Imama 23

Oleo langkai

23:1-44

1Ondae i Ue mepau ndi Musa, 2”Pepaumo a nto Isaraeli ka potaeako ira: Luwuno oleo langkai anu pinakosi-Do i Ue asalakono kai mento'orio gagi tepotowoa mempori. Luwuno oleo langkai anu Kupakosio onaemo kana tudano andio. 3#Pel. 20:8-10; 23:12; 31:15; 34:21; 35:2; Win. 5:12-14I larono onoo oleo anggaa moiko i'inangga, sine a oleo ko'opitu asalakono hinao saba, oleo penaa-naaa buke, asa oleo tepotowoa mempori. Maupo anggaa hapamokoa si me'anggao; onaemo saba ndi Ondae i Ue a luwuno po'iangamiu.

4Ndiomo luwuno oleo langkai anu pinakosi-Do i Ue, luwuno oleo tepotowoa mempori, anu asalakono imento'orio menunu saru tempo anu pinakosi. 5#Pel. 12:1-13; Win. 16:1-2#Pod. 28:16–29:40A wula amba-ambano, tanggala opaa wula atuu, i tempono ngkiniwia hinao Pasa ndi Ondae i Ue. 6#Pel. 12:14-20; 23:15; 34:18; Win. 16:3-8A oleo kohopulu ka olima wula atuu hinao oleo langkai Roti Nahi Peragi ndi Ondae i Ue. I larono opitu oleo asalakono impongkaa roti nahi peragi. 7A oleo amba-ambano asalakono impoweweu tepotowoa mempori ka si mpo'angga maupo anggaa hapamokoa anu mobea. 8Asalakono impopesombaako pesomba anu tinunu ndi Ondae i Ue i larono opitu oleo. A oleo ko'opitu asalakono hinao tepotowoa mempori ka omiu si mpo'angga maupo anggaa hapamokoa anu mobea.”

9Ondae i Ue mepau ndi Musa, 10”Pepaumo a nto Isaraeli ka potaeako ira: Tewala mehawe komiu a wita anu Aku weeakomiu, ka mposowi hasilino, asalakono impowawa te'asa nte'u inso a hasilino amba-ambano sinowimiu a sando mpesomba. 11Sando mpesomba asalakono tumandeo te'uno atuu i aro-Do i Ue, ka Dotarima komiu koa i Ue. Asalakono kai tandeo sando mpesomba umarino oleo saba. 12A oleo imentandeo tine'u atuu asalakono impesombaakono asa bimba umuruno asa nta'u anu nahina tataano gagi pesomba tinunu ndi Ondae i Ue, 13ka pesomba kaanga onaemo orua ntia hopulu efa tarigu moiko ntu'u, sinaloako lana gagi pesomba anu tinunu ndi Ondae i Ue, asa woono anu mompokomawongko, saru pesomba tinawa, onaemo asa ntia opaa hini anggoro. 14Hawe oleo mbo'u atuu si mpokaa roti, ke gandu sinompui ke gandu wo'ohu, ranta kai mpowawamo pesombamiu ndi Ondae Ue Alamiu. Onaemo asa pompakosi ranta nahina tampulaano ndi omiu hawe a inulemiu a luwuno po'iangamiu.

15 # Pel. 23:16; 34:22; Win. 16:9-12 Ka i'amba asalakono imedoao mompu'u inso a oleo umarino saba atuu, oleo imewawao tine'u pesomba tinande, opitu minggu buke 16hawe oleo umarino saba ko'opitu, ka asalakono kai medoao lima pulu oleo. Ka i'amba mpesombaakono pesomba kaanga anu wo'ohu ndi Ondae i Ue. 17Inso a mpo'iangamiu asalakono imewawao orua roti tandea anu wineweu inso a orua ntia hopulu efa tarigu moiko ntu'u ka anu tinunu umarino sinaloako ragi gagi wua amba-ambano ndi Ondae i Ue. 18Meronga saru roti atuu asalakono impesombaakono opitu bimba umuruno asa nta'u anu nahina tataano, asa sapi lakino mongura ka orua bimba lakino. Luwuno atuu asalakono gagi pesomba tinunu ndi Ondae i Ue, meronga saru pesomba kaanga ka luwuno pesomba tinawa, asa pesomba tinunu anu woono mokomawongko Ira i Ue. 19Ka i'amba asalakono mpesombaakono asa bembe lakino gagi pesomba po'onini hala ka orua bimba umuruno asa nta'u gagi pesomba tekaduduia. 20Sando mpesomba asalakono tumandeo luwuno atuu saru roti inso a wua amba-ambano atuu gagi pesomba tinande ndi Ondae i Ue, saru mbo'u orua bimba atuu. Luwuno atuu asalakono gagi pesomba mempori ndi Ondae i Ue ka gagi tiado sando mpesomba. 21A oleo mbo'u atuu asalakono impaleleo tepotowoa mempori ka si mpo'angga maupo anggaa hapamokoa anu mobea ranta nahina tampulaano a luwuno po'iangamiu asa mpinu'umiu. 22#Ima. 19:9-10; Win. 24:19-22I tempono imensowio hasilino witamiu, siimo imensewoo leremiu kai pingko hawe a wiwino ka siimo imebinio hapa anu tebinta inso a mponsowiamiu. Luwuno atuu asalakono imebintaako ira mia mongkokolaro ka mia hawe. Ongkuemo Ue, Ue Alamiu.”

