I MATIU 26
26
Pompopoto'ori kopepantono mongkona tebobarasaia-Do i Yesu – Tinoo mepate Ira i Yesu
26:1-5
(Mrk. 14:1-2; Luk. 22:1-2; Yoh. 11:45-53)
1Mansano umari atuu luwuno pompaguru-Do i Yesu, mepau Iramo a ana guru-Do, 2#Pel. 12:1-27”Imento'orio, nine orua oleopo ta riname-rame oleo Pasa, ka i Ana Manusia Ira pineweengako ka Ira pinaso a ngkeu pinotamba.”
3I tempo atuu mpepumpu iramo petewawado sando mpesomba ka mia memota'udo tongku Yahudi a langkanaeno Sando Mpesomba Langkai anu meneeako i Kayapa, 4ka donterisoakono aasa tinoo mpe'akala ka domerako Ira i Yesu ka mepate Ira. 5Sine dompotae, ”Osi'i a tempo porame-ramea, ka si gagi tegagaa i olodo palili.”
Ondae i Yesu inurapi
26:6-13
(Mrk. 14:3-9; Yoh. 12:1-8)
6Tempono Ondae i Yesu kongko i Betania, a rahano i Simo mia haki ngkuli mesaki, 7#Luk. 7:37-38 aiwaomo aasa beine ndi Ondae mowawa aasa pido-pido puala mina-mina anu masuli olino. Mina-mina atuu itawao a wawo ulu-Do i Yesu, anu tekonai mentoro mongkaa. 8Kumitao atuu ntekuda iramo ana guru ka dompotae, ”Pombio ponsosalaa andio? 9Hangano lana atuu ba i'inasa masuli olino ka doino domewineeako mia memongkokolaro.” 10Sine Doto'orio i Yesu pinewowolodo ka Dopotae, ”Tembio ka impokomasusao beine andio? Hangano onae moweweuomo aasa wineweu anu moiko ndi Ongkue. 11#Win. 15:11Hangano mia memongkokolaro kongko ira mpiha ndi omiu, sine Ongkue nahi Aku merongaakomiu mpiha. 12Hangano itawao lana atuu a ngkoroi-Ku, iweweuomo aasa pepatinda a mpekaburua-Ku. 13Kupauakomiu: Menteeano isuamo koa Lele Mawongkoa andio ipinalele i asa wawontolino, hapa anu wineweuno beine andio ta pinau mbo'u ka irinorambe.”
I Yudasi umasa Ira i Yesu
26:14-16
(Mrk. 14:10-11; Luk. 22:3-6)
14Ka i'amba lumakoomo asa mia inso a hopulu ka orua ana guru atuu, anu meneeako i Yudasi to Karioti, a mpetewawado sando mpesomba. 15Ipotae, ”Hapa anu komiu mpoweeakune, ka kupeweengako Ira ndi omiu?” Dome'owahio ndi onae tolu pulu doi salaka. 16Ka mompu'u i tempo atuu i'ungkeo tempo anu moiko ka ipeweengako Ira i Yesu.
Ondae i Yesu mongkaa Pasa saru ana guru-Do
26:17-25
(Mrk. 14:12-21; Luk. 22:7-14, 21-23; Yoh. 13:21-30)
17A oleo amba-ambano inso a oleo langkai Roti Nahi Peragi me'aiwa iramo ana guru-Do i Yesu ndi Ondae ka dompotae, ”Isua po'ehe-Miu kimpopatindaa-Komiu pelimbua Pasa?” 18Sumangki Ira i Yesu, ”Imelakomo a ngkota ndi Anu ka pauakono: Pe'oliwi-Do Guru: tempo-Ku tamo ronga hawe; a rahamumo Aku rumame-rameo Pasa merongaako ira ana guru-Ku.” 19Ka do'amba meweweuo ana guru kana anu Dotenaako ira i Yesu ka mpopatinda Pasa.
