Mika 4
4
Pesintuwudo tongku a poparenta-Do i Ue
4:1-5
1 #
Yes. 2:2-4
Ta gagi a luwuno oleo pokotompa:
Torukuno raha-Do i Ue
ta mentade lumaloio punsuno luwuno torukuno
ka kontasi-tasi mantande i wawono luwuno pongku;
luwuno tongku ira mpetonda-tonda raane,
2”aiwa, tompewuatako a ntorukuno-Do i Ue,
a raha-Do Ue Alano i Yako,
ka Dopaguruakita luwuno sala-Do,
ka tompelempa a nsala-Do;
hangano inso i Sioni ta hawe pompaguru
ka pau-Do i Ue inso i Yerusale.”
3 #
Yoe. 3:10
Ira bitarao hadio tongku,
ka Ira momputusi kara-karado luwuno tongku anu langkai
hawe a mpo'ianga anu olai.
Ira mempaluo ponaido gagi mata mpadeko,
ka kansaido gagi piso pekeru;
tongku nami ira mbo'u mpotande ponai mo'ewai tongku,
ka ondae nami ira mbo'u mpepaguru mpetea.
4 #
Sak. 3:10
Sine ondae singge mia ta mentoro a ntoto keu anggorono
ka a ntoto keu arano nahina anu mompokodoito,
hangano Ondae Ueno luwuakoano anu pauo.
5Maupo luwuno tongku
singge mia melempa a neeno pinesombaino,
kita mpelempa
a nee-Do Ue Alato
kanatuu mpiha ka nahina tampulaano.
Ana beine Sioni ta tinolosi
4:6-14
6A oleo atuu, kanandiomo pau-Do i Ue,
Aku pumpu ira anu luuka,
mo'asa ira anu ntesaari
ka ondae anu Kusolangi iramo.
7Ondae anu luuka Aku mokogagi ira torea anu pinokowo'ohu,
ka ondae anu mensinaari gagi aasa tongku moroso.
Ondae i Ue Ira gagi mokoledo i torukuno Sioni,
mompu'u kanandio-andio ranta nahina tampulaano.
8Omue mbo'u, hei Menara Pebawaano Bimba,
hei Pongku Ana Beine Sioni,
ndi omuemo ta hawe
ka ta mekule poparentaa anu i ndi'ipua,
poparentaa a Ana Beine Yerusale.
9Tembio kanandio-andio ka upebooli meroku?
Nahina ke mokole i tonga-tongamu?
Nde masolaomo ke puu mpopatudumu,
ranta ka umarasai mompemahaki kana beine anu kontongaano me'ana?
10Pemolukimo ka peraepimo,
hei ana beine Sioni, kana beine anu kontongaano me'ana!
Hangano kanandio-andio omue asalakono meluarako inso a ngkota
ka mo'ia i tongampada,
omue asalakono melempa hawe i Babeli.
I ra'aimo omue kopinotola,
i ra'aimo Ira tumolosiko i Ue
inso a ngkaeno iwalimu.
11Kanandio-andio hadio tongku
mpepumpu umewaiko.
Dompotae, ”Po'ineeomo onae isinosa'ai,
po'ineeomo matato mo'ila kumitao Sioni!”
12Sine nahi domento'orio tinoo-Do i Ue;
Nahi dompokonto'orio pomputusi-Do,
nine Ira mempinumpu
kana te'uno gandu a ponsesaa.
13Pentademo ka sesaomo, hei ana beine Sioni,
hangano tandumu Aku weweuo kana labu,
ka kukumu Aku weweuo kana mala,
ranta ka uperawo-rawo ira hadio tongku;
Omue komesusuao rinontudo tia-Do i Ue
ka pompolido tia-Do Ueno asa wawo ntolino.
14Kanandio-andio, omue asalakono wanguo rere watumu;
wala pongkadu dompontadeomo umewai kita;
mompake tuko domposepi
kombisino mia anu moparenta Isaraeli.
Currently Selected:
Mika 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
