I MATIU 21
21
Ondae i Yesu tinotowo i Yerusale
21:1-11
(Mrk. 11:1-10; Luk. 19:28-38; Yoh. 12:12-15)
1Tempono Ondae i Yesu ka ana guru-Do me'umpeda iramo i Yerusale ka mehawe i Betipage a Pongku Saitu, Ondae i Yesu tumena ira orua ana guru-Do 2saru pe'oliwi, ”Ilakomo a inia anu i aromiu atuu, ka i tu'ai komiu ronga humaweo aasa kalide waino tinanggo ka anano umpeda ndi onae. Potolaomo tanggono kalide atuu ka wawaomo oruano ndi Ongkue. 3Ka tewala hinao mia kumuahako komiu, ipotaemo: Dokereo i Ue. Ira koa ronga mokuleo.”
4Luwuno atuu gagi ka i'inihii pau anu pinohaweno nabi,
5 #
Sak. 9:9
”Pauakono ana beine Sioni:
Kitao, Mokolemu hawe ndi omue,
Ondae mauru ka mesawi a ngkalide,
aasa kalide pateke anu mongura.”
6Ka lumako iramo ana guru atuu ka doweweuo kana anu Dotenaako ira i Yesu. 7Dowawao kalide waino atuu saru anano, ka do'amba umempehiakono sangkado ka mesawi Iramo i Yesu i wawono. 8Mia hadio anu tedoa mehadio ira mewileo sangkado a nsala, hinao mbo'u anu mpo'ala sampa keu ka dome'empehiakono sala. 9#Pud. 118:26 Ka mia hadio anu mpelempa i aro-Do i Yesu ka anu tumonda Ira inso i bungku-Do mpebooli, dompotae,
”Hosana Anano i Daudi,
rinonso Iramo anu hawe a nee-Do i Ue,
hosana a mpo'ianga anu i wawono ntu'u!”
10Ka tempono Dopewinso i Yerusale, ntewuka iramo luwuno ihino kota atuu ka dompotae mia, ”Isemake mia andio?” 11Ka mia hadio atuudo mesangki, ”Ondaemo andio nabi Yesu inso i Nasare, wita Galilea.”
Ondae i Yesu mokomemporio Raha-Do Ue Ala
21:12-17
(Mrk. 11:15-19; Luk. 19:45-48; Yoh. 2:13-16)
12Ka Do'amba i Yesu mewinso a Raha-Do Ue Ala ka sumaari ira luwu mia anu mpepangidi ka mpe'oli a kintalano Raha-Do Ue Ala. Dowalite ira meda pontobosia doi ka luwuno bangkudo anu mpo'asa marapatii 13#Yes. 56:7; Yer. 7:11 ka Dopotaeako ira, ”Hinao teburi: Raha-Ku ta nineeako raha pekakaia. Sine impokogagio po'iangaado anu mporontu.”
14Ka mehawe iramo mia memorawu ka mia tiimpa karu ndi Ondae a laro Raha-Do Ue Ala atuu ka Dopokotompa ira. 15Sine mansado mengkitao petewawado sando mpesomba ka anu mponto'ori Taura kumitao luwuno kinohali-haliako anu wineweu-Do atuu ka nana'ote anu mpebooli a laro Raha-Do Ue Ala, ”Hosana Anano i Daudi!” Mosa'odo ntu'u, 16#Pud. 8:3 ka do'amba mpotaeako Ira, ”Irongeo hapa nineedo nana'ote andiodo?” Dopotaeako ira i Yesu, ”Kurongeo; napi horike mebasao: Inso a ngangado anadalo ka nana'ote anu dakompo'uoado Ipatindaomo po'unde-unde?”
17Ka Do'amba binta ira ka Dopeluarako lumako i Betania ka merato i tu'ai.
Ondae i Yesu tumotonaao keu ara
21:18-22
(Mrk. 11:12-14, 20-26)
18Tempono mo'oru a laro pelempaa-Do mekule i kota, mokoninggo Ira i Yesu. 19Rangku a nsala Dokitao keu ara ka Do'amba lumako tu'ai, sine nahi Dopohawe hapa-hapa a ngkeu atuu sangkadio butu leweno. Dopotaeakono keu atuu, ”Nami komewua mbo'u ranta nahina tampulaano!” Ka i tempo koa mbo'u atuu mokariomo keu ara atuu. 20Kumitao anu gagi atuu mengkohali-hali iramo ana guru-Do, ka dompotae, ”Kana'umpe keu ara atuu ka imansa mokari?” 21#Mat. 17:20; 1Kor. 13:2 Dosangki ira i Yesu, ”Kupauakomiu, menteeano tewala mpompe'ala-ala komiu ka nahi menanta-nanta, komba butu komiu mpokoweweuo hapa anu wineweu-Ku a ngkeu ara atuu, sine mbo'u tewala impotaeakono torukuno andio: Pelimbamo ka utetadiako a laro ntahi! Anu kanatuu ta gagi. 22Ka hapamo koa inemamiu a laro mpekakai saru buuke pompe'ala-ala, komiu koa mentarimao.”
