I MATIU 18
18
Isema anu lalu langkai a laro Poparentaa Suruga
18:1-5
(Mrk. 9:33-37; Luk. 9:46-48)
1 #
Luk. 22:24
I tempo atuu mehawe iramo ana guru atuu ndi Ondae i Yesu ka dompesikeno, ”Isemake anu lalu langkai a laro Poparentaa Suruga?” 2Onaemo ka Dopoboio i Yesu asa nana'ote kodei ka Donaao i tonga-tongado 3#Mrk. 10:15; Luk. 18:17 Ka Do'amba motae, ”Kupauakomiu, menteeano tewala nahi ntepidi ka gagi kana nana'ote kodei andio, nahi komiu mpewinso a laro Poparentaa Suruga. 4Sine ba isema anu me'urumako ka gagi kana nana'ote kodei andio, onaemo anu lalu langkai a laro Poparentaa Suruga. 5Ka ba isema anu tumarimao asa nana'ote kanandio a nee-Ku, Ongkuemo tinarimano.”
Isema anu mompopo'oo mia
18:6-11
(Mrk. 9:42-48; Luk. 17:1-2)
6”Sine ba isema mompopo'oo aasa inso a nana'ote kodei andiodo anu mompe'ala-ala ndi Ongkue, moikoopo ndi onae tewala pinontanggoako watu pogili a we'uno ka i'amba pinotondu a laro ntahi. 7Masolaomo wawontolino saru luwuno pompopo'oono: lano pompopo'oo asalakono hinao, sine masolaomo mia anu weweuo.
8 #
Mat. 5:30
Tewala kaemu ke karumu mopo'ooko, poleomo ka tadiomo atuu, hangano moikoopo upewinso a ntuwua, pudu kae ke tiimpa karu sekonopo mompombali kaemu ke karumu ka upinetadiako a laro api nahina tampulaano. 9#Mat. 5:29 Ka tewala matamu mopo'ooko, gogoio ka tadiomo atuu, hangano moikoopo upewinso a ntuwua memata aasa sekonopo upinetadiako a laro api naraka kongko orua mata.
10Impopesu'ui, si hina mompokongkodei te'asa inso a nana'ote kodei andiodo. Hangano Kupauakomiu: Hinao mala'ekado i suruga anu wela kumitao rupa-Do Ama-Ku anu i suruga. [11Hangano hawe-Do i Ana Manusia mongkadudui anu tetadi.]”
Potundaano mongkona bimba anu tetadi
18:12-14
(Luk. 15:3-7)
12”Kana'umpe pohawemiu? Tewala asa mia hinao asa etu bimbano, ka asa i olodo tetadi, nde nahi ta bintao anu sio pulu ka osio a mentorukuno ka ilako umungkeo anu tetadi atuu? 13Ka Kupauakomiu: Menteeano tewala ihaweo, langkaiopo imawongkoakono anu asa atuu sekonopo a anu siopulu ka osio anu nahi tetadi. 14Kanatuu koa mbo'u Ondae Amamiu anu i suruga nahi Dopo'eheako maupo te'asa mia inso a nana'ote andiodo tetadi.”
Mongkona mompatudu pe'asa pepaekompo
18:15-20
15 #
Luk. 17:3
”Tewala pepaekompomu moweweu hala, kuahakono tempono asa-asano. Tewala iperorongeakono patudumu walikomo humaweo. 16#Win. 19:15 Tewala nahi perorongeakomu, powawamo te'asa ke orua mia mbo'u hangano pompauno orua ke otolu mia sakosii, kara-kara atuu pine'ala-alaomo. 17Tewala nahi perorongeako ira, pauomo teweweuno a bawaa. Ka tewala nahi perorongeako ira mbo'u bawaa, kitaomo kana mia anu nahi to'ori Ira Ue Ala ke asa mia puu popumpu sima'ulu. 18#Mat. 16:19; Yoh. 20:23 Kupauakomiu: Menteeano hapa anu winutumiu i wawontolino andio ta tewutu i suruga ka hapa anu pinotolamiu i wawontolino andio ta tepotola i suruga. 19Ka Kupauakomiu mbo'u: Tewala orua mia inso ndi omiu i wawontolino andio moroko mo'ema hapamo koa, po'emado atuu ira uminduo AmaKu anu i suruga. 20Hangano ba isua orua ke otolu mia mpepumpu a nee-Ku, kongko Aku i tu'ai i tonga-tongado.”
Potundaano mongkona po'ampunia hala
18:21-35
21 #
Luk. 17:3-4
Ka i'amba aiwaomo i Peturu ka motaeako Ira i Yesu, ”Ue, hawe pempia asalakono aku umampunio halano pepaekompoku tewala onae tehala ndi ongkue? Hawe tepepintu?” 22Dopotae i Yesu ndi onae, ”Naahi! Kupauakomu: Komba hawe pepintu, tendeano hawe pepintu pulu ka pepintu.
23Hangano mongkona Poparentaa Suruga pinotundaako kana asa mokole anu ta moweweu perekea saru luwuno atano. 24Mansano mompu'u moweweu perekea atuu, pino'aroomo asa mia anu mepasua hopulu nsowu talenta. 25Sine hangano nahi polio mokolesoo pasuano, mokole atuu meparenta ka i'inasa mia atuu saru anano ka beineno ka luwuno arataano po'owahi pasuano. 26Onaemo ka ipenggolontu ata atuu mesombaio, ipotae: Imensabaramo ari, luwuno pasuaku aku mokolesoo. 27Ka i'amba teleluomo aroano mokole atuu hangano mehohawao ata atuu, ranta ka ipotolao ka nami pewowoloo mbo'u pasuano.
28Sine mansano meluarako ata atuu, itepotowoakono asa ata susua anu mepasua asa etu dinare ndi onae. Irakoo ka itolonggeoo walino atuu, ipotae: Owahio pasuamu! 29Onaemo ka ipenggolontu walino atuu ka mepepehohawa ndi onae: Imensabaramo ari, pasuaku atuu aku mokolesoo. 30Sine nahi tarimao ka ipeweengakono walino atuu a laro torungku hawe ka ipokolesoo pasuano.
31Kumitao atuu wali-walino anu susua tedoa pompemasusa ka do'amba mempauakono uedo luwuno anu gagi. 32Metena mokole moboio mia atuu ka ipotaeakono: Hei ata anu lambaha, luwuno pasuamu nami kupewowoloo hangano omue mepepehohawa ndi ongkue. 33Kombake omue mbo'u asalakono mehohawao walimu kana kupehohawako? 34Ka tekudaomo ueno atuu ka ipeweengakono a mia mpobobarasa, hawe ka ipokolesoo pasuano.
35Ka Ondae Ama-Ku anu i suruga Ira moweweu kanatuu mbo'u ndi omiu, tewala singge mia nahi ampunio pepaekompono tompaano aroano.”
Currently Selected:
I MATIU 18: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
