I MATIU 22
22
Potundaano mongkona pelimbua a mpetao
22:1-14
(Luk. 14:15-24)
1Ka Do'amba i Yesu mepauako ira mbo'u a mpotundaano, 2”Mongkona Poparentaa Suruga pinotundaako kana asa mokole, anu moweweu pelimbua a petaoano anano. 3Itena ira atano mempoboio luwuano mia anu me'inolu iramo a mpelimbua a mpetaoa atuu, sine mia atuudo nahi domebehe me'aiwa. 4Itena ira mbo'u atano anu susua, pe'oliwino: Pauako ira mia anu me'inolu atuudo: Menteeano kaanga, kupatindaomo, sapi lakino ka pinotuwuku kusumbele iramo; luwuno tetindaomo, ime'aiwamo a mpelimbua petaoa andio. 5Sine mia anu me'inolu atuudo nahi domperioo; hinao anu lumako a lereno, hinao anu lumako a mpo'anggaano, 6ka anu susua rumako ira ata atuudo, bobarasai ira ka mpepate ira. 7Onaemo ka itekuda mokole atuu, ka i'amba tumena ira sorodaduno melako i ra'ai mpepate ira anu mpompepate atuudo ka mesongkoo kotado. 8Umarino atuu ipotaeako ira atano: Pelimbua a mpetaoa tetindaomo, sine mia anu me'inolu hieno nahi pototodo atuu. 9Onaemo pu'uno imelakomo a luwuno sampangano sala ka ime'olu iramo sompo mia anu hinawemiu i ra'ai a mpelimbua petaoa atuu. 10Onaemo ka domelako ata atuudo ka pumpu ira luwuno mia anu hinawedo a nsala, mia memosa'o ka mia memoiko, ranta ka ibukeako totoka bolongko pelimbua a mpetaoa atuu. 11Tempono ipewinso mokole ta tepohaweako ira totoka atuudo, ikitao asa mia anu nahi pesangkaako sangka mpogawe. 12Ipotaeakono: Hei pepaekompo, kana'umpe ka upewinso ramai nahi upesangkaako sangka mpogawe? Sine mia atuu butu mo'ia. 13#Mat. 8:12; 25:30; Luk. 13:28 Ka i'amba mokole motaeako ira atano: Imemponguo karuno ka kaeno ka impetadiakono mia atuu a laro wongi-wongiano anu wongi mpusu, i ra'aimo hinao ponsabangia ka ke'ingisia. 14Hangano hadio anu mempinoboi, sine tedei anu bininiki.”
Mongkona mo'owahi sima'ulu a Datu
22:15-22
(Mrk. 12:13-17; Luk. 20:20-26)
15Ka i'amba melako iramo to Parisi; menteriso ira ba kana'umpe ka dompoko'oho Ira i Yesu mesala a aasa pesikeno. 16Domentena ira ana gurudo mperonga saru to Herodia mpesikeno ndi Ondae, ”Guru, kimento'orio, Omiu asa mia anu moleo ka moleo Ipompaguru mongkona po'ehe-Do Ue Ala ka nahina dinoitoa-Komiu maupo ndi sema, hangano nahi pobiniki mia. 17Ipauakamimo pohawe-Miu: Ba moiko koa mo'owahi sima'ulu a Datu ke naahi?” 18Sine Doto'orio i Yesu mosa'ono aroado atuu ka Do'amba motae, ”Tembio ka ime'ara-arahako Aku, hei mia mpo'onde-onde? 19Impopokitaa-Kune doi po'owahi sima'ulu atuu.” Domewawao aasa dinare ndi Ondae. 20Ka Dosikeno ira, ”Gambara ka binurino isemake andio?” 21mesangki ira, ”Gambara ka binurido i Datu.” Ka Do'amba i Yesu motaeako ira, ”Peweengakonomo a Datu hapa anu asalakono komiu mpoweeakono a Datu ka ndi Ondae Ue Ala anu asalakono komiu mpeweengakono ndi Ondae Ue Ala.” 22Rumongeo atuu mengkohali-hali iramo ka domebinta Iramo i Yesu ka domelako.
