I MATIU 25
25
Ana beine anu mempande mposongka ka ana beine anu memonge-monge
25:1-13
1 #
Luk. 12:35
”I tempo atuu mongkona Poparentaa Suruga pinotundaako hopulu ana beine, anu mpo'ala huludo ka domelako mpototowo umbu ngkoroi tama. 2Olima i olodo monge-monge ka olima pande mposongka. 3Ana beine anu memonge-monge atuu mpowawa huludo, sine nahi dompowawa lana, 4sine ana beine anu mempande mposongka atuu mpowawa huludo ka lana mbo'u a mpido. 5Sine hangano umbu ngkoroi atuu tehine nahi liu hawe, memongkokoturi iramo ranta ka dontekoturi. 6Tempono porontonga wongi terongeomo suarano mia mebooli: Haweomo umbu ngkoroi! Imentotowo iramo! 7Mpewangu iramo luwu ana beine atuudo ka do'amba mempatindao huludo. 8Ana beine anu memonge-monge mpotaeako ira ana beine anu mepande mposongka: Impowee kami tedei lanamiu atuu, hangano hulumami tamo ronga mate. 9Sine mesangki ira ana beine anu mempande mposongka atuu: Naahi, te'ingka nahi sompo tiamami ka tiamiu. Moikoopo imelako a mia mpo'asa lana ka impo'oli i tu'ai. 10Sine, tempono dontepusa melako mpo'oli, haweomo umbu ngkoroi atuu ka ondae anu ntetinda iramo mpewinso mperonga saru onae a bolongko pelimbua petaoa, ka i'amba tinondo pewowa. 11#Luk. 13:25 Umarino atuu mehawe iramo mbo'u ana beine anu susua atuu ka dompotae: Ue, ue, i'ungkahiakami tondo! 12Sine sumangki: Kupauakomiu, menteeano nahi kuto'ori komiu. 13Onaemo pu'uno, impetangkoromo, hangano nahi imento'orio oleo maupo tempono.”
Potundaano mongkona talenta
25:14-30
(Luk. 19:12-27)
14”Hangano mongkona Poparentaa Suruga mengkena kana asa mia anu ta lumako a wita susua, anu moboi ira atano ka me'ala-alaako ira arataano ndi ondae. 15Anu asa mia iweeakono olima talenta, anu asa mia mbo'u orua ka anu asa mia mbo'u aasa, singge mia montonda pinolino, ka i'amba melungka. 16Mompari-pariomo lumako ata anu montarima olima talenta atuu. Ipebalu-baluakono doi atuu onaemo ka ipohawe tetiangino olima talenta. 17Ata mbo'u anu montarima orua talenta atuu moweweu mbo'u kanatuu ka mohawe tetiangino orua talenta. 18Sine ata anu montarima aasa talenta atuu lumako ka ipongkeke wita ka i'amba wunio doino ueno. 19Tehine umarino atuu mekuleomo uedo ata atuu ka do'amba mpereke. 20Ata anu montarima olima talenta atuu aiwa ka iwawao tetiangino olima talenta, ipotae: Ue, olima talenta ipe'ala-alaakune; kitao, mohawe akumo tetiangino olima talenta. 21Onaemo ka ipotae ueno atuu ndi onae: Moiko ntu'u wineweumu atuu, hei ataku anu moiko ka metenunu; metenunukomo a wineweu kodei, aku me'ala-alaakomu anggaa anu langkai. Pewinsomo ka petondamo a me'uraano uemu. 22Ka i'amba aiwaomo ata anu montarima orua talenta atuu, ipotae: Ue, orua talenta ipe'ala-alaakune; kitao, mohawe akumo tetiangino orua talenta. 23Onaemo ka ipotae ueno atuu ndi onae: Moiko ntu'u wineweumu atuu, hei ataku anu moiko ka metenunu, metenunukomo montembi anggaa anu kodei, aku me'ala-alaakomu anggaa anu langkai. Pewinsomo ka petondamo ame'uraano uemu. 24Ndio aiwaomo mbo'u ata anu montarima aasa talenta atuu ka ipotae: Ue, kuto'ori komiu nine omiu mia anu lambaha anu sumowi inso a mpo'ianga anu komba rinawomiu ka mopumpu inso a mpo'ianga anu komba pinahomiu. 25Onaemo pu'uno ka kudoito ka kulako wunio talentamiu atuu a laro wita: ndio, itarimaomo arataamiu! 26Onaemo ka isangki ueno atuu: Hei omue, ata anu mosa'o ka moluwe, gagi uto'oriomo, nine sumowi aku a mpo'ianga anu komba rinawoku ka mopumpu inso a mpo'ianga anu komba pinahoku? 27Onaemo pu'uno tekonaano doiku atuu ka uweeako ira mia anu mpopesaboako doi, nde ba kupekule ka kutarimao saru tetiangino. 28Onaemo pu'uno alaomo talenta atuu inso ndi onae ka weeakono mia anu hopulu talentano atuu. 29#Mat. 13:12; Mrk. 4:25; Luk. 8:18 Hangano sompo mia anu hinao, ndi onae ta pinowee, ranta ka ihadio ntu'u. Sine isema anu nahina, maupo hapamo koa anu hina ndi onae ta inala inso ndi onae. 30#Mat. 8:12; 22:13; Luk. 13:28 Ka petadiakonomo ata anu nahi mentudu atuu a laro wongi-wongia anu wongi mpusu. I ra'aimo ta hina ponsabangia ka ke'ingisia.”
