I MATIU 14
14
I Yohane Puu Mpobaho pinepate
14:1-12
(Mrk. 6:14-29; Luk. 9:7-9)
1I tempo atuu mehawe iramo lele mongkona Ondae i Yesu ndi Herode, mokole i wita atuu. 2Ka i'amba motaeako ira pegawaino, ”Onaemo andio i Yohane Puu mpobaho; mewanguomo inso i olodo mia mate ka onaemo pu'uno luwuno pabawa atuu mo'angga i laro-Do.” 3#Mrk. 6:17-18; Luk. 3:19-20 Hangano lano metenaomo i Herode ka irinako i Yohane, ponguo ka tumorungkuo, hangano i Herodia, beineno i Pilipu pepaekompono. 4#Ima. 18:16; 20:21 Hangano horio i Yohane kumuahakono, ipotae, ”Nahi moiko u'alao i Herodia!” 5I Herode mingki mepateo, sine idoitoako ira mia hadio anu mentuduo i Yohane nabi. 6Sine a oleo hinaano i Herode, lumenseomo anano i Herode anu beine i tonga-tongado ka mokomawongkoo aroano i Herode, 7onaemo ka ipesumpa i Herode ta moweeakono hapamo koa anu inemano. 8Ka mansano montisoakono ineno, motaeomo ana beine atuu, ”Iwee akumo i ndi'ai uluno i Yohane Puu mpobaho a aasa dula.” 9Ka i'amba masusaomo aroano mokole, sine hangano sumpano ka hangano hadio totokano meparenta koa ka iwineeako. 10Metenaomo umimpahio uluno i Yohane a ntorungku 11ka domewawaomo mia uluno i Yohane a aasa dula, ka i'amba wineeako ana beine atuu ka iwawao ndi ineno. 12Ka i'amba mehawe iramo ana guruno i Yohane Puu mpobaho me'alao wata ngkoroino ka domengkaburuo. Ka do'amba melako pauako Ira i Yesu.
Ondae i Yesu mompaka lima nsowu mia
14:13-21
(Mrk. 6:30-44; Luk. 9:10-17; Yoh. 6:1-13)
13Mansa-Do rumongeo i Yesu lele atuu meliahako Iramo inso i tu'ai, ka lumako Ira asa-asa-Do me'ula a bangka a mpo'ianga anu boni-boni. Sine domerongeo mia hadio ka domentonda Ira mpewita inso a luwuno kotado. 14Tempono Dopetii i Yesu inso a bangka, Dokita ira mia tedoa hadio, ka teleluomo aroa-Do mehohawa ira ka Dopoko tompa ira anu memahaki.
15Mansano tamo wongi, me'aiwa ira ana guru-Do ndi Ondae ka dompotae, ”Po'ianga andio boni-boni ka mompu'uomo wongi. Itena iramo mia hadio atuu ka domelako ka dompo'oli kaanga i inia.” 16Sine motae Ira i Yesu ndi ondae, ”Siimo domelako, omiu asalakono paka ira.” 17Mesangki ira, ”Anu hina ndi omami i ndi'ai butu roti olima ka bou orua.” 18Dopotae i Yesu, ”Wawaomo ramai ndi Ongkue.” 19Ka Do'amba tumena ira mia hadio atuu mpentoro a ewo. Ka mansa-Do umalao roti olima ka bou orua atuu, mentombu Ira i Yesu i langi ka Doronsoo, ka Do'amba sumiba-sibao roti atuu ka Doweeako ira ana guru-Do, ka do'amba ana guru tumia-tiaako ira mia hadio. 20Ka luwudo mpongkaa ranta mowohi. Ka do'amba mia mepumpuo luwuno sibano roti anu torea, hopulu ka orua baki buke. 21Anu mpongkaa bara'ura olima nsowu tama, nahi tewinso beine ka nana'ote.
Ondae i Yesu melempa a wawo uwoi
14:22-33
(Mrk. 6:45-52; Yoh. 6:16-21)
22Umarino atuu Ondae i Yesu dumarasi ira ana guru-Do mpe'ula a bangka ka dompese'elungi Ira hawe i asatowa, kontongaano atuu Dotena ira mia hadio mpekule. 23Ka umari-Do tumena ira mia atuudo mpekule, Ondae i Yesu mewuatako a wawo pongku ka Dopekakai asa-asa-Do. Tempono wongiomo, asa-asa-Do i tu'ai. 24Bangkado ana guru-Do olaiomo inso a wiwi ntahi ka ipopotende-tendeo bomba, hangano angi mokora. 25Bara'ura langku otolu wongi hawe Iramo i Yesu melempa a wawo uwoi. 26Tempono domengkita ira ana guru melempa a wawo uwoi, mentededengke ira ka dompebooli, ”Tuu onitu!”, ka do'amba mengkokora-kora hangano doito. 27Sine Ondae i Yesu ronga motaeako ira, ”Imperodoo aroamiu! Ongkue koa andio, si medoito!” 28Ka i'amba i Peturu mebooli ka sumangki Ira, ”Ue, ba Omiu atuu, Itena akumo aiwa ndi Omiu melempa a wawo uwoi.” 29Dopotae i Yesu, ”Aiwamo!” Onaemo ka ipetii i Peturu inso a bangka ka ipelempa a wawo uwoi tepohaweako Ira i Yesu. 30Sine mansano puurio angi, doitoomo ka mompu'u toondu ka i'amba mebooli, ”Ue, Itulungi aku!” 31Mompari-pari Ira i Yesu tumasiakono kae-Do, uminio ka Dopotae, ”Hei mia anu kodei pompe'ala-alano, tembio ka unanta-nanta?” 32Ka Do'amba mewuatako a bangka ka angi mbo'u temontoomo. 33Ka mia anu a laro bangka mpesombai Ira, dompotae, ”Menteeano Omiu Ana-Do Ue Ala.”
Ondae i Yesu mokotompa ira mia memahaki i Genesare
14:34-36
(Mrk. 6:53-56)
34Sahawe-Do i asatowa mpetii ira i Genesare. 35Mansado mento'orio mia a mpo'ianga atuu Ondae i Yesu, domempaleleo i asa wawo wita atuu. Ka luwuno mia anu mahaki mewinawa ndi Ondae. 36Mpo'ema ira ka dome'ineheako me'anggao wuakino lemba meloe-Do. Ka luwuno mia anu umangga Ira gagi tompa.
Currently Selected:
I MATIU 14: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
