I MATIU 16
16
To Parisi ka to Saduki mpo'ema petondoni
16:1-4
(Mrk. 8:11-13)
1 #
Mat. 12:38; Mrk. 8:11; Luk. 11:16 Ka i'amba mehawe iramo to Parisi ka to Saduki ira me'ara-arahako Ira i Yesu. Dome'emao ka Dopopokitao ndi ondae te'asa petondoni inso i suruga. 2#Luk. 12:54-56Sine sumangki Ira i Yesu, ”Tempono ngkiniwia hangano langi motaha, mpotae komiu: ta moiko laro meene, 3ka tempono mo'oru, hangano langi motaha ka medomu, mpotae komiu: nahi ta moiko laro meene. Rupano langi imento'orio mposisinggeo sine luwuno petondoni tempo naahi. 4#Mat. 12:39; Mrk. 8:12; Luk. 11:29 Mia andiodo anu memosa'o ka nahi dompetenunu andio mpo'ema aasa petondoni. Sine ndi ondae nahi ira mempinoweeako petondoni sangkadio petondonino Nabi Yunu.” Ka Do'amba i Yesu binta ira ka Dolako.
Mongkona ragido to Parisi ka to Saduki
16:5-12
(Mrk. 8:14-21)
5I tempono ana guru-Do i Yesu mensakio rano, domengkolupeo mpowawa roti. 6#Mrk. 8:15; Luk. 12:1 Dopotaeako ira i Yesu, ”Impedagaimo ka impetangkoro a ragido to Parisi ka to Saduki.” 7Onaemo ka dompompewowolo ka asa mia motaeakono walino, ”Ka Dopauo atuu hangano nahi tompowawa roti.” 8Ka mansa-Do tumo'orio i Yesu hapa anu pinopaudo, Dopotae, ”Tembio ka imempopauo mongkona nahina roti? Hei mia anu kodei pompe'ala-alano! 9#Mat. 14:17-21 Naapo koa mbo'u imempokonto'orio? Nami merambeo mbo'u olima roti tiano lima nsowu mia atuu ka ba opia baki roti pinumpumiu lembuino? 10#Mat. 15:34-38 Ke maupo anu opitu roti tiano pato nsowu mia atuu ka ba opia baki pinumpumiu lembuino? 11Nde kana'umpe ka nahi mpokonto'orio nine komba roti anu tinoo-Ku. Kupauakomiu: Impetangkoro a ragido to Parisi ka to Saduki.” 12Tempo atuu ka do'amba mpokonto'orio nine komba tinoo-Do ka dompetangkoro a ragino roti, tendeano a pompagurudo to Parisi ka to Saduki.
Mangakuno i Peturu
16:13-20
(Mrk. 8:27-30; Luk. 9:18-21)
13Mansa-Do hawe i Yesu i wita Kaisarea Pilipi, mesikeno Ira a ana guru-Do, ”Dompotae mia, isemake i Ana Manusia atuu?” 14#Mat. 14:1-2; Mrk. 6:14-15; Luk. 9:7-8 mesangki ira, ”Hinao anu motae: i Yohane Puu mpobaho, hinao mbo'u anu motae: i Elia, hinao mbo'u anu motae: i Yeremia ke asa inso a luwuno nabi.” 15Ka Do'amba i Yesu mesikeno ndi ondae, ”Sine hapa potaemiu, isemake Ongkue andio?” 16#Yoh. 6:68-69 Ka sumangkiomo i Simo Peturu, ”Omiumo i Mesia, Ana-Do Ue Ala anu tuwu!” 17Dopotae i Yesu ndi onae, ”Me'urakomo Simo anano i Yunu hangano komba mia anu mokomengkaao atuu ndi omue, tendeano Ondae Ama-Ku anu i suruga. 18Ka Kupauakomu mbo'u: Omuemo i Peturu ka a wawo watu manaha andio Aku wanguo bawaa-Ku ka nahi ta pabawaio matea. 19#Mat. 18:18; Yoh. 20:23 Ndi omue Aku meweengakono kunsino Poparentaa Suruga. Hapa anu winutumu i wawontolino andio ta winutu i suruga ka hapa anu pinotolamu i wawontolino andio ta pinotola i suruga.” 20Ka Do'amba i Yesu umonto ira ana guru-Do ka si domempauo maupo ndi sema nine Ondae i Mesia.
Amba-ambano ipinau mongkona tebobarasai-Do i Yesu ka atorano tumonda Ira
16:21-28
(Mrk. 8:31–9:1; Luk. 9:22-27)
21Mompu'u i tempo atuu Ondae i Yesu mompu'u mokomengkaao a ana guru-Do nine Ondae asalakono Ira lumako i Yerusale ka montembi hadio marasaia inso a mia memota'u, petewawado sando mpesomba ka guru agama, ka Do'amba pinepate ka winangu a oleo ko'otolu. 22Sine i Peturu dumii Ira i Yesu i horino ka ikuahako Ira, ipotae, ”Ue, po'ineeomo ka Dopoko'olaio Ue Ala mongkona atuu! Anu kanatuu naahi ntu'u ta umalu Komiu.” 23Ka mewolili Ira i Yesu ka Dopotaeakono i Peturu, ”Polaimo Mosa'o. Omue aasa watu tetidua-Ku, hangano omue komba mompewowolo hapa anu pinewowolo-Do Ue Ala, tendeano hapa anu pinewowolono mia.”
24 #
Mat. 10:38; Luk. 14:27 Ka Do'amba i Yesu motaeako ira ana guru-Do, ”Sompo mia anu tumonda Aku, asalakono ka ihapuo koroino, po'ahao keu pinotambano tumonda Aku. 25#Mat. 10:39; Luk. 17:33; Yoh. 12:25 Hangano ba isema ta kumaduduio penaano, ta tetadi penaano; sine ba isema tetadi penaano hangano Ongkue, onae ta humaweo. 26Hapa tuduno asa mia ba ihaweo asa wawontolino sine tetadi penaano? Ka hapake anu polio ipeweengakono gagi euno penaano? 27#Pud. 62:13; Mat. 25:31; Rom. 2:6 Hangano i Ana Manusia Ira hawe a laro maramba-Do Ama-Do domentonda Ira mala'eka-Do; i tempo atuu Ira sumuloakono mia montonda wineweuno. 28Kupauakomiu: Menteeano i olodo mia anu mekongko i ndi'ai hinao anu nahi ta mate ba napi domengkita Ira i Ana Manusia hawe gagi Mokole a laro Poparentaa-Do.”
Currently Selected:
I MATIU 16: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