23Ondae i Ue mepau ndi Musa, 24”Pauako ira to Isaraeli, kanandio: Tanggala asa wula ko'opitu, asalakono asa oleo atuu impokogagio oleo penaa-naaa ntu'u anu riname-rameako pompuuri tawuwua, asa tepotowoa mempori. 25Si mpo'angga maupo anggaa hapamokoa anu mobea ka asalakono impopesombaako pesomba ndi Ondae i Ue anu tinunu a api.”

26 # Ima. 16:29-34 Ondae i Ue mepau ndi Musa, 27”Sine a tanggala hopulu wula ko'opitu atuu onaemo oleo pesintuwua. Asalakono impoweweu tepotowoa mempori ka impe'urumako kai mempuasa saru mpopesombaako pesomba anu tinunu ndi Ondae i Ue. 28A oleo mbo'u atuu siimo impo'angga maupo anggaa hapamokoa. Onaemo atuu oleo pesintuwua kai mpoweweu pesintuwuamiu i aro-Do i Ue, Ue Alamiu. 29Menteeano, sompo mia anu a oleo atuu nahi pe'urumako saru mepuasa, asalakono pinokotampula inso i olodo mia pe'asa tongkuno. 30Sompo mia anu mo'angga maupo anggaa hapamokoa a oleo atuu, mia atuu Aku mepateo inso i tonga-tongano tongkuno. 31Siimo impo'angga maupo anggaa hapamokoa. Onaemo asa pompakosi anu nahina tampulaano ndi omiu asa mpinu'u a luwuno po'iangamiu. 32Onaemo atuu saba, oleo penaa-naaamiu ntu'u, ka asalakono impe'urumako saru mepuasa. Mompu'u a wongi tanggala osio wula atuu, inso a sumoono oleo hawe kai sumoo oleo, asalakono impelangkaio saba-Ku.”

33 # Win. 16:13-15 Mepau Ira i Ue ndi Musa, 34”Pauako iramo to Isaraeli, kanandio: A oleo kohopulu ka olima wula ko'opitu onaemo oleo langkai-Do i Ue, oleo langkai Laika Lewe Ngkeu, opitu oleo tehineno. 35A oleo amba-ambano asalakono hinao tepotowoa mempori. Siimo impo'angga maupo anggaa hapamokoa anu mobea. 36I larono opitu oleo asalakono impopesombaako pesomba tinunu ndi Ondae i Ue, ka a oleo anu ko'oalu asalakono impoweweu tepotowoa mempori saru mpopesombaako pesomba tinunu ndi Ondae i Ue. Onaemo atuu tepumpua langkai. Siimo impo'angga maupo anggaa mobea hapa.

37Onaemo atuu luwuno oleo langkai anu pinakosi-Do i Ue, anu asalakono imento'orio gagi tepotowoa mempori kai mpopesombaako pesomba tinunu ndi Ondae i Ue, onaemo pesomba tinunu ka pesomba kaanga, pesomba sinumbele ka luwuno pesomba tinawa, montonda hadiono anu pinakosi sompo oleono. 38Umarino atuu hinao luwuno oleo saba-Do i Ue ka hinao mbo'u luwuno pesombamiu ke luwuno pesomba pontangamiu ke luwuno pesomba moleono aroamiu anu pinesombaakomiu ndi Ondae i Ue.

39 # Pel. 23:16; 34:22 Sine a oleo kohopulu ka olima wula ko'opitu atuu, i tempono imempumpuo hasilino witamiu, asalakono impoweweu porame-ramea ndi Ondae i Ue opitu oleo tehineno. A oleo amba-ambano asalakono hinao penaa-naaa ntu'u ka a oleo anu ko'oalu mbo'u hinao penaa-naaa ntu'u. 40A oleo amba-ambano asalakono impo'ala wua inso a luwuno keu anu moiko, popano keu koroma, sampa-sampano keu anu marombo ka inso a ngkeu gandarusa. Asalakono imemawongko i aro-Do i Ue, Ue Alamiu, opitu oleo tehineno. 41Asalakono imerame-rameo gagi porame-ramea ndi Ondae i Ue opitu oleo tehineno i larono asa nta'u. Onaemo atuu asa pompakosi ndi omiu anu nahina tampulaano asa ntinuwu. A wula anu ko'opitu asalakono imerame-ameo. 42Omiu asalakono mpo'ia a luwuno laika lewe ngkeu opitu oleo tehineno. Sompo bawaa ntu'u i Isaraeli asalakono mo'ia a luwuno laika lewe ngkeu, 43ka domento'orio inulemiu nine Kutena iramo to Isaraeli mpo'ia a luwuno laika lewe ngkeu tempono Kutaate ira umarido mpeluarako inso i wita Masiri. Ongkuemo Ue, Ue Alamiu.” 44Kanandiomo ipauako ira i Musa a nto Isaraeli pau mongkona luwuno oleo langkai anu pinakosi-Do i Ue.

Currently Selected:

Imama 23: XMZ

Highlight

Compare

Copy