Mika 1
1
Puu mpau
1:1
1 #
2Mok. 15:32–16:20; 18:1–20:21; 2Taw. 27:1–32:33 Pau-Do i Ue anu hawe ndi Mika to Moresieti, a tempono i Yonata, i Ahasi ka i Hisikia, luwuno mokole i Yehuda, onaemo mengkena anu kinitano mongkona Samaria ka Yerusale.
Pepopoto'ori hukuno Samaria
1:2-7
2Imerongeomo, hei luwuno tongku!
Impekokoongakono, hei tolino saru ihino!
Po'ineeomo Ondae Ue Ala gagi sakosii ndi omiu,
onaemo Ondae i Ue inso a raha-Do anu mempori.
3Hangano menteeano Ondae i Ue meluarako inso a mpo'ianga-Do
ka metii melempa a wawo luwuno pongkuno tolino.
4Tepe'awuomo luwuno torukuno a ntoto karu-Do,
ka luwuno lembono tebansi
kana gomo i arono api,
kana uwoi te'uwu a pontindulua.
5Luwuno andio gagi hangano pe'ewano i Yako,
ka hangano halado to Isaraeli.
Hapa pe'ewano i Yako atuu?
Kombake atuu Samaria?
Hapa halado to Yehuda?
Kombake atuu Yerusale?
6Onaemo pu'uno Aku weweuo Samaria gagi howuno anu terawo a ntonga mpada,
gagi po'ianga pompahoa keu anggoro.
Aku walundi ira watuno a lembono
ka sumungkeo luwu empehino.
7Luwuno tinahano ta pinuro,
luwuno tambo pebelesuno ta tinunu,
ka luwuno lahumoano Aku rumawo-rawoo;
hangano inso a ntambo pebelesua atuu pinumpu luwu,
ka ta wali gagi tambo pebelesu.
Nabi sumabangio Yehuda ka Yerusale
1:8-16
8Hangano atuu ka kumingki monsabangi ka meraali,
mingki melempa nahina empehino karu ka nahi pelemba,
aku mingki tumoo kana serigala
ka meraali kana manu-manu unta;
9hangano mobelano nahi ta tompa,
haweomo i kota Yehuda,
haweakoomo a mpewowa langkaino tongkuku,
maupo i Yerusale!
10Siimo pohaweo lele i Gati,
siimo ntu'u pengese!
Pewalundimo a laro pampawu i Beti-Le-Apira!
11Lakomo, hei palilino Sapira,
saru kolambe-lambe ka mongkoko'ii.
Palilino Saanani
nahi sapa meluarako,
ponsabangino Beti-Haeseli umonsoiko
mepekadudui i ra'ai.
12Palilino Maroti mensalalaro
ponsikori tepotolaa.
Hangano masolaa metii inso ndi Ondae i Ue
hawe a mpewowa langkai Yerusale.
13Pasaomo ngara a ngkareta mpetea,
hei palilino Lakisi!
Ndiomo pompu'uano halado
a ana beine Sioni,
hangano ndi omuemo ihinawe
pe'ewado to Isaraeli.
14Onaemo pu'uno asalakono omue mompowee ihingkae pensuaa
ndi Moresieti-Gati.
Luwuno rahano i Akasibi
ta gagi pompopo'oo a luwuno mokole i Isaraeli.
15Da Aku mompotii anu mokompetuunduko,
hei palilino Maresia!
Marambano Isaraeli
ta hawe i Adulami.
16Keruomo ka londao ulumu,
hangano luwuno ana mpinehohawamu!
Weweuomo ulumu kana londa uluno manu-manu mongkaa anu mate,
hangano ondae ira melako a pontadia mebintako.
Currently Selected:
Mika 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