Pesikeno mongkona pabawa-Do i Yesu
21:23-27
(Mrk. 11:27-33; Luk. 20:1-8)
23Ka Do'amba i Yesu mewinso a Raha-Do Ue Ala, ka tempono Dopompaguru i tu'ai mehawe iramo petewawado sando mpesomba saru mia memota'udo tongku Yahudi ndi Ondae, ka dompesikeno, ”Saru pabawa inso isuake Ipoweweuako luwuno atuu? Ka isemake moweea-Komiu pabawa atuu?” 24Sumangki Ira i Yesu ndi ondae, ”Aku mesikeno mbo'u ngkuda te'asa ndi omiu ka tewala imesangki Aku, Aku koa mbo'u pauakomiu saru pabawa inso isua Kuweweuo luwuno atuu. 25Inso isuake pobahono i Yohane? Inso i suruga ke inso a mia?” Dompepau-pauakono i olodo, ka dompotae, ”Tewala mpotae kita: Inso i suruga, Ira motaeakita: Tewala kanatuu tembio ka nahi mpe'ala-alao? 26Sine tewala mpotae kita: Inso a mia, medoito kita a mia hadio, hangano luwuno mia mpotae i Yohane andio nabi.” 27Ka do'amba mesangki Ira i Yesu, ”Nahi kimento'orio.” Motae Iramo i Yesu ndi ondae, ”Tewala kanatuu, Ongkue mbo'u nahi Aku pauakomiu saru pabawa inso isua Kuweweu ira luwuno atuu.”
Potundaano mongkona orua nana'ote
21:28-32
28”Sine hapa pohawemiu mongkona andio: Asa mia hinao anano orua ira tama. Onae lumako a anano anu aka ka ipotae: Anaku, lakomo ka upo'angga oleo andio a lere anggoro. 29Sumangki anano atuu: Moiko, ama. Sine nahi lako. 30Ka i'amba mia atuu lumako a anano anu ko'orua ka ipotae kanatuu koa mbo'u. Ka sumangki anano atuu: Nahi kubehe. Sine lembuino onae me'o'ole onaemo ka i'amba lumako. 31Isemake i olodo orua mia atuu anu weweuo po'eheno amado?” Mesangki ira, ”Anu pokotompa.” Motae Ira i Yesu ndi ondae, ”Kupauakomiu, menteeano luwuno puu popumpu sima'ulu ka beine mebelesu ira mpese'elungi komiu mpewinso a Poparentaa-Do Ue Ala. 32#Luk. 3:12; 7:29-30 Hangano i Yohane aiwa montiso sala menteea ndi omiu, ka nahi mpe'ala-alao. Sine luwuno puu popumpu sima'ulu ka beine mebelesu mpe'ala-alao. Ka maupo imengkitao, sine lembuino nahi mpe'o'ole ka nahi mpe'ala-alao koa mbo'u.”
Potundaano mongkona anu mpo'angga a lere anggoro
21:33-46
(Mrk. 12:1-12; Luk. 20:9-19)
33 #
Yes. 5:1-2
”Rongeomo asa potundaano anu susua. Hinao asa mia ueno wita melere anggoro ka iwalao limbu. Ikekeo wita pomporo'iano anggoro ka mowangu menara podagaia a lere atuu. Ka i'amba metamboakono lere atuu a mia mpo'angga lere ka i'amba lumako a inia susua. 34Tempono rangkuomo tempo po'opua, itena ira atano melako a mia mpo'angga lere atuu ka domentarimao hasili anu gagi tiano. 35Sine mia mpo'angga lere atuu merako ira ata atuudo: anu asa mia domentunduhio, anu susuano pinepate ka anu susuano mbo'u winunoako watu. 36Ka i'amba ueno atuu tumena ira mbo'u atano anu susua, sine ondae mbo'u mewineweu mengkena kana luwuno walido. 37Poko'ariano itenao anano lumako ndi ondae, ipotae: Anaku ira metampahio. 38Sine tempono mia mpo'angga lere atuu mengkitao anano atuu, mpotae iramo asa mia ka anu susua: Onaemo anu ta me'ueo, aiwa tompepateo, ka tiano ontaemo gagi mpe'ueo. 39Domerakoo ka mpetadiakono a bungkuno lere anggoro atuu, ka do'amba mpepateo. 40Ka tewala aiwa ueno lere anggoro atuu, hapa anu wineweuno a mia mpo'angga lere atuu?” 41Mpotae ira ndi Ondae, ”Onae ta mepate ira mia memosa'o atuudo ka lere anggorono ta metamboakono a mia mpo'angga lere anu susua anu ta weeakono hasilino ia tempono.” 42#Pud. 118:22-23 Motae ira i Yesu ndi ondae, ”Napi horike mebasao a Wunta Mempori:
Watu anu tinadido puu mpowangu raha
gagiomo watu pondasi a nsiuno;
mongkona atuu gagi inso ndi Ondae i Ue,
aasa wineweu kinohali-haliako kinitano matato.
43Onaemo pu'uno, Kupauakomiu, nine Poparentaa-Do Ue Ala ta inala inso ndi omiu ka ta wineeako asa tongku anu ta mehasiliako wuano Poparentaa atuu.
[44Ka ba isema anu tedonta a wawo watu atuu, onae ta tepuro ka ba isema dinunsino watu atuu, onae ta tepirego.]”
45Mansado merongeo petewawado sando mpesomba ka to Parisi luwuno potundaano pinau-Do i Yesu, dompokonto'orio, nine ondaemo anu tinoo-Do. 46Ka Dome'ungkeakono ka dompokorako Ira, sine medoito ira a mia hadio, hangano mia hadio atuudo mpotae Ondae nabi.
Currently Selected:
I MATIU 21: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