Pobitaraa pokotompa
25:31-46
31 #
Mat. 16:27; 19:28 ”Tewala hawe Ira i Ana Manusia a laro maramba-Do ka luwuno mala'eka mperongaako Ira, ka Ira mentoro a wawo ngkadera marambaa-Do. 32Ka i'amba luwuno tongku ira mepinumpu i aro-Do ka Doponsia ira nte'o'asa mia, mengkena kana puu mpompakambi monsia ira bimba inso a bembe, 33ka Ira numaao bimba i koana-Do ka bembe i manggali-Do. 34Ka Mokole atuu ta motae ndi ondae anu i koana-Do: Ime'aiwa, hei omiu anu rinonso-Do Ama-Ku, imentarimaomo Poparentaa anu Kupatindaakomiumo mompu'u ipinokogagi wawontolino. 35Hangano tempono Kumokoninggo, imempaka Aku; tempono kumokoranga, impopo'inu Aku; tempono Ongkue mia hawe, impetotoka Aku; 36tempono Kukolambe-lambe, impoposangka Aku; tempono Kumahaki, me'aiwa komiu mengkita Aku; tempono Ongkue a laro torungku, me'aiwa komiu ntepohawea-Kune. 37Ka mia mentee atuudo ira mesangki, dompotae: Ue, indi'ipiake kimengkita Komiu mokoninggo ka kimempaka Komiu, ke mokoranga ka kimpopo'inu Komiu? 38Indi'ipiake kimengkita Komiu gagi mia hawe, ka kimpetotoka Komiu, ke kolambe-lambe ka kimpoposangka Komiu? 39Indi'ipiake kimengkita Komiu mahaki ke a laro torungku ka kime'aiwa kumita Komiu? 40Ka Mokole atuu ta sumangki ira: Kupauakomiu, menteeano luwuakoano anu wineweumiu tiano asa mia inso a mpepaekompo-Ku anu tedoa mongkokolaro andio, imeweweuomo ndi Ongkue. 41Ka Ira motae mbo'u ndi ondae anu i manggali-Do: Impolaimo inso i aru-Ku, hei omiu mia anu tetotonaa, impolaimo a laro api anu nahina tampulaano anu tepatindaomo tiano i Mosa'o ka luwuno mala'ekano. 42Hangano tempono Kumokoninggo, nahi mempaka Aku; tempono Kumokoranga, nahi mpopo'inu Aku; 43tempono Kugagi mia hawe, nahi mpetotoka Aku; tempono Kukolambe-lambe nahi mpoposangka Aku; tempono Kumahaki ka a laro torungku, nahi me'aiwa mengkita Aku. 44Ka i'amba ira mesangki: dompotae: Ue, indi'ipiake kimengkita Komiu mokoninggo, ke mokoranga, ke gagi mia hawe, ke kolambe-lambe, ke mahaki, ke a laro torungku ka nahi kimpekakaa-Komiu? 45Ka Ira sumangki: Kupauakomiu, menteeano luwuakoano anu nahi imeweweuo tiano asa mia inso ndi ondae anu tedoa mongkokolaro andio, nahi meweweuo mbo'u ndi Ongkue. 46#Dan. 12:2 Ka ondae andio ira mpewinso a mpo'ianga pobobarasaia anu nahina tampulaano, sine mia mentee a ntuwua anu nahina tampulaano.”
Currently Selected:
I MATIU 25: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