20Mansano wongi, Ondae i Yesu mentoro mongkaa merongaako ira hopulu ka orua ana guru atuu. 21Ka tempono kontongaado mpongkaa, Dopotae, ”Kupauakomiu, menteeano asa mia i olomiu ta meweenga-Kune.” 22Ka saru aroa anu tedoa mpompemasusa mpotae iramo nte'o'asa mia ndi Ondae, ”Komba ongkue, oo Ue?” 23#Pud. 41:10Sumangki Ira, ”Onae anu merongaa-Kune umemoo kaeno a sempe andio, onaemo anu ta meweenga-Kune. 24I Ana Manusia lano Ira lumako menunu saru anu teburi mongkona Ondae, sine masolaomo mia anu hangano onae ka Dopineweengako i Ana Manusia atuu. Moikoopo mia atuu ba nahi pine'anaako.” 25I Yudasi, anu ta meweengako Ira atuu sumangki, ipotae, ”Komba ongkue, oo Guru?” Dopotae i Yesu ndi onae, ”Omuemo anu pauo.”
Pompakosia pelimbua wongi
26:26-29
(Mrk. 14:22-25; Luk. 22:15-20; 1Kor. 11:23-25)
26Ka tempono kontongaado mpongkaa, Do'alao i Yesu roti, ka Doronsoo, sumiba-sibao ka Do'amba weeako ira ana guru-Do ka Dopotae,”Alaomo, kaanomo, ndiomo koroi-Ku.” 27Umarino atuu Do'alao tonde, ka Dopo'unde-unde ka Do'amba weeako ira ka Dopotae, ”Ime'inuomo, luwumiu, inso a tonde andio. 28#Pel. 24:8; Yer. 31:31-34Hangano onaemo andio rea-Ku, rea pedandia, anu inuwuako hadio mia gagi po'onini hala. 29Sine Kupauakomiu: mompu'u kanandio-andio nahi Aku mo'inu mbo'u hasilino keu anggoro andio hawe a oleo ka Ku'inuo, onaemo anu wo'ohu merongaakomiu a laro Poparentaa-Do Ama-Ku.”
I Peturu ta humapu Ira i Yesu
26:30-35
(Mrk. 14:26-31; Luk. 22:31-34; Yoh. 13:36-38)
30Umari mpenaniako penani po'unde-unde, lumako Iramo i Yesu ka ana guru-Do a Pongku Saitu.
31 #
Sak. 13:7
Ka motae Iramo i Yesu ndi ondae, ”Wongi andio luwumiu ta telelu pompe'ala-alamiu hangano Ongkue. Hangano hinao teburi: Aku mepateo puu mpompakambi ka bawaano bimba atuu ira ntesiarawo. 32#Mat. 28:16 Sine umari-Ku mewangu, Aku mese'elungi komiu lumako i Galilea.” 33Sumangki i Peturu, ”Maupo luwudo telelu pompe'ala-alado hangano Omiu, ongkue naahi ntu'u.” 34Dopotaeakono i Yesu, ”Kupauakomu, menteeano wongi andio, napi kokoroido manu, pentolumo uhapu Aku.” 35Motae i Peturu ndi Ondae, ”Maupo kumate merongaa-Komiu, nahi aku humapu Komiu.” Luwuno ana guru mbo'u anu susua mpotae mbo'u kanatuu.