Pesikenodo to Saduki mongkona pewangua
22:23-33
(Mrk. 12:18-27; Luk. 20:27-40)
23 #
Tin. 23:8
A oleo atuu mehawe iramo ndi Ondae i Yesu ba opia to Saduki, anu montonda pohawedo nine hinao pewangua. Mpesikeno ira ndi Ondae, 24#Win. 25:5”Guru, i Musa motae, nine tewala asa mia mate ka nahi pobinta anano, pepaekompono asalakono kumombiao beineno atuu ka motuwuo inuleno pepaekompono atuu. 25Sine i olomami hinao opitu mia mpepaekompo. Anu ko'aasa mekombia, sine lembuino mate. Ka hangano onae nahina inuleno, beineno atuu ibintaakono pepaekompono. 26Kanandio koa mbo'u anu ko'orua ka anu ko'otolu hawe anu ko'opitu. 27Ka poko'ariano, umarino luwudo, beine mbo'u atuu mate. 28Isemake i olodo opitu mia atuu anu gagi tamano beine atuu a oleo pewangua? Hangano dompekombiaakonomo luwu.” 29Sumangki Ira i Yesu, ”Mentesaa komiu, hangano nahi mpokonto'orio Wunta Mempori maupo pabawa-Do Ue Ala! 30Hangano i tempono pewangua mia nahi pekombia ka nahi pinopokombia tendeano tuwu kana mala'eka i suruga. 31Sine mongkona pewangudo mia memate nahi imebasao hapa anu pinau-Do Ue Ala, tempono Dopepau: 32#Pel. 3:6 Ongkuemo Ue Alano i Burahima, Ue Alano i Saki ka Ue Alano i Yako? Ondae komba Ue Alado mia memate, tendeano Ue Alano mia tuwu.” 33Mia hadio anu merongeo atuu mengkohali-haliakono pompaguru-Do.
Songka anu lalua
22:34-40
(Mrk. 12:28-34; Luk. 10:25-28)
34Tempono domerongeo to Parisi, nine Doweweu iramo i Yesu to Saduki atuudo mengkomino, mpepumpu iramo 35ka asa mia inso ndi ondae, asa guru agama, mesikeno umara-arahako Ira, 36”Guru, songka isuake anu lalua a laro Songkano i Musa?” 37#Win. 6:5 Sumangki Ira i Yesu ndi onae, ”Pehohawa Iramo i Ue, Ue Alamu, tompaano aroamu ka tompaano sumangamu ka tompaano pompewowolomu anu mentee. 38Onaemo atuu songka anu lalua ka anu ko'aasa. 39#Ima. 19:18 Ka songka anu ko'orua, anu pengkenano, onaemo: Pehohawaomo pe'asa miamu kana koroimu. 40A orua songkamo andio pepu'uano luwuno songka Taura ka wuntado luwuno nabi.”
Penggoeado i Yesu ka i Daudi
22:41-46
(Mrk. 12:35-37; Luk. 20:41-44)
41Tempono to Parisi kontongaado ntepumpu, mesikeno Ira i Yesu ndi ondae, Dopotae, 42”Hapake pohawe-Miu mongkona i Mesia? Anano isemake Ondae?” mpotae ira ndi Ondae, ”Anano i Daudi.” 43Dopotaeako ira, ”Tewala kanatuu, kana'umpeke i Daudi a pokongkomi-Do Penaa ka ipokopau Ira Ueno, tempono ipotae:
44 #
Pud. 110:1
Mepau Iramo i Ue ndi ondae Ueku:
pentoromo i koana-Ku,
hawe ka Kunaa ira iwali-Miu a ntoto karu-Miu.
45Gagi tewala motae i Daudi Ondae Ueno, nde kana'umpe mbo'u Onae anano?” 46Nahina maupo te'asa mia mokosangki Ira, ka mompu'u oleo atuu nahina mbo'u maupo te'asa mia anu sapa mompesikenoako maupo hapa ndi Ondae.
Currently Selected:
I MATIU 22: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
