Maleaki 1

Puu mpau

1:1

1Pau-Do i Ue.

Pau-Do i Ue a nto Isaraeli telalo ndi Maleaki.

Ondae i Ue mehohawa ira to Isaraeli

1:2-5

2 # Rom. 9:13 #Yes. 34:5-17; 63:1-6; Yer. 49:7-22; Yeh. 25:12-14; 35:1-15; Amo. 1:11-12; Oba. 1-14”Kupehohawa komiu,” pau-Do i Ue. Sine mpotae komiu, ’Kana'umpe ke Ipehohawa kami?’ ”Kombake i Esau atuu pepaekompono i Yako?” kanandiomo pau-Do i Ue. ”Kupehohawao i Yako, 3sine umo'aliaakono i Esau. Aku weweuo mentorukunono gagi boni-boni ka wita pusakano Kupokogagio pada one po'iangado serigala waino.” 4Tewala motae Edomi, ”Mempinerawo-rawo kamimo, sine kami koa wali mewanguo hangano kota atuu,” ka kanandiomo pau-Do Ueno luwuakoano, ”Moiko koa dompowangu, sine Aku koa mobangkuo. Mia ira meneeakono Wita Po'ewaia parenta-Do i Ue, ka tongku anu tinekudaako-Do i Ue ranta nahina tampulaano.” 5Matamu ta kumitao ka Omiu isa'a komiu mpotae, ”Ondae i Ue tedoa langkai lumaloio witado to Isaraeli.”

Pesomba anu mokoburu

1:6-14

6Asa nana'ote melangkaio amano ka asa ata melangkaio ueno. Tewala Ongkue andio ama, isuake pompelangkai ndi Ongkue? Tewala Ongkue andio ue, isuake doitomiu ndi Ongkue? pau-Do Ueno luwuakoano ndi ondae, hei luwuno sando mpesomba anu mentatao nee-Ku. Sine mpotae komiu, ”Kana'umpeke kimentatao nee-Miu?” 7Omiu mpowawa roti anu mokoburu a wawo meda pontunua pesomba-Ku. Sine mpotae komiu, ”Kana'umpeke kimengkokoburutio?” Saru mpopewowolo nine meda-Do i Ue moiko ipineruanahi! 8#Win. 15:21Tewala mpowawa komiu asa kondehora anu morawu ta pinesombaako, kombake atuu mosa'o? Tewala mpowawa komiu kondehora anu tiimpa karu ka mahaki, kombake atuu mosa'o? Po'arahako wawao atuu a anu pabawa i witamiu, nde ta tumarima komiu, ke moiko itotowokomiu? pau-Do Ueno luwuakoano. 9Kanandio-andio, ”Po'arahakomo pokomolusao aroa-Do Ue Ala, ka Dopehohawa kita!” Hangano kaemu ka igagi mongkona atuu. Nde Ira tumotowoo moikoke asa mia inso i olomiu? pau-Do Ueno luwuakoano. 10Ande-andeno hinao i olomiu anu tondoo pewowa ranta omiu nahi mpopolanga api a meda pontunua pesomba ndi Ongkue nahina pengkonaano. Nahi Aku tumarima komiu, pau-Do Ueno luwuakoano, ka nahi Aku mbo'u behe tumarimao pesomba inso a ngkaemiu. 11Hangano mompu'u saba oleo hawe sumooano, nee-Ku langkai i olodo tongku. A sompo po'ianga ta pinesombaako dupa mana mo'ahi tiano nee-Ku ka pesomba kana mbo'u anu morina, hangano langkai nee-Ku i olodo tongku, pau-Do Ueno luwuakoano. 12Sine impesombaakono saru mpotae, ”Meda-Do i Ue lano kinokoburuti ka kaanga anu kongko i tu'ai moiko ipineruanahi!” 13Mpotae komiu, ”Kitao, ndio butu mompokomasusa!” ka mempasinggiri Aku, pau-Do Ueno luwuakoano. Omiu mpowawa kondehora rinontu, kondehora anu tiimpa karu ka anu mahaki. Onaemo atuu anu winawamiu gagi pesomba. Aku memoikooke tumarimao inso a ngkaemiu? pau-Do i Ue. 14Tetotonaaomo anu mompopo'oo, anu hinao asa kondehora lakino i olodo bawaano pinotuwuno, ka ipontangaakonomo, sine ipesombaakono kondehora anu hinao tataano ndi Ondae i Ue. Hangano Ongkue andio Mokole anu langkai, pau-Do Ueno luwuakoano, ka nee-Ku dinoitoako i olodo luwuno tongku.

Currently Selected:

Maleaki 1: XMZ

Highlight

Compare

Copy