I MATIU 3
3
Yohane Puu Mpobaho
3:1-12
(Mrk. 1:1-8; Luk. 3:3-9, 15-17; Yoh. 1:19-28)
1I tempo atuu haweomo i Yohane Puu Mpobaho i pada i Yudea ka ipontutulu, 2#Mat. 4:17; Mrk. 1:15 ”Intepidimo, hangano Poparenta Nsuruga rangkuomo!” 3#Yes. 40:3Menteeano onaemo anu tinoono nabi Yesaya tempono ipotae,
”Hinao suarano mia anu meboo-booli i pada one:
Patindao sala tia-Do i Ue,
pokomoleoako Ira sala-Do.”
4 #
2Mok. 1:8; Mrk. 1:6 I Yohane mesangkaako lemba meloe inso a wulu unta, ka boo-boono kuli ka kaangano io kosume ka siu hoani. 5Ka mehawe iramo ndi onae palili inso i Yerusale, inso i asa wawowita Yudea ka inso a luwuno wita i wiwi ngkoro Yarade. 6Ka do'amba memangakuakono halado ibaho ira i Yohane a ngkoro Yarade.
7Sine tempono ikitao hadio ira to Parisi ka to Saduki me'aiwa ira mpepebaho, ipotaeako ira, ”Hei omiu inuleno ule me'ipo. Isemake pauakomiu, nine komiu mpokompolai inso a tekuda anu ta hawe? 8Gaagi impoluarakomo wua anu menunu saru tepidia. 9#Luk. 3:8; Yoh. 8:33 Ka si mpotae, nine komiu mpokompotae ilaro aroamiu: i Burahima ama mami! Hangano kupauakomiu: Ondae Ue Ala polio mokogagio anano i Burahima inso a watu andiodo! 10#Mat. 7:19; Luk. 3:9 Uase tepatindaomo a hakano keu ka sompo keu anu nahi pewua moiko, manasa tinuehi ka tinadi a api. 11Kubahoakomiu uwoi gagi tondonino tepidia, sine Ondae anu hawe lembui umarino ongkue pabawa Irapo sekono ongkue ka nahi pototoku lumohuo sapatu-Do. Ondae Ira bahoakomiu Penaa Mempori ka saru api. 12Poduku kongkoomo a ngkae-Do. Ira mokomorinao ponsesaa-Do ka pumpuo gandu-Do a laro nsi'e, sine awuno seami atuu Ira tumunuo a laro api anu nahi pinokompepate.”
I Yohane baho Ira i Yesu
3:13-17
(Mrk. 1:9-11; Luk. 3:21-22; Yoh. 1:32-34)
13Ka hawe Iramo i Yesu inso i Galilea lumako a ngkoro Yarade ndi Yohane ka ibaho Ira. 14Sine i'onto Ira i Yohane, ipotae, ”Omiumo anu asalakono baho aku ka Omiu anu aiwa ndi ongkue?” 15Ka do'amba sumangki i Yesu, Dopotaeakono, ”Po'ineeomo ka igagi mongkonatuu, hangano kanandiomo anu tekona to'ihiio luwu po'ehe-Do Ue Ala.” Ka itondaako Iramo i Yohane. 16Umari-Do binaho, Ondae i Yesu ronga me'engka inso a uwoi ka itempo mbo'u atuu langi te'ungkahi ka Dokitao Penaa-Do Ue Ala kana manu-manu marapatii, metii i wawo-Do. 17#Teg. 22:2; Pud. 2:7; Yes. 42:1; Mat. 12:18; 17:5; Luk. 9:35 Ka i'amba terongeomo suara inso i suruga anu motae, ”Ndiomo Ana-Ku anu pinehohawa-Ku. Onaemo mokomawongko Aku.”
Currently Selected:
I MATIU 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
