I MATIU 2
2
To majusi inso i sabaano oleo
2:1-12
1Umari-Do pine'anaako i Yesu i Beteleme i wita Yudea itempono mokole Herode, mehawe iramo to majusi inso i sabaano oleo melako i Yerusale 2ka mpesisikeno, ”Isua Iramoke, mokoledo to Yahudi anu da iaopo Dohina atuu? Kimengkitaomo buntala-Do isabaano oleo ka kami mehawe mesombai Ira.” 3Tempono irongeo mokole Herode mongkona atuu tededengkeomo onae saru luwuno mia i Yerusale. 4Ka ipumpu iramo luwu petewawado sando mpesomba ka anu ponto'ori Taurado to Yahudi, ka i'amba mesikeno ndi ondae, ba isua Ira pine'anaako i Mesia. 5Dompotaeakono, ”I Beteleme i wita Yudea, hangano kanandio hinao binuri a laro wuntado nabi: 6#Mik. 5:1Ka omue Beteleme, wita Yahuda, komba omuemo anu lalu kodei i olodo anu moparenta i Yahuda, hangano inso ndi omue ta mesabaako asa mia petewawa, anu ta pakambi ira bawaa-Ku to Isaraeli.” 7Ka i'amba i Herode memaro-maro moboi ira to majusi atuudo ka ipenootio sumikeno ira, indi'ipia i kinita buntala atuu. 8Ka i'amba tumena ira melako i Beteleme, ipotae, ”Imelakomo ka ipepenteeo ntu'u, mongkona nana'ote atuu ka tewala imehaweomo impompari-pari mempaua kune ka ku'aiwa ngkuda mesombai Ira.” 9Mansado merongeo luwuno pauno mokole atuu, mpelungka iramo. Ka kitaomo, buntala anu kinitado i Sabaano Oleo atuu sume'elungi ira ranta hawe ka ipenaa-naa iwawono pepontuno po'iangano nana'ote atuu. 10Tempono domengkitao buntala atuu, tedoa ira memawongko. 11Ka mpewinso iramo i laro raha atuu, ka mengkitao nana'ote atuu saru i Maria, ine-Do, ka do'amba mpenggolontu mpesombai Ira. Ondae mbo'u me'ungkahio ponaapa arataado ka dompesombaakono pesomba ndi Ondae, onaemo io wulaa, dupa ka mire. 12Ka hangano pinopoto'oriako a laro mo'ipi, kasi dompekule ndi Herode, onaemo ka dompekule i iniado mpontonda sala susua.
Polaia i wita Masiri
2:13-15
13Mansado mpelungka to majusi atuudo, tengkitaomo mala'eka-Do i Ue ndi Yusupu a laro mo'ipi ka ipotae, ”Pewangu, alaomo Nana'ote atuu saru ine-Do, polaimo i wita Masiri ka po'iamo i ra'ai hawe ka Kupepau ndi omue, hangano I Herode umungkeo Nana'ote atuu ta mepateo.” 14Ka mewanguomo i Yusupu, i alao Nana'ote atuu saru ine-Do wongi koa atuu, ka i'amba molai i wita Masiri, 15#Hos. 11:1 ka mo'ia i ra'ai ranta ka imate i Herode. Gagiomo kanatuu, ka ite'inihii anu pinau-Do i Ue molalo nabi, ”Inso i wita Masiri Kupoboio Ana-Ku.”
Pompepatea nana'ote i Beteleme
2:16-18
16Mansano tumo'orio i Herode, nine domempopo'oo to majusi atuudo, onae tedoa tekuda. Ka i'amba metena mepate ira luwu nana'ote i Beteleme ka petengi-tengino, onaemo nana'ote anu tinuwuno napi sompo orua nta'u, menunu saru tempo anu pinokonto'orino inso a to majusi atuudo. 17Kanandiomo i inihii pau-Do i Ue anu pinohaweno nabi Yeremia, 18#Yer. 31:15 ”Terongeomo suara i Rama, pengese ka ponsabangi anu tedoa mompemasusa; i Raheli mengesei ira anano nahi behe itinarero, hangano nami domekongko mbo'u.”
Mekule inso i wita Masiri
2:19-23
19Mansano mate i Herode, tengkitaomo mala'eka-Do i Ue ndi Yusupu a laro mo'ipi i wita Masiri, ipotae, 20”Pewangumo, alao Nana'ote atuu saru ine-Do, ka pelungkamo lumako i wita Isaraeli, hangano ondae anu mingki mepateo Nana'ote atuu mateomo.” 21Ka i'amba mewanguomo i Yusupu, i alao Nana'ote atuu saru ine-Do ka domelako i wita Isaraeli. 22Sine mansano rumongeo, nine i Arakelau gagi mokole i Yehuda umeuo i Herode, amano, onae doito lumako raane. Hangano ipinauako a laro mo'ipi, lumakoomo i Yusupu i wita Galilea. 23#Mrk. 1:24; Luk. 2:39; Yoh. 1:45 Sahaweno i ra'ai, onae mo'iaomo i asa kota anu meneeako Nasare. Gagiomo kanatuu ka ite'ihiimo pau-Do i Ue anu pinohawedo nabi, nine Ondae Ira pinau to Nasare.
Currently Selected:
I MATIU 2: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
