Sakaria 14

Ondae i Ue gagi mokole i Yerusale

14:1-21

1Menteeano, ta hawe oleono ndi Ondae i Ue, tempono pinomuru inso ndi omue ta tinia-tia i tonga-tongamiu. 2Aku pumpu ira luwuno tongku ka dompeteaakono Yerusale. Kota atuu ta pinongko'ala, luwuno raha ta rinontu ka luwuno beine ta pinewowaliako. Entonga inso a mpalilino kota atuu asalakono melako a pontadia, sine anu susuano inso a tongku atuu nahi ta pinokotampula inso i kota atuu. 3Ka i'amba Ondae i Ue Ira lumako metea umewaio luwuno tongku atuu kana Dopetea a oleo peteaa. 4I tempo atuu karu-Do ta melanda a pongku wita Saitu anu po'iangano tepo'aro saru Yerusale i sabaano oleo. Pongku wita Saitu atuu ta tebansi orua inso i sabaano oleo hawe i sumooano oleo, ranta ka igagi lembono anu tedoa molue. Asa ntia orua inso a pongku atuu ta mepahe i utara ka asa ntia oruano mbo'u i selata. 5Komiu mempolai a lembono luwuno torukuno-Ku, hangano lembono torukuno atuu ta hawe i Asali. Komiu mempolai kana hori komiu mempolaiako lelu tempono i Usia, mokole i Yehuda. Ka i'amba Ondae i Ue, Ue Alaku, Ira hawe, ka luwuno mia mempori merongaako Ira. 6I tempo atuu nahina wanta butu pompemorini ka baaku. 7Sine ta hina asa oleo anu Doto'orio i Ue, nahina meene ke wongi, maupo i tempono wongi hinao wanta.

8 # Yeh. 47:1; Yoh. 7:38; Meng. 22:1 A oleo atuu uwoi tuwu ta waa inso i Yerusale, asa ntia oruano waa a ntahi i sabaano oleo, ka asa ntia oruano mbo'u a ntahi i sumooano oleo. Kanandiomo anu ta gagi i tempo motu'i ka i tempo morini. 9Ondae i Ue Ira gagi Mokole i asa wawontolino. I tempo atuu, Ondae i Ue atuu asa ka asa koa mbo'u nee-Do. 10Luwuno wita andio ta bali gagi kana lembono, inso i Geba hawe i Rimoni i selatano Yerusale. Sine kota andio ta kontasi-tasi ka kongko mpiha a mpo'iangano, inso a mpewowa langkai Benami hawe a mpo'iangano pewowa langkai tese'elu, onaemo pewowa langkai Siuno, ka inso a menara Hananeeli hawe a mpopuro'ia anggorodo mokole. 11#Meng. 22:3Mia ira mpo'ia mpiha i ra'ai, hangano poropua nahi ta hina mbo'u, ka Yerusale ta rodo mpiha.

12Ndiomo pohuku-Do i Ue anu Ira humukuakono luwuno tongku anu meteaakono Yerusale: ihido ta gagi moboo kontongaado da mpentade, matado ta gagi moboo a laro bolono ka elodo ta gagi moboo a laro ngangado. 13I tempo atuu ta gagi tewukaa langkai inso ndi Ondae i Ue i olodo, ranta singge mia uminio moroso kaeno pe'asa miano ka montande kae umewaio kaeno pe'asa miano. 14Yehuda mbo'u ta metea umewaio Yerusale. Ka i'amba pinumpuomo arataado luwuno tongku a mpetengi-tengi: wulaa, salaka ka sangka, porokono tedoa hadio. 15Pohuku kanatuu mbo'u ta umaluo ngara, bagali, unta, kalide ka luwuno pinotuwu anu kongko a laro luwuno pekemaado sorodadu atuu.

16 # Ima. 23:39-43 Umarino atuu luwuno mia anu tebinta inso i olodo tongku anu sumapoiomo Yerusale, ira me'aiwa mpenggolontu mpesombai Ira Mokole, Ueno luwuakoano a nta'u me'eu ta'u, ka ira mpokomaroao oleo langkai Laika Lewe Ngkeu. 17Sine tewala inso i olodo luwuno suku i tolino hinao anu nahi aiwa i Yerusale ta menggolontu mesombai Ira Mokole, Ueno luwuakoano, manasa ndi ondae nahi ta metii usa. 18Tewala sukudo to Masiri nahi dome'aiwa ka nahi dompe'aro, ndi ondae nahi ta metii usa. Ndiomo pohuku anu Do'aluako ira i Ue a luwuno tongku anu nahi aiwa mokomaroao oleo langkai Laika Lewe Ngkeu. 19Onaemo pohuku a nto Masiri ka pohuku a luwuno tongku anu nahi aiwa mokomaroao oleo langkai Laika Lewe Ngkeu.

20I tempo atuu ta teburi a dio-diono ngara, ”Mempori ndi Ondae i Ue!” ka luwuno kawali a raha-Do i Ue ta kana luwuno loea kodei ponsiwui i arono meda pontunua pesomba. 21Ka luwuno kawali i Yerusale ka i Yehuda ta gagi mempori ndi Ondae Ueno luwuakoano. Luwuno mia anu mompesombaako pesomba ta aiwa umalao ka numahuo i larono. Nahi ta hina mbo'u puu mpebalu-balu a raha-Do Ueno luwuakoano i tempo atuu.

Currently Selected:

Sakaria 14: XMZ

Highlight

Compare

Copy