Mesia ka pongkaduduia Isaraeli
5:1-14
1 #
Mat. 2:6; Yoh. 7:42 Sine omue, hei Beteleme Eparata,
hei anu lalu kodei i olono luwuno suku Yehuda,
inso i olomu ta pine'anaako
asa mia anu ta moparenta i Isaraeli,
anu insoano mompu'uomo i ndi'ipua,
mompu'u tempo i ndi'ipua.
2Onaemo pu'uno dopo'inee ira ka ihaweako tempono
beine anu kontongaano me'ana umariomo me'ana.
Ka i'amba anu susuano inso a luwuno pepaekompono
ira mpepokule a luwuno anano i Isaraeli.
3Onae ta moroso pakambi ira a laro roso-Do i Ue,
a laro langkaino nee-Do Ue Alano;
ira mpo'ia mpiha,
hangano kanandio-andio langkaino pabawa-Do
ta hawe i tompano wawontolino.
4Onae ta gagi rodoa.
Tewala to Asuri mpewinso a witato
ka mpewinsokio luwuno benteto,
kita mpontiso opitu puu mpopakambi umewaio,
maupo oalu petewawado palili.
5 #
Teg. 10:8-11
Ira mensaariakono ponai wita Asuri
ka wita Nimoro mompake ponai pobatuki.
Ira mempotola kita inso a nto Asuri,
tewala dompewinsokio witato ka domelandao po'iangato.
6Toreano inule i Yako ta hina
i olodo hadio tongku
kana tontoru inso ndi Ondae i Ue
kana usa ntiwu-ntiwu a wawo mpinopaho
anu nahi ponsisikori mia
ka nahi pomperorohi a ana manusia.
7Toreano inuleno i Yako ta hina i olodo hadio tongku,
i tonga-tongano hadio tongku
kana singa i olodo kondehora a ntobu,
kana singa mongura i olodo bawaano bembe bimba;
isuamo koa ilako, onae momperangkami ka moberi-beri;
nahina anu motolao.
8Kaemu ta tinande umewai ira taromu,
ka luwuno iwalimu ta pinokotampula!
9Ia tempo atuu,
kanandiomo pau-Do i Ue,
Aku mokotampulao luwuno ngaramu inso i olomiu
ka merawo-rawoo luwuno karetamu.
10Aku mokotampulao luwuno kota i witamu
ka humoao luwuno bentemu.
11Aku mokotampulao luwuno sihiri inso a ngkaemu,
ka luwuno puu mpopau anu nahi manasa ta gagi nami ta hina mbo'u ndi omue.
12Aku mokotampulao luwuno tinaha pesombaamu
ka luwuno tugu pelahumoamu inso ndi omiu.
Omue nami komenggolontu mbo'u mesombaio
wineweuno kaemu.
13Aku butao luwuno karuno lahumoamu inso ndi omiu
ka rumopuo luwuno kota pesombaamu;
14Aku mombalo pontoo
a laro ntekuda ka saru mokulano tekudaku,
a luwuno tongku anu nahi behe momperorongeako.
Currently Selected:
Mika 5: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
