I MATIU 23
23
Ondae i Yesu kumuahako ira anu mponto'ori Taura ka to Parisi
23:1-36
(Mrk. 12:38-40; Luk. 11:37-54; 20:45-47)
1Onaemo ka Dopepau i Yesu a mia hadio ka a ana guru-Do, Dopotae, 2”Kaderano i Musa dompentorokiomo anu mponto'ori Taura ka to Parisi. 3Onaemo pu'uno imentondaomo ka imeweweuomo luwuakoano anu domempaguruakomiu, sine si mentondao luwuno poweweudo, hangano dompopaguruako sine nahi domeweweuo. 4Mpowutu ira tinembi anu mobea, ka do'amba menaao a wawo oweano mia, sine ondaedo nahi domebehe medanggio. 5#Pod. 15:38; Win. 6:8; Mat. 6:1 Luwuno anggaa anu mewineweudo butu tinoodo ka domengkitao mia; mpopokona ira peboo pekakaido anu molue ka wuakino lemba anu meloe; 6inehedo mpentoro a mpentoroa pinelangkai a laro mpelimbua ka a mpentoroa i arono ntu'u a raha tepumpua; 7inehedo mempinelangkai a olu ka inehedo mempinoboiako Guru. 8Sine omiu, si mempinotaeako Guru; hangano aasa koa Gurumiu ka luwumiu mpepaekompo. 9Ka si mpopewua ama maupo isema i tolino andio, hangano aasa koa Amamiu, onaemo Ondae anu i suruga. 10Osi'i mbo'u imempinotaeako petewawa, hangano aasa koa petewawamiu, onaemo i Mesia. 11#Mat. 20:26-27; Mrk. 9:35; 10:43-44; Luk. 22:26 Ba isema lalu langkai i olomiu, ka igagimo puu pompekakaakomiu. 12#Luk. 14:11; 18:14Ka ba isema mompelangka-langkai, onae ta pine'uru-uru ka ba isema anu me'urumako, onae ta pinelangkai.
13Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano imentondoo luwuno pewowano Poparentaa Suruga i arodo mia. Hangano omiu isa'a nahi mpewinso ka ime'onsoi ira anu mpopete'umala ira mpewinso. [14Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano imeteleo rahado tuwu beine ka impokobenge-benge ira mia mesala a mpekakai me'o'ondau. Onaemo pu'uno manasa komiu mpotarima pohuku anu lalu mobea.]
15Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano imesompoomo wawo ntahi ka wawo wita, komiu mpokontepidio te'asa miamo koa gagi tumondao agamamiu ka umarino tepidi, impokogagio miano naraka, anu meluka mpendua mosa'ono sekono omiu. 16Memasola komiumo, hei luwuno petewawa memorawu, anu mpotae: Mesumpaako Raha Mempori, sumpa atuu nahi mentee; sine mesumpaako wulaano Raha Mempori, sumpa atuu mowutu. 17Hei omiu mia memonge-monge ka mia memorawu, hapake anu lalua, wulaa ke Raha Mempori anu mokomemporio wulaa atuu? 18Mesumpaako meda pontunua pesomba, sumpa atuu nahi mentee; sine mesumpaako pesomba anu kongko i wawono, sumpa atuu mowutu. 19Hei omiu mia memorawu, hapake anu lalua, pesomba ke meda pontunua pesomba anu mokomemporio pesomba atuu? 20Onaemo pu'uno ba isema mesumpaako meda pontunua pesomba, ipesumpaako meda pontunua pesomba ka a luwuakoano mbo'u anu ninaa i wawono. 21Ka ba isema mesumpaako Raha Mempori, ipesumpaako Raha Mempori ka ndi Ondae, anu mo'ia i tu'ai. 22#Yes. 66:1; Mat. 5:34 Ka ba isema mesumpaako suruga, ipesumpaako kadera poparentaa-Do Ue Ala ka ndi Ondae mbo'u anu mentoro i wawono. 23#Ima. 27:30 Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano tia hopuluno solasi, adasi mo'ahi ka jinta ime'owahio, sine anu lalua a songka Taura nahi mentondao, onaemo: moleoa ka pompehohawa ka petenunu. Anu aasa asalakono ka iwineweu ka anu mehano si mpebungkuio. 24Hei omiu petewawa anu memorawu, tiporo imentirisao inso a inuamiu, sine unta anu i larono imenteleo.
25Memasola komiumo, hei anu mponto'ori Taura ka to Parisi, hei omiu mia mpo'onde-onde, hangano sangkiri ka sempe imewo'ohio bungkuno, sine i larono bukeako rinontu ka modokoa. 26Hei to Parisi anu memorawu, impokomorinao se'elu i larono sangkiri atuu ka i bungkuno mbo'u ta morina.
27 #
Tin. 23:3
Memasola komiumo, hei anu mpoto'ori Taura ka to Parisi, hei omiu mia mpo'onde-onde, hangano mpengkena komiu kana kaburu anu kinapuru mopute, anu i bungkuno lano tengkita morina, sine i larono bukeako wuku ka mperupa-rupa anu mokoburu. 28Kanandiomo mbo'u omiu, i bungkuno ntengkita komiu mentee a pongkitado mia, sine i laromiu buke po'onde-onde ka mosa'oa.
29Memasola komiumo, hei anu mponto'ori Taura ka to Parisi, hei mia mpo'onde-onde, hangano imeweweuo kaburudo nabi ka mpokotekosio tugudo mia memoleo 30ka mpotae: Ba kimentuwu i tempo domentuwu uempu'uto, manasaomo nahi kami mentonda ira a pompepatea nabi atuudo. 31Sine kanandio imensakosiiomo, nine omiumo inuledo anu mpepate ira nabi atuudo. 32Gaagi, ime'ihiiomo mbo'u ponsa'udo uempu'umiu! 33#Mat. 3:7; 12:34; Luk. 3:7 Hei omiu ule, hei omiu inuleno ule me'ipo! Kana'umpeke ka komiu mpokotola inso a mpohukua i naraka? 34Onaemo pu'uno, kitaomo, Kutena ira nabi ndi omiu, mia anu mempande mposongka ka guru agama: entongano i olodo komiu mpepate ira ka mempaso ira a ngkeu pinotamba, anu mehano komiu mensepi ira a raha tepumpuamiu ka imebobarasai ira inso a ngkota lumako a ngkota, 35#Teg. 4:8; 2Taw. 24:20-21 ka imensusuruo po'uwua reano mia anu nahina salano mompu'u inso ndi Habeli, mia mentee atuu, hawe ndi Sakaria anano i Berekia, anu pinepatemiu i olono po'ianga mempori ka meda pontunua pesomba. 36Kupauakomiu: Menteeano luwuno andio ira mensusuruo mia andiodo!”
Pompemasusa mongkona Yerusale
23:37-39
(Luk. 13:34-35)
37”Yerusale, Yerusale, omue anu mepate ira nabi ka wunoako ira watu mia anu mentinena ndi omue! Mararuomo Kumingki pumpu ira anamu, mengkena kana indompu'u pumpu ira anano a ntoto panino, sine nahi mebehe. 38Kitaomo rahamu andio ta bininta ka gagi boni-boni. 39#Pud. 118:26 Ka Kupauakomiu: Mompu'u kanandio-andio nami komiu mengkita Aku mbo'u, ranta ka impotae:
Rinonso Iramo anu hawe a nee-Do i Ue!”
Currently Selected:
I MATIU 23: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