I bonde Getisemani
26:36-46
(Mrk. 14:32-42; Luk. 22:39-46)
36Ka hawe Iramo i Yesu mperonga ana guru-Do i asa mpo'ianga anu meneeako Getisemani. Ka Do'amba motaeako ira ana guru-Do, ”Impentoromo i ndi'ai, kontongaa-Ku lumako mekakai i ra'ai.” 37Ka Dowawao i Peturu saru orua ira anano i Sebedeu merongaako Ira. Ka mompu'u Iramo mompemasusa ka mondidi-ndidi, 38ka Do'amba motaeako ira, ”Tedoa masusa aroa-Ku, kana mingki akumo mate. Impo'iamo i ndi'ai ka impetangkoromo saru Ongkue.” 39Ka Dopelelaako tedei, ka Do'amba menggolontu mesomba ka mekakai, Dopotae, ”Oo Ama-Ku, ba mansa Ipemoikoo, po'ineeomo tonde andio ka itelalo inso ndi Ongkue, sine siimo kana po'ehe-Ku, tendeano kana po'ehe-Miu.” 40Umarino atuu mekule Ira a ana guru-Do ka Dohawe ira kontongaado mpoturi. Ka Dopotaeakono i Peturu, ”Nahi mempolioke mpetangkoro te'asa langku saru Ongkue? 41Impetangkoromo ka impekakaimo, ka si ntedonta a mpo'ara-arahakoa: penaa lano metonda, sine koroi molema.” 42Ka Do'amba lumako anu kompenduano ka Dopekakai, Dopotae, ”Oo Ama-Ku tewala nahi pemoikoo tonde andio itelalo, sangkadio ba Ku'inuo, ka igagimo po'ehe-Miu!” 43Ka tempono Dopekule mbo'u, Dohawe ira kontongaado mpoturi, hangano matado mobeaomo. 44Dopo'inee ira i tu'ai ka Do'amba lumako ka mekakai anu kopentoluno ka Dopekakaiako onae koa mbo'u atuu. 45Umarino atuu aiwa Ira a ana guru-Do ka Dopotaeako ira, ”Kanandio-andio impoturimo ka impenaa-naamo. Kitao, tempono haweomo, nine i Ana Manusia pineweengako a ngkaedo mia ntehala. 46Impewangumo, aiwamo ka tomelako. Onae anu meweenga-Kune umpedaomo.”
Ondae i Yesu rinako
26:47-56
(Mrk. 14:43-50; Luk. 22:47-53; Yoh. 18:1-11)
47Da kontongaa-Do mepau i Yesu haweomo i Yudasi, asa mia inso a hopulu ka orua ana guru atuu, ka meronga saru onae asa bawaa langkai mia mpowawa ponai ka pontunduhi, tinenano petewawado sando mpesomba ka mia memota'uno tongku Yahudi. 48Mia anu meweengako Ira umariomo pauako ira petondoni andio, ”Mia anu aku woo-wooo, Ondaemo atuu, imerako Iramo.” 49Ka montuturakoomo lumako tepohaweako Ira i Yesu ka ipotae, ”Tabe Guru.” Ka i'amba woo-woo Ira. 50Sine Dopotaeakono i Yesu, ”Hei Sambe'e, onaemoke u'aiwaako?” Ka me'aiwa iramo me'ini Ira i Yesu ka domerako Ira. 51Sine asa mia anu tumonda Ira i Yesu i weroo kaeno, butao ponaino ka ipesaleakono a atano Sando Mpesomba Langkai ranta te'opu birino. 52Onaemo ka Dopotaeakono i Yesu, ”Winsoomo ponai atuu a tampino, hangano ba isema mompake ponai, ta mateako ponai. 53Ke potaemu, nine nahi Aku polio mebooli ndi Ondae Ama-Ku, ka Doronga montena torea hopulu ka orua bawaa mala'eka mokowali Aku? 54Tewala kanatuu, kana'umpe ta inihii anu binuri a Wunta Mempori, anu motae, nine asalakono gagi kanandio?” 55#Luk. 19:47; 21:37 I tempo atuu Ondae Dopotae i Yesu a mia hadio, ”Potaemiu Ongkue andio puu mporontu, ka ime'aiwa merako Aku sompo saru ponai ka pontunduhi? Kahinaano sompo-sompo oleo Kupentoro mompaguru a Raha-Do Ue Ala, ka nahi merako Aku. 56Sine luwuno andio gagi ka i'inihii anu hinao binuri a wuntado nabi.” Ka do'amba ana guru atuudo binta Ira ka dompolai.
