Mika 2
2
Pontata a puu mpompokonsii
2:1-11
1Memasola ira ntu'u mia anu mposongka mosa'oa
ka mpoweweu tinoo mosa'o a mpoturiano.
Mansano mewanta towea, domeweweuo,
hangano hinao pabawa a ngkaedo.
2Tewala inehedo lere, domerontuo,
ka luwuno raha, dome'alao.
Domerontuo mia saru rahano,
ka mia saru tia pusakano!
3Onaemo pu'uno kanandiomo pau-Do i Ue:
menteeano, Aku mosongka masolaa
a nsuku andio,
ka nahi komiu mpokoliahakono we'umiu inso a mpasanga atuu.
Nahi komiu mpokompelempa mbo'u mpompelangka-langkai,
hangano tempo atuu onaemo tempo anu mosa'o.
4A oleo atuu mia ira mpompasinggiri mongkona omiu
saru mponsabangi masusa aroa, dompotae,
”Merinawo-rawo kitamo!
Tia pusakado tongkuku melimba ngkaeomo,
kana'umpe ta melimba mbo'u ndi ongkue.
Luwuno lereto mentiniaako a mia anu mentawa kita.”
5Onaemo pu'uno nahi ta hina ndi omue
tia hasilino undi anu sinongkaako koloro
a laro bawaa-Do i Ue.
6”Siimpopau anu ta gagi” dompotae,
”Nahi dompopau anu ta gagi kanatuu!
Mo'o'anua nahi ta umalu kita.”
7Moiko ke mongkona atuu ipinau, hei inuleno i Yako?
Nde nahi sompo ke sabara-Do i Ue?
Kanatuu ke wineweu-Do?
Kombake pauku moiko
a mia anu tuwu moleo?
8Sine mompu'u i ndi'ipua bawaa-Ku mpentade gagi iwali:
i arono imerontuo lemba meloe, sangka tekosi,
inso a mia anu telalo nahina morenggo-renggo,
kana mpekule inso a mpetea.
9Luwuno kombia inso i olodo bawaa-Ku imensaari ira
inso a raha anu kinekewoido;
inso a luwuno nana'ote ime'ala iramo mpiha,
marambaa anu Kuweeako iramo.
10Lakomo pontuturako,
hangano andio komba po'ianga penaa-naaa,
hangano mokoburua anu mompepate,
ka mateano nahi tepomule.
11Ande-andeno asa mia hawe saru hadio mpau mooa ka pegaupi, ipotae,
”Aku mompau anu ta gagi ndi omue mongkona anggoro ka ara,”
ka onaemo anu tekona gagi mia anu mompau anu ta gagi a tongku andio!
Dandi mongkona tekaduduia
2:12-13
12Menteeano Aku pumpu komiu luwu, hei Yako.
Menteeano Aku pumpu ira toreano to Isaraeli;
Aku mo'asao kana asa bawaa bembe bimba a laro kanda,
kana bawaano pinotuwu a ntonga mpadano,
bukeako maroano mia!
13Mia mperumpa ta lumako i arodo;
ira mperumpa ka mpelempa
melaloo pewowa langkai ka mpeluarako inso i tu'ai.
Mokoledo ta melempa mpiha i arodo,
Ondae i Ue petewawano baresido!
Currently Selected:
Mika 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
