Imama 21
21
Memporido luwuno sando mpesomba
21:1-24
1Ondae i Ue mepau ndi Musa, ”Pepaumo a luwudo sando mpesomba, luwuno anano i Haruni ka potaeako ira: Asa sando mpesomba si weweuo koroino mokoburuako mia mate i olodo mia pe'asa tongkuno, 2sangkadio tewala anu mate atuu pe'etuno umpeda: ineno, amano, anano tama ke beine, pepaekompono tama, 3pepaekompono beine anu da ana beine ka umpeda saru onae hangano napi pekombia. Saru ondae atuu moiko imokoburuakono koroino. 4Gagi tamano kombiano siimo ipo'ineeo koroino mokoburu i olodo mia pe'asa tongkuno ka anu kanandio molalo memporino.
5 #
Ima. 19:27-28; Win. 14:1 Si mengkeruo asantia wuuno uluno, mengkeruo wiwino danggono, ka mensorekio kuli ngkoroino. 6Ondae asalakono mempori ndi Ondae Ue Alado ka si domelaloo memporino nee-Do Ue Alado. Hangano ondaemo anu mpopesombaako luwuno pesomba tinunu ndi Ondae i Ue, gagi pesomba ndi Ondae Ue Alado, ka hangano atuu ondae asalakono mempori. 7Si dompo'ala asa beine belesu ke anu nahi da ana beine ke anu pinonsuano tamano, hangano sando mpesomba atuu mempori ndi Ondae Ue Alano. 8Asalakono imentuduo onae mempori, hangano onaemo anu mompesombaako pesomba ndi Ondae Ue Alamiu. Onae asalakono mempori ndi omiu, hangano Ongkue, Ue, anu mokomempori komiu mempori. 9Tewala ana beine anano asa sando mpesomba mo'ineeo memporino koroino gagi pebelesua, onae lumaloo memporino amano, ka onae asalakono tinunu a api.
10Sando mpesomba langkai i olodo luwuno pepaekompono anu umariomo inurapiako lana po'urapi inuwu i wawo uluno, ka anu rinonso saru pinokonaako ndi onae sangka mempori, siimo ipo'ineeo wuuno tekale ka siimo ipoberi sangkano. 11Siimo i'umpedaakono luwuno wata ngkoroi, tendeano onae si pokomokoburuo koroino hangano wata ngkoroino amano ke ineno. 12Siimo ipeluarako inso a mpo'ianga mempori kasi laloo memporino po'ianga mempori-Do Ue Alano, hangano onae pinesusuaako lana po'urapi-Do Ue Alano i wawo uluno. Ongkuemo Ue. 13Onae asalakono mo'ala asa beine anu da ana beine. 14Siimo ipo'ala asa tuwu beine, beine anu pinensuaako anu sinolangi memporino, ke beine belesu, tendeano asalakono asa da ana beine inso i olodo mia pe'asa tongkuno, 15kasi laloo memporino inuleno i olodo mia pe'asa tongkuno, hangano Ongkuemo Ue anu mokomemporio.”
16Ondae i Ue mepau ndi Musa, 17”Pauakonomo i Haruni, kanandio: Sompo mia inso i olodo luwuno inulemu anu hinao tataano, nahi moiko i'aiwa umpeda ta mompesombaako pesomba ndi Ondae Ue Alano. 18Menteeano sompo mia anu hinao tataano nahi moiko i'aiwa umpeda: mia morawu, mia tiimpa karu, mia anu hinao tataano a rupano, mia anu ondau lahi parewa ngkoroino, 19mia anu tepudu karuno ke kaeno, 20mia anu mempalasa ke biilo ke anu sirere matano, mia anu mengkumbi ke merasa ke anu masola wuku nsu'uluino. 21Sompo mia inso a inuleno sando mpesomba Haruni anu hinao tataano, nahi moiko i'aiwa ta mompesombaako luwuno pesomba anu tinunu ndi Ondae i Ue. Hangano onae hinao tataano siimo i'aiwa umpeda ta mompesombaako pesomba ndi Ondae Ue Alano. 22Mongkona pesomba ndi Ondae Ue Alano, moiko luwuno pesomba tedoa mempori maupo luwuno pesomba mempori moiko ikaano. 23Butu siimo i'aiwa hawe a nsawu pelingo ka siimo i'umpedaakono meda pontunua pesomba, hangano onae hinao tataano, kasi laloo memporino luwuno po'ianga mempori-Ku, hangano Ongkuemo Ue, anu mokomempori ira.” 24Kanandiomo ipohawe i Musa pau atuu ndi Haruni ka luwuno anano saru luwuno to Isaraeli.
Currently Selected:
Imama 21: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