Ondae i Yesu i arono Puu Mpobitara Agama
26:57-68
(Mrk. 14:53-65; Luk. 22:54-55, 63-71; Yoh. 18:12-14, 19-24)
57Umarido merako Ira i Yesu, domewawa Ira i arono i Kayapa, Sando Mpesomba Langkai. I tu'ai mpepumpu iramo anu mponto'ori Taura ka mia memota'u. 58Ka i Peturu tumonda ntoe Ira hawe a kintalano Sando mpesomba Langkai, ka mansano mewinso i larono, onae mentoro i olodo anu mpodagai ka ikitao poko'umariano kara-kara atuu.
59Luwuno petewawado sando mpesomba, tendeano luwuno Puu mpobitara mpo'ungke sakosii megaupi umewai Ira i Yesu, ka dompokohuku mate Ira, 60sine nahi dompohawe, maupo hadio anu mpentade mposakosii megaupi. Sine poko'ariano mentade iramo orua mia, 61#Yoh. 2:19anu motae, ”Mia andio motae: Aku mokobetao Raha-Do Ue Ala ka wali wanguo i larono otolu oleo.” 62Ka i'amba Sando Mpesomba Langkai atuu mentade ka ipotaeako Ira, ”Nahi Kosumangkioke luwuno pontulurido sakosii andio ndi Omue?” 63Sine Ondae i Yesu komino mpiha. Ka i'amba motae Sando Mpesomba Langkai atuu ndi Ondae, ”A nee-Do Ue Ala anu tuwu, pauakamimo, ba Omue i Mesia, Ana-Do Ue Ala, ke naahi.” 64#Dan. 7:13Sumangki Ira i Yesu, ”Ipauomo. Sine, Kupauakomiu, mompu'u kanandio-andio komiu mengkitao i Ana Manusia mentoro i koana-Do Anu Tedoa Pabawa ka aiwa a wawo nseru i langi.” 65#Ima. 24:16Onaemo ka berio Sando mpesomba Langkai atuu sangkano ka ipotae, ”Ipepaukiako Ira Ue Ala. Pombio kita mpokere mbo'u sakosii? Kanandio-andio imerongeomo ipepaukiako Ira. 66Kana'umpe pohawemiu?” Mesangki ira ka dompotae, ”Onae asalakono hinuku mate!”
67 #
Yes. 50:6
Ka do'amba me'onuio rupa-Do ka mentidu Ira; mia susua mentunduhi Ira, 68ka dompotae, ”Kuri'a pauakami, hei Mesia, isemake anu tumunduhi-Ko?”
I Peturu humapu Ira i Yesu
26:69-75
(Mrk. 14:66-72; Luk. 22:56-62; Yoh. 18:15-18, 25-27)
69Tempo atuu i Peturu mentoro i bungkuno kintala. Ka aiwaomo asa ata beine ndi onae, ipotae, ”Omue mbo'u wela merongaako Ira i Yesu, to Galilea atuu.” 70Sine onae mehapu i arodo luwuno mia, ipotae, ”nahi kuto'orio, hapa anu tinoomu.” 71Tempono ilako a mpewowa langkai, asa ata susua kumitao ka ipotaeako ira mia anu mekongko i tu'ai, ”Mia andio merongaako Ira i Yesu, to Nasare atuu.” 72Ka ihapuo mbo'u saru mesumpa, ”Nahi kuto'orio mia atuu.” 73Nahi tehine lembuino mia anu mekongko i tu'ai me'aiwa ndi Peturu ka dompotae, ”Manasa omue mbo'u asa mia inso ndi ondae, mengkaa atuu inso a mpepaumu.” 74Ka mompu'uomo i Peturu montotonaa ka ipesumpa, ”Nahi kuto'orio mia atuu.” Ka i tempo atuu kumokoroidoomo manu. 75Onaemo ka irambeo i Peturu hapa anu pinau-Do i Yesu ndi onae, ”Napi kumokoroido manu, pentolumo uhapu Aku.” Ka i'amba lumako i bungkuno ka ipengese mompemasusa.
Currently Selected:
I MATIU 26: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
