I MATIU 15
15
Parenta-Do Ue Ala ka gaudo to Yahudi
15:1-20
(Mrk. 7:1-23)
1Ka i'amba mehawe iramo ndi Ondae i Yesu ba opia to Parisi ka anu monto'ori Taura inso i Yerusale ka dompotae, 2”Tembio ana guru-Miu ka dompolimpai gaudo uempu'uto? Nahi domewo'ohio kaedo ka do'amba mpongkaa.” 3Sine sumangki Ira i Yesu ndi ondae, ”Tembio mida ka imelaloo parenta-Do Ue Ala hangano gaudo uempu'umiu? 4#Pel. 20:12; 21:17; Ima. 20:9; Win. 5:16; Mrk. 7:10 Hangano Ondae Ue Ala mepau: Pelangkai ira amamu ka inemu; ka mbo'u: Isema anu tumutundalio amano ke ineno manasa hinuku mate. 5Sine mpotae komiu: Ba isema mepau ndi amano ke ineno: Hapa anu hina ndi ongkue anu tekona imentuwuako, pinesombaakoomo ndi Ondae Ue Ala, 6mia atuu siimo mbo'u ipelangkai ira amano ke ineno. Ba kanandio ime'oniniomo pau-Do Ue Ala hangano gaumiu. 7Hei mia anu mpo'onde-onde! Menteeomo pinau anu ta gagi pinauno Nabi Yesaya mongkona omiu:
8 #
Yes. 29:13; Mrk. 7:6-7 Tongku andio mpelangkai Aku a wiwido,
kahinaano aroado olai inso ndi Ongkue.
9Nahina tuduno dompesomba ndi Ongkue,
hangano pepaguru anu dompopaguruako onaemo parentano mia.”
10Ka Do'amba i Yesu moboi ira mia hadio ka Dopotaeako ira, 11”Imerongeo ka impe'ihi laroo: komba anu mewinso a laro nganga kumokoburutio mia, tendeano anu meluarako inso a ngangano, onaemo anu kumokoburutio mia.”
12Ka mehawe iramo ana guru-Do ka dompesikeno ndi Ondae, ”Ito'orio koake nine pinau-Miu atuu gagiomo watu tetiduado to Parisi?” 13Sumangki Ira i Yesu, ”Sompo pinopaho anu nahi Dopahoo Ama-Ku anu i suruga ta binuta saru luwuno hakano. 14#Luk. 6:39 Po'inee iramo koa mia atuudo. Ondae mia memorawu anu mpotaate mia morawu. Tewala mia morawu montaate mia morawu, manasa oruano tedonta a laro aa.”
15Ka i'amba motae i Peturu ndi Ondae, ”Ipauakamimo pengkonaano potundaano atuu.” 16Sumangki Ira i Yesu, ”Naapo koa mbo'uke impokonto'orio? 17Nahi imento'orioke nine luwuakoano anu mewinso a laro nganga metii a laro kompo ka i'amba tinadi a ngkakusu? 18#Mat. 12:34; Luk. 6:45 Sine hapa anu meluarako inso a nganga te'inso i aroa ka onaemo anu mopokomokoburu mia. 19Hangano inso i aroa me'umbaako luwuno pinewowolo mosa'o, pompepatea, ponsosaboa, pebelesua, ponakoa, sumpa nahi mentee ka pompepaukiako. 20Onaemo anu mompokomokoburu mia. Sine mongkaako kae nahi wino'ohi nahi pokomokoburuo mia.”
Beine to Kana'a anu mompe'ala-ala
15:21-28
(Mrk. 7:24-30)
21Ka Do'amba i Yesu lumako inso i tu'ai ka meliahako i wita Tirusi ka Sidoni. 22Ka haweomo aasa beine to Kana'a inso i wita atuu ka mebooli, ”Ipehohawa aku, oo Ue, Anano i Daudi, hangano anaku beine ipewinsokio onitu nsa'o ka tedoa mompemarasai.” 23Sine nahi Dosangkio i Yesu. Ka i'amba ana guru-Do me'aiwa ka me'emao ndi Ondae, ”Itenaomo ka ilako, itonda kita mpiha saru kokora-kora.” 24Sumangki Ira i Yesu, ”Ongkue tinena butu a luwuno bimba anu tetadi inso a bawaa Isaraeli.” 25Sine beine atuu merangkuhako ka ipesombai Ira ka ipotae, ”Ue, Itulungi aku.” 26Sine sumangki Ira i Yesu, ”Nahi tekona umalao roti anu pinatindaako nana'ote ka itendeakono dahu.” 27Motae beine atuu, ”Mentee Ue, sine dahu atuu mongkaa koa anu tesosala inso a medano ueno.” 28Onaemo ka Dosangki i Yesu ka motaeakono, ”Hei beine, langkai pompe'ala-alamu, ka gagiomo ndi omue kana anu ino'aroamu.” Ka i tempo koa mbo'u atuu tompaomo anano.
Ondae i Yesu mompokotompa hadio mia mahaki
15:29-31
29Mansa-Do bintao wita atuu, Ondae i Yesu melempa tumondao wiwi rano Galilea ka Dopewuatako a wawo pongku ka Dopentoro i tu'ai. 30Ka i'amba mia hadio ntehuhu me'aiwa ndi Ondae mpowawa mia luuka, mia tiimpa karu, mia morawu, mia beebe ka hadio mbo'u anu susua hakino, ka do'amba menaa ira a ngkaru-Do i Yesu ka Dopokotompa ira luwu. 31Ka mengkohali-hali iramo mia hadio atuu mengkitao mia beebe mepau, mia tiimpa karu tompa, mia luuka melempa, mia morawu mongkita, ka dome'unde-unde Ira Ue Alado to isaraeli.
Ondae i Yesu mompaka patonsowu mia
15:32-39
(Mrk. 8:1-10)
32Ka Do'amba i Yesu moboi ira ana guru-Do ka Dopotae, ”Telelu aroa-Ku mehohawa ira mia hadio atuu. Otolu oleomo domentonda Aku ka nahina kaangado. Nahi Kubehe tumena ira mpekule memokoninggo, mansa ira ntebangku a nsala.” 33Dompotae ana guru ndi Ondae, ”Kana'umpe a mpo'ianga boni-boni kanandio kita mpohawe roti pokomowohido mia anu kanandio hadiono?” 34Motae Ira i Yesu ndi ondae, ”Opia roti anu hina ndi omiu?” mesangki ira, ”Opitu,” ”ka hinao mbo'u ba opia bou kodei.” 35Ka Do'amba i Yesu tumena ira mia hadio atuu mpentoro a wita. 36Umarino atuu Do'alao opitu roti ka bou atuu, Dopekakaiakono, sumiba-sibao ka Doweeako ira ana guru-Do, ka i'amba ana guru-Do weeako ira mia hadio. 37Ka luwudo mpongkaa ranta mowohi. Ka do'amba mia mepumpuo siba-sibano roti anu torea, opitu baki buuke. 38Anu mpongkaa pato'etu nsowu tama, nahi tewinso beine ka nana'ote. 39Ka Do'amba i Yesu tumena ira mia hadio atuu mpekule. Ondae me'ula a bangka ka Dolako i wita Magadani.
Currently Selected:
I MATIU 15: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
