Imama 20

Memporino bawaa-Do i Ue

20:1-27

1Ondae i Ue mepau ndi Musa, 2”Omue asalakono mepau a nto Isaraeli: Sompo mia, moiko to Isaraeli maupo mia hawe anu mpo'ia i Isaraeli anu mompeweengako luwuno anano ndi Moloko, onae asalakono hinuku mate; palili i wita atuu asalakono wunoakono watu. 3Ongkue isa'a anu umaropio mia atuu ka mokotampulao inso i tonga-tongano tongkuno. Hangano ipeweengakono asa inso a luwuno anano ndi Moloko saru tinoono weweuo mokoburu po'ianga mempori-Ku ka lumaloo memporino nee-Ku anu mempori. 4Sine tewala palili wita mpo'ineeo mia atuu meweengakono asa inso a luwuno anano ndi Moloko ka nahi domehuku mateo mia atuu, 5manasa Ongkue isa'a anu umaropio mia atuu saru asa nsomborino ka mokotampulao inso i tonga-tongano tongkuno saru luwuno mia anu tumondao mososabo, onaemo monsosabo mesombaio i Moloko. 6Mia anu momperorohi a onituno mia mate ke a mia anu mompau anu ta gagi, monsosaboako pesikenono ndi ondae, Ongkue isa'a anu umaropio mia atuu ka mokotampulao inso i tonga-tongano tongkuno. 7Asalakono impokomemporio koroimiu ka igagi mempori, hangano Ongkuemo Ue, Ue Alamiu.

8Asalakono impe'ini a pompakosi-Ku ka imeweweuomo. Ongkuemo Ue anu mokomemporikomiu. 9#Pel. 21:17; Mat. 15:4; Mrk. 7:10Tewala asa mia montutundali amano ke ineno, onae asalakono hinuku mate. Onae montutundaliomo amano ke ineno, asalakono reano itembio onaeno. 10#Ima. 18:8-23#Pel. 20:14; Win. 5:18Tewala asa tama monsosabo saru kombiano mia susua, monsosabo saru kombiano pe'asa miano, moiko tama maupo beine anu monsosabo atuu asalakono hinuku mate. 11#Win. 22:30; 27:20Tewala asa tama monsosabo saru kombiano amano, onae sumungkeo anuno amano. Orua ira asalakono hinuku mate, ka reado dotembio ondaedo. 12Tewala asa tama moturi saru ponino beine, kombiano anano tama, orua ira asalakono hinuku mate. Moweweu iramo anu nahi tekona; reado dotembio ondaedo. 13Tewala asa tama moturi saru tama susua kana mewowaliako beine orua ira moweweu anu mokoburu. Ondae asalakono hinuku mate ka reado dotembio ondaedo. 14#Win. 27:23Tewala asa tama mo'ala asa beine ka ineno, onae atuu moweweu mokoburu. Onae ka orua ira beine atuu asalakono tinunu, kasihina wineweu mokoburu i tonga-tongamiu. 15#Pel. 22:19; Win. 27:21Tewala asa tama mompewowaliako saru asa kondehora, asalakono kai hinuku mate, ka maupo kondehora atuu asalakono ipinepate. 16Tewala asa beine morangkuhi kondehora maupo hapamokoa ka ipewowaliakono, beine ka kondehora atuu asalakono ipinepate. Ondae asalakono hinuku mate ka reado dotembio ondaedo. 17#Win. 27:22Tewala asa tama mo'ala pepaekompono beine, anano amano ke anano ineno ka dopewowali, onae atuu asa mo'o'anua. Ondae asalakono pinokotampula i arodo luwuno mia pe'asa tongkudo. Mia atuu isungkeomo anuno pepaekompono beine, ka onae asalakono tumembio salano onaeno. 18Tewala asa tama moturi saru asa beine anu tekonai i'aluo wulano, isungkeakono anuno beine atuu ka beine atuu sumungkeo mbo'u peluarakono rea ka tama atuu umungkahio pewaluno peluarakoano rea; orua ira asalakono pinokotampula inso i tonga-tongano tongkudo. 19Si sungkeo anuno pepaekompo beine inemu ke pepaekompono beine amamu, hangano anuno pepaekompo onaeno anu inungkahino. Asalakono dotembio ondaedo salado. 20Tewala asa tama moturi saru kombiano pepaekompono amano, isungkeo anuno pepaekompono amano. Ondae ta tumembio halado ondaedo ka mate ira nahina anado. 21Tewala asa tama mo'ala kombiano pepaekompono, onae atuu moweweu mokoburu, hangano isungkeo anuno pepaekompono tama. Ondae nahi ta me'ana.

22Asalakono impe'ini a luwuno pompakosi-Ku a atora-Ku saru meweweuo luwuno atuu, kasi lua komiu wita ba isua Aku wawa komiu kai mpo'iangario. 23Si mentuwu mpotonda gaudo tongku anu Aku sumaari ira inso i aromiu. Hangano luwuno atuu domeweweuomo, ranta kai mokoburu-Ku kumita ira. 24Sine, ndi omiu mepau Akumo: Omiumo anu komiu mpetorokio witado ka Ongkuemo anu weeakomiu kai mpe'ueo, asa wita anu hadio ntu'u susu ka siu hoanino. Ongkuemo Ue, Ue Alamiu anu monsia komiu inso a luwuno tongku susua. 25Asalakono imposinggeo kondehora nahi mokoburu saru anu mokoburu, ka manu-manu anu mokoburu saru anu nahi mokoburu, kasi megagi mokoburu hangano kondehora mekaru opaa ka manu-manu saru luwuno anu melele a wawo wita, anu Kuponsiaomo gagi anu mokoburu ndi omiu. 26Omiu asalakono gagi mempori ndi Ongkue, hangano Ongkue andio Ue, mempori ka Kuponsia komiumo inso a luwuno tongku susua, kai megagi bawaa-Ku.

27Tewala asa tama ke beine mompoboi onituno mia mate ke penaa anu mompau hapa anu ta gagi, ondae asalakono hinuku mate, winunoako watu. Reado dotembio ondaedo.”

Currently Selected:

Imama 20: XMZ

Highlight

Compare

Copy