Maleaki 2

Pongkuahako-Do i Ue a nsando mpesomba

2:1-9

1Kanandio-andio, tiamumo parenta andio, hei luwuno sando mpesomba! 2Tewala nahi imperorongeakono ke pomperio melangkaio nee-Ku, pau-Do Ueno luwuakoano, Aku mompotii totonaa ndi omiu ka weweuo luwuno ronsomiu gagi totonaa. Mentee ntu'u, Aku tumotonaao, hangano nahi impomperio. 3Menteeano, Aku humuku ira inulemiu ka monaakono anu mokoburu a rupamiu, mokoburuno pesomba oleo langkaimiu. Komiu mewinawa merongaakono. 4#Pod. 3:11-13To'oriomo nine Ongkue anu mo'oliwi parenta andio ndi omiu, ka ikongko pinolempa pedandia-Ku saru to Lewi, pau-Do Ueno luwuakoano. 5#Pod. 25:12Pedandi-Ku saru onae, onaemo tuwua ka sintuwu manangai, Kuweeakono, saru mbo'u doito ka idoito ndi Ongkue ka mondende a nee-Ku. 6Pompaguru anu mentee kongko a laro ngangano ka anu sala nahi hinawe a wiwino. A laro rodoa ka moleoa onae melempa meronga Ongkue ka hadio mia iweweuo mpepokule inso a wineweuno anu sala. 7Hangano wiwino asa sando mpesomba mekariao ponto'ori ka mia mo'ungke pompaguru inso a ngangano, hangano onaemo tinena-Do Ueno luwuakoano. 8Sine omiu mepansia inso a nsala ka meweweuo hadio mia ntetiduako pompagurumiu; omiu mensolangio pedandia saru to Lewi, pau-Do Ueno luwuakoano. 9Ka Ongkue mbo'u weweukomiu tinetewehi ka pine'uru-uru i arodo bawaa andio, hangano omiu nahi mentondao sala-Ku, sine mpobiniki komiu a mpopagurumiu.

Pongkuahako-Do i Ue a mpekombiaa mesalo ka teponsuaa

2:10-16

10Kombake luwuto hinao asa ama? Kombake ontae pinokogagi-Do asa Ue Ala? Ka i'amba tembio ka tompedodontai pada ontaeto ranta kumokoburutio pedandiado uempu'uto? 11Yehuda nahi petenunu. Wineweu mokoburu iweweuo i Isaraeli ka i Yerusale, hangano Yehuda kumokoburutiomo po'ianga mempori anu pinehohawa-Do i Ue ka gagiomo tamano ana beine pinesombai susua. 12Po'ineeomo Dopokotampulao i Ue inso a luwuno kemano i Yako luwuno inuleno mia anu moweweu kanandio, maupo ipowawa pesomba ndi Ondae Ueno luwuakoano! 13Ndiomo anu ko'orua imeweweuo: Imentutuwiakono uwoi mata meda pontunua pesomba ndi Ondae i Ue, saru mpengese ka mpe'anaiki, hangano nahi Dopewolili mbo'u a mpesomba ka nami Dobehe tumarimao inso a ngkaemiu. 14Ka i'amba mpesikeno, ”Hangano hapa?” Hangano Ondae i Ue gagi Iramo sakosii i olomu ka kombiamu inso tempono umongura anu nahi upetenunuio, ka hinaano onaemo walimu a laro ntumuwumu ka kombia asa mpedandiamu. 15Kombake Ondae i Ue anu Asa koa mokogagi ira ihi ka penaa? Hapake po'ehe-Do i Ue anu Asa koa atuu? Inuledo bawaa-Do Ue Ala! Gagi, dagaiomo koroimu! Siimo maupo te'asa mia nahi petenunu a ngkombiano inso tempono imongura. 16Hangano Ku'o'aliaakono teponsuaa, pau-Do i Ue, Ue Alado to Isaraeli, ka mbo'u mia anu mesoumbuako pobobarasai, pau-Do Ueno luwuakoano. Dagaiomo koroimu ka petenunumo!

Ondae i Ue hawe mohuku

2:17–3:5

17Omiu mpokomasusa Ira i Ue hangano pinaumiu. Sine omiu mpesikeno, ”Kana'umpeke kimpokomasusa Ira?” Saru mpotae, ”Sompo mia anu moweweu mosa'o atuu moiko a pongkita-Do i Ue; Dopemoiko ira ke saru pesikeno isuake Ondae Ue Ala anu moleo atuu?”

Currently Selected:

Maleaki 2: XMZ

Highlight

Compare

Copy