I MATIU 4
4
Po'ara-arahakoa i pada one
4:1-11
(Mrk. 1:12-13; Luk. 4:1-13)
1 #
Ibr. 2:18; 4:15 Ka Ondae i Yesu Dowawa ira Penaa i pada one ka i'ara-arahako Ira i Mosa'o. 2Ka umari-Do mepuasa, patopulu oleo ka patopulu wongi, poko'ariano mokoninggo Iramo i Yesu. 3Ka i'amba haweomo puu po'ara-arahako atuu, ka ipotaeako Ira, ”Tewala Omiu Ana-Do Ue Ala, parenta iramo watu andiodo gagi roti.” 4#Win. 8:3; Luk. 4:4 Sine sumangki Ira i Yesu, ”Hinao teburi: Mia tuwu komba butu inso a roti, sine a sompo pau anu meluarako inso a nganga-Do Ue Ala.”
5Ka i'amba i Mosa'o wawa ira a Ngkota Mempori ka numaa Ira a mbumbungeno raha-Do Ue Ala, 6#Pud. 91:11-12; Luk. 4:10-11 ka i'amba motaeako Ira, ”Tewala Omiu Ana-Do Ue Ala, Ipedontaihakomo loane, hangano hinao teburi: Mongkona Omiu Ira parentao mala'eka-Do ka ira menseneko-Miu a wawo ngkaedo, ka si tetengku karu-Miu a watu.” 7#Win. 6:16; Luk. 4:12 Dopotae i Yesu ndi onae, ”Hinao mbo'u teburi: Si ara-arahako Ira Ue, Ue Ala-mu!” 8Ka i Mosa'o wawa Ira mbo'u a wawontorukuno anu tedoa ondau ka mopokitaako Ira luwuno poparentaa ntolino saru marambano, 9ka ipotaeako Ira, ”Luwuno atuu aku weea-Komiu, tewala menggolontu Komiu mesombai aku.” 10#Win. 6:13; Luk. 4:8 Ka motae Ira i Yesu ndi onae, ”Polaimo, Mosa'o! Hangano teburi: Omue asalakono mesombai Ira Ue, Ue Alamu, ka butu ndi Ondae upesomba.” 11Ka i'amba i Mosa'o binta Ira, ka kitaomo, hadio mala'eka mehawe mekakaako Ira i Yesu.
Ondae i Yesu hawe i Galilea
4:12-17
(Mrk. 1:14-15; Luk. 4:14-15)
12 #
Mat. 14:3; Mrk. 6:17; Luk. 3:19-20 Sine tempono Dorongeo i Yesu, nine i Yohane rinakoomo, meliahako Iramo lumako i Galilea. 13#Yoh. 2:12 Dobintao Nasare ka Dopo'ia-ia i Kapenau, a wiwino rano, a witano i Sebulo ka i Napatali, 14ka ite'ihiimo pau-Do Ue Ala, anu pinohaweno nabi Yesaya,
15 #
Yes. 8:23–9:1
”Witano i Sebulo ka witano i Napatali, sala lumako a ntahi, wita i asatowano korono Yarade, i Galilea, witado tongku anu susua, –
16Tongku anu mpo'ia a laro wongi-wongiano, pongkita iramo mewine anu langkai, ka ndi ondae anu mpo'ia i inia anu inengomino matea, mesabaakoomo Mewine.”
17 #
Mat. 3:2; Mrk. 1:15 Mompu'u tempo atuu Dopaleleo i Yesu, ”Tepidimo, hangano Poparenta Nsuruga rangkuomo!”
Ondae i Yesu mompoboi ana guru anu amba-ambano
4:18-22
(Mrk. 1:16-20; Luk. 5:1-11)
18Ka tempono Ondae i Yesu melempa tumondao wiwino Rano Galilea, Dokitao orua mia mepaekompo, onaemo i Simo anu nineeako i Peturu ka i Andarea, pepaekompono. Kontongaado pontende buanido a rano, hangano ondae puu mpobuani bou. 19Motae Ira i Yesu ndi ondae, ”Aiwa, tonda Akumo, ka Aku mokogagi komiu puu mpobuani mia.” 20Ka i'amba mompari-pari iramo bintao buanido ka dotonda Ira. 21Ka mansa-Do lumako i Yesu inso i ra'ai, Dokitaomo mbo'u orua mia mepaekompo, onaemo i Yakobu anano i Sebedeu ka i Yohane pepaekompono, saru amado i Sebedeu, kontongaado mpokomoikoo buanido a laro bangka. Dopoboi ira i Yesu 22ka mompari-pari iramo bintao bangkado saru amado, ka do'amba tumonda Ira.
Ondae i Yesu mompaguru ka mompokotompa hadio mia
4:23-25
(Luk. 6:17-19)
23 #
Mat. 9:35; Mrk. 1:39 Dotanggoliliomo i Yesu luwu wita i Galilea; Ondae mompaguru a laro luwuno raha tepumpua ka paleleo Lele Mawongkoa poparentaa-Do Ue Ala saru mokotampulao luwuno haki ka molemaa i olodo tongku atuu. 24Ka tepalele iramo i asa wawo wita Siria ka mewinawa iramo luwuno mia anu nahi moiko teweweudo, anu memarasaiako mperupa-rupa haki ka tebobarasaia, anu pinewinsokino onitu nsa'o, anu matewula ka anu puungku, ka Do'amba i Yesu mokotompa ira. 25Ka mia hadio ntehuhu tumonda Ira. Ondae me'aiwa inso i Galilea ka i Dekapoli, inso i Yerusale ka inso i Yudea ka inso i asatowano koro Yarade.
Currently Selected:
I MATIU 4: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
