I MATIU 17
17
Ondae i Yesu pinokomaramba a wawo ntorukuno
17:1-13
(Mrk. 9:2-13; Luk. 9:28-36)
1 #
2Pet. 1:17-18 Umarino onoo oleo Ondae i Yesu wawao i Peturu, i Yakobu ka i Yohane pepaekompono, ka meronga saru ondae mewuatako Ira a asa torukuno anu ondau. I tu'ai butu ondae. 2Ka Do'amba i Yesu mebali rupa i arono matado; rupa-Do mewanta kana mata oleo ka sangka-Do gagi mopute mewanta kana mewine. 3Ka tengkita ndi ondae i Musa ka i Elia kontongaado mepau saru Ondae. 4Motae i Peturu ndi Ondae i Yesu, ”Ue, meme'ura kami ntu'u mekongko a mpo'ianga andio. Tewala Ipemoikoo po'ineeomo kuwanguo i ndi'ai otolu kema, aasa tia-Miu, aasa tiano i Musa ka aasa tiano i Elia.” 5#Teg. 22:2; Win. 18:15; Pud. 2:7; Yes. 42:1; Mat. 3:17; 12:18; Mrk. 1:11; Luk. 3:22 Ka kontongaano mepau borono metiiomo seru anu mewine umengoi ira ka inso a laro nseru atuu teronge pau motae, ”Ndiomo Ana anu pinehohawa-Ku, Onaemo bininiki-Ku, imperorongeako Iramo.” 6Rumongeo pau atuu luwuno ana guru-Do mpenggolontu rupado hawe a wita ka tedoa ira medoito. 7Ka Do'amba i Yesu aiwa ndi ondae ka tumengku ira ka Dopotae, ”Impentademo, si medoito!” 8Ka mansado mpewanguako, nahi dompongkita maupo te'asa mia sangkadio Ondae i Yesu asa-asa-Do.
9I tempono dompetii inso a ntorukuno atuu, Ondae i Yesu umoliwi ira, ”Si hina maupo te'asa mia imempauakono anu kinitamiu andio ba napi Dopewangu i Ana Manusia inso i olodo mia mate.” 10#Mal. 4:5 Ka do'amba mpesikeno ana guru-Do ndi Ondae, ”Tewala kanandio tembio anu mponto'ori Taura ka dompotae nine i Elia asalakono hawe se'elu?” 11Sumangki Ira i Yesu, ”Lano i Elia ta hawe ka mokomoikoo luwuakoano 12#Mat. 11:14 ka Kupauakomiu: i Elia haweomo, sine nahi domento'orio mia ka meweweuakono montonda po'ehenodo. Kanatuu koa mbo'u i Ana Manusia Ira tebobarasai hangano ondae.” 13I tempo atuu dompokonto'oriomo ana guru-Do i Yesu nine Ondae mepau mongkona i Yohane Puu Mpobaho.
Ondae i Yesu mokotompao aasa mangalitau anu mahaki matewula
17:14-21
(Mrk. 9:14-29; Luk. 9:37-43)
14Tempono Ondae i Yesu ka ana guru-Do mpekule a mia hadio atuu, haweomo asa mia tepohaweako Ira i Yesu ka mesomba, 15ipotae, ”Ue, Ipehohawaomo anaku. Onae mahaki matewula ka tedoa marasai. Mararu itebangku a laro api ka a laro uwoi mbo'u. 16Umariomo kuwawao a ana guru-Miu, sine nahi domempolio mpokotompao.” 17Ka motae Iramo i Yesu, ”Hei omiu mia atuudo anu nahi mpompe'ala-ala ka anu mebulalingo te'opiapo mbo'u tehineno Kupo'ia i olomiu? Te'opiapo mbo'u tehineno Kusabara ndi omiu? Wawaomo nana'ote atuu ramai!” 18Meroku Dokuahakono i Yesu, ka i'amba meluarakoomo onitu nsa'o atuu inso ndi onae ka nana'ote atuu tompa i tempo koa mbo'u atuu. 19Ka do'amba me'aiwa butu ana guru-Do i Yesu ndi Ondae, mpesikeno iramo, ”Tembio omami nahi kimpokosaario onitu nsa'o atuu?” 20#Mat. 21:21; Mrk. 11:23; 1Kor. 13:2 Dopotaeako ira, ”Hangano kodei pompe'ala-alamiu. Hangano Kupauakomiu: Menteeano ba hinao pompe'ala-alamiu kanamo koa langkaino wuku rawoho komiu mpokompotaeakono torukuno andio: Pelimba raane inso a mpo'ianga andio – asalakono torukuno andio melimba, ka nahina anu nahi ta gagi ndi omiu. [21Anu kanandio nahi pinokosaari sangkadio hangano pekakai ka puasa.]”
Pepopoto'ori kompenduano mongkona tebobarasai-Do i Yesu
17:22-23
(Mrk. 9:30-32; Luk. 9:43-45)
22I tempono Ondae i Yesu ka ana guru-Do mperonga-ronga i Galilea, Dopotaeako ira, ”I Ana Manusia Ira pineweengako a ngkaedo mia 23ka dompepate Ira ka ko'otolu oleono Ira winangu.” Onaemo ka imasusa ntu'u aroado ana guru-Do atuu.
Ondae i Yesu mo'owahi sima'uluno Raha-Do Ue Ala
17:24-27
24 #
Pel. 30:13; 38:26 Tempono Ondae i Yesu ka ana guru-Do mehawe i Kapenau haweomo anu moruru sima'uluno Raha-Do Ue Ala ndi Peturu ka ipotae, ”Nde nahi Dopo'owahike gurumu sima'ulu orua dirama atuu?” 25Isangkio, ”Lano mo'owahi.” Ka mansano mewinso i Peturu a raha, Dopese'elungio i Yesu sumikenoo, ”Kana'umpeke pohawemu, Simo? Inso ndi semake luwuno mokoleno wawontolino andio domporuru bea ka sima'ulu? Inso a mpalilido ke inso a mia mehawe?” 26Sumangki i Peturu, ”Inso a mia mehawe!” Onaemo ka Dopotae i Yesu, ”Gaagi nami dompo'owahi palilido. 27Sine ka si tomegagi watu tetiduado, lakomo pomeka a rano. Ka bou amba-ambano anu pinomekamu, rakoomo ka ubengao ngangano, ka kohumaweo doi opaa dirama i larono. Alaomo atuu ka owahiomo ndi ondae, sima'uku-Ku ka sima'ulumu mbo'u.”
Currently Selected:
I MATIU 17: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
