I MATIU 19
19
Teposuaa
19:1-12
(Mrk. 10:1-12)
1Mansa-Do umari i Yesu pauo pompaguru-Do atuu, melungka Iramo inso i Galilea ka hawe i wita Yudea anu i asatowano koro Yarade. 2Mia hadio ntehuhu tumonda Ira ka Dopokotompa ira mbo'u i ra'ai. 3Ka mehawe iramo to Parisi ndi Ondae me'ara-arahako Ira. Mpesikeno ira, ”Nde moiko koake mia teposuaakono beineno, maupo mondeenomo koa pu'uno?” 4#Teg. 1:27; 5:2 Sumangki Ira i Yesu, ”Nde nahi mebasaoke, nine Ondae anu mokogagio mia inso a pompu'uano mokogagi ira tama ka beine? 5#Teg. 2:24 Ka pau-Do: Onaemo pu'uno tama ta bintao amano ka ineno ka ipe'asaakono beineno ranta orua ira atuu gagi me'asa ihi. 6Kanandio ondae komba orua mbo'u, tendeano aasa. Onaemo pu'uno, hapa anu pino'asa-Do Ue Ala, nahi moiko iponsuao mia.” 7#Win. 24:1-4; Mat. 5:31 Dompotaeako Ira, ”Tewala kanatuu, hapa pu'uno ka ipeparenta i Musa mompowee wunta teposuaa ba iteposuaakono mia beineno?” 8Motae Ira i Yesu ndi ondae, ”Hangano moteano aroamiu ka i'indukomiu i Musa teposuaakono beinemiu, sine inso a pompu'uano komba kanatuu. 9#Mat. 5:32; Luk. 16:18; 1Kor. 7:10-11 Sine Kupauakomiu: Ba isema teposuaakono beineno, sangkadio hangano monsosabo, ka i'amba mekombia saru beine susua, onae monsosabo.” 10Ana Guru atuudo mpotaeako Ira, ”Tewala kanatuu teweweuno penggoea i olono tamano ka beineno, laluopo siimo dopekombia.” 11Sine Dopotaeako ira, ”Komba luwuno mia mokonto'orio pau atuu, butu ndi ondae anu pinopoto'oriako. 12Hinao mia anu nahi pokompekombia hangano onae pine'anaako kanatuu inso a laro mpe'anakaano ineno, ka hinao mia anu kanatuu hangano wineweuno mia, ka hinao mia anu weweuo koroino kanatuu hangano po'eheno onaeno hangano Poparentaa Suruga. Isema anu mokonto'orio po'ineeomo ka ipokoto'orio.”
Ondae i Yesu rumonso ira nana'ote
19:13-15
(Mrk. 10:13-16; Luk. 18:15-17)
13Ka do'amba mewawa ira mia nana'ote kodei ndi Ondae i Yesu, ka Donaao kae-Do i wawodo ka mekakaiako ira; sine ana guru-Do ntekudaako ira mia atuudo. 14Sine Dopotae i Yesu, ”Po'inee iramo nana'ote atuudo, si me'onsoi ira me'aiwa ndi Ongkue; hangano miamo anu kanatuudo anu mpe'umbuo Poparentaa Suruga.” 15Ka Do'amba numaao kae-Do i wawodo ka Do'amba melungka inso i tu'ai.
Mangalitau anu kaea
19:16-26
(Mrk. 10:17-27; Luk. 18:18-27)
16Hinao asa mia hawe ndi Ondae i Yesu, ka ipotae, ”Guru, poweweu moiko hapake anu asalakono kuweweuo ka kupohawe koa tuwua nahina tampulaano?” 17Sumangki Ira i Yesu, ”Hapake pu'uno ka upesikeno ndi Ongkue mongkona hapa anu moiko? Aasa koa anu moiko. Sine tewala inehemu mewinso a ntuwua, tondaomo luwuno parenta-Do Ue Ala.” 18#Pel. 20:13-16; Win. 5:17-20 Motae mia atuu ndi Ondae, ”Parenta anu isua?” Dopotae i Yesu, ”Si pompepate, si ponsosabo, si ponako, si pesakosii megaupi, 19#Pel. 20:12; Ima. 19:18; Win. 5:16 pelangkai iramo amamu ka inemu ka pehohawaomo pe'asa miamu kana koroimu omuemu.” 20Motae mangalitau atuu ndi Ondae, ”Luwuno atuu kutondaomo, hapa mbo'u anu da makura?” 21Motae Ira i Yesu ndi onae, ”Tewala inehemu ka umempori, lakomo, asaomo luwuno arataamu ka peweengakonomo atuu a mia memongkokolaro, ka komohawe arataa i suruga, ka u'amba aiwa ramai ka tonda Akumo.” 22Mansano rumongeo mangalitau pau atuu, lumakoomo saru masusa aroa, hangano hadio arataano.
23Dopotae i Yesu a ana guru-Do, ”Kupauakomiu, menteeano motungko ntu'u mia kaea mpewinso a Poparentaa Suruga. 24Pohona mbo'u Kupauakomiu, moruanaopo asa unta mewinso telalo a bolono seu sekonopo asa mia kaea mewinso a Poparentaa-Do Ue Ala.” 25Mansado merongeo ana guru pau atuu, tedoa iramo ntekokodoho ka dompotae, ”Tewala kanatuu, isemake anu pinokokadudui?” 26Ondae i Yesu mengkita ndi ondae ka Dopotae, ”A mia anu kanandio nahi ta polio, sine ndi Ondae Ue Ala luwuakoano Dopolio.”
Tambo tumonda Ira i Yesu
19:27-30
(Mrk. 10:28-31; Luk. 18:28-30)
27Ka i'amba sumangki i Peturu ka ipotaeako Ira i Yesu, ”Omami andio kimebintaomo luwuakoano ka kimentonda Komiu; gagi hapake anu ta hinawemami?” 28#Mat. 25:31; Luk. 22:30 Motae Ira i Yesu ndi ondae, ”Kupauakomiu, menteeano i tempono wali pinokowo'ohu, tewala i Ana manusia mentoro a ngkadera poparentaa marambaa-Do, omiu, anu mentonda Akumo, komiu mpentoro mbo'u a wawo hopulu ka orua kadera poparentaa ka imebitarao hopulu ka orua suku Isaraeli. 29Ka sompo mia anu hangano nee-Ku ka ibintao rahano, pepaekompono tama ke beine, ama ke ineno, luwuno anano ke lereno, ta wali tumarimao meluka asa etu ka ta mohawe tuwua anu nahina tampulaano.
30 #
Mat. 20:16; Luk. 13:30 Sine hadio mia anu tese'elu ta gagi anu pokotompa, ka anu pokotompa ta gagi anu tese'elu.”
Currently Selected:
I MATIU 19: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
