Imama 24
24
Lana pehulu
24:1-4
1Ondae i Ue mepau ndi Musa, 2#Pel. 27:20-21”Parenta iramo to Isaraeli ka dompowawa ndi omue lana saitu ntu'u anu inisa pehulu, ranta kai melanga mpiha hulu. 3I Haruni asalakono umatorao mpiha luwuno hulu atuu i arono pelingo buruano songka-Do Ue Ala i larono Kema Tepotowoa, mompu'u ngkiniwia hawe mo'oru i aro-Do i Ue. Onaemo atuu asa pompakosi ndi omiu anu nahina tampulaano hawe asa mpinu'u. 4I wawono hulu mekaru inso a wulaa mpena asalakono kai atorao mpiha luwuno hulu atuu i aro-Do i Ue.”
Roti pesomba
24:5-9
5 #
Pel. 25:30
”Omue asalakono mo'ala tarigu moiko ntu'u ka montunu hopulu ka orua roti bonggoli inso ndi onae. Sompo roti bonggoli asalakono wineweu inso a orua ntia hopulu efa. 6Omue asalakono umatorao gagi orua ntuda, onoo roti asa ntuda i wawono meda inso a wulaa mpena atuu, i aro-Do i Ue. 7Asalakono ponaakono dupa ntu'u i wawono sompo tudano. Dupamo atuu anu asalakono gagi pepopoto'ori inso a roti atuu, asa pesomba tinunu ndi Ondae i Ue. 8Sompo oleo saba asalakono kai atorao mpiha i aro-Do i Ue. Onaemo pedandia anu nahina tampulaano inso a nto Isaraeli. 9#Mat. 12:4; Mrk. 2:26; Luk. 6:4Roti atuu tiano i Haruni saru luwuno anano ka asalakono domengkaano i asa po'ianga anu mempori, hangano onaemo anu tedoa mempori ntu'u tiano inso a luwuno pesomba tinunu ndi Ondae i Ue. Onaemo asa pompakosi anu nahina tampulaano.”
Mia montutundali nee-Do i Ue hinuku
Mperupa-rupa wineweu mosa'o
24:10-23
10I tempono asa oleo asa tama anu ineno to Isaraeli sine amano to Masiri, aiwa i tonga-tongano pekemaado to Isaraeli, ka mia atuu me'u'ua saru asa to Isaraeli a mpekemaa. 11Anano beine to Isaraeli atuu tumutundalio nee-Do i Ue saru tumotonaao, onaemo kai winawa ndi Musa. Ineno meneeako i Selomi anano i Debiri inso a nsuku Dani. 12Onae wininso a laro torungku sumikorio pomputusi menunu saru pau-Do i Ue. 13Ka i'amba mepau Iramo i Ue ndi Musa, 14”Wawaomo mia anu montotonaa atuu i bungkuno pekemaa ka luwuno mia anu rumongeo asalakono numaao kaeno a wawo uluno mia atuu. Ka i'amba luwuno bawaa asalakono wunoakono watu. 15Omue asalakono pauako ira to Isaraeli, kanandio: Sompo mia anu tumotonaao Ue Alano asalakono tumembio halano onaeno. 16Isema anu montutundali nee-Do i Ue, asalakono hinuku mate, luwuno bawaa wunoakono watu. Moiko mia hawe maupo bawaa ntu'u, tewala montutundali nee-Do i Ue, asalakono hinuku mate 17#Pel. 21:12Tewala asa mia mompepate pe'asa miano, onae asalakono hinuku mate. 18Isema anu mompepate asa pinotuwu, asalakono i'owahio euno, asa me'eu asa. 19Tewala asa mia weweuo pe'asa miano kai hina tataano, kanamo anu wineweuno, kanatuumo asalakono iwineweu ndi onae: 20#Pel. 21:23-25; Win. 19:21; Mat. 5:38tepudu me'eu tepudu, mata me'eu mata, ngisi me'eu ngisi. Kana iweweuo mia kai hina tataano, kanatuumo asalakono iwineweu ndi onae. 21Isema anu mompepate asa pinotuwu, asalakono i'owahio euno, sine isema anu mompepate pe'asa miano, onae asalakono hinuku mate. 22#Pod. 15:16Asa songka koona ndi omiu, moiko a mia hawe maupo bawaa ntu'u, hangano Ongkuemo Ue, Ue Alamiu.” 23Kanandiomo ipohaweo i Musa pau atuu a nto Isaraeli. Ka i'amba mia anu montotonaa atuu winawa i bungkuno pekemaa kai winunoako watu. To Isaraeli meweweuo kana peparenta-Do i Ue ndi Musa.
Currently Selected:
Imama 24: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
