Imama 19

Memporino tumuwu

19:1-37

1Ondae i Ue mepau ndi Musa, 2#Ima. 11:44-45; 1Pet. 1:16”Pepaumo a luwuno bawaa Isaraeli ka potaeako ira: Asalakono kai memempori, hangano Ongkue Ue, Ue Alamiu mempori. 3#Pel. 20:8; 12; Win. 5:12, 16Sompo mia i olomiu asalakono pelangkaio ineno ka amano saru mekakaakono luwuno oleo saba-Ku. Ongkuemo Ue, Ue Alamiu. 4#Win. 27:15Si mpewolili a luwuno lahumoa, ka si mpoweweu pesombaamiu susua anu tinawa. Ongkuemo Ue, Ue Alamiu. 5Tewala komiu mpopesombaako pesomba tekaduduia ndi Ondae i Ue, asalakono impesombaakono kanandio, ka i'amba Dopekonokomiu i Ue. 6Pesomba atuu asalakono kinaa a oleo impesombaakono ke tisomono, sine hapa anu torea hawe a oleo ko'otolu asalakono tinunu kai pingko. 7Tewala kinaa mbo'u a oleo ko'otolu, asalakono atuu ta gagi asa anu mokoburu ka Ondae i Ue nahi Dopekonoo mia atuu. 8Isema anu kumaano ta tumembio salano onaeno, hangano isosa'akiomo hapa anu mempori ndi Ondae i Ue. Mia atuu asalakono pinokotampula inso a tongkuno.

9 # Ima. 23:22 Tempono imposowi hasilino witamiu, siimo pingko imensewoo leremiu hawe a wiwino, ka siimo imebinio hapa anu tebinta inso a mposowiamiu. 10Lere anggoromiu si me'opuo kompenduano hasilino ka wuano anu tedonta i lere anggoromiu si mebinio, sine luwuno atuu asalakono imembintao tiado mia mongkokolaro ka mia hawe. Ongkuemo Ue, Ue Alamiu. 11#Pel. 20:15-16; Win. 5:19-20Si mponako, si mpegaupi, si mpopopo'oo pe'asa miamiu. 12#Pel. 20:7; Win. 5:11; Mat. 5:33Si mpesumpa nahi mentee a nee-Ku, kasi mensosa'ario nee-Do Ue Alamiu. Ongkuemo Ue. 13#Win. 24:14-15 Si mporontu a pe'asa miamiu nahi pototono ka si mporontu. Siimo unaao tambono asa mia mo'angga asa oleo hawe tisomo. 14#Win. 27:18Si tutundalio mia mobongo ka i arono mia morawu si ponaa watu tetidua, sine asalakono imedoitoako Ira Ue Alamiu. Ongkuemo Ue. 15#Pel. 23:6-8; Win. 16:19Si memolengku a mpopaua kara-kara: si mpo'alaako mia mongkokolaro ke mentondao po'ehedo mia langkai potorono, sine asalakono impopau mentee kara-karado pe'asa miamiu. 16Si melako ngkoraane ngkoramai mompalele petuluri i olodo mia pe'asa tongkumu; si mpokodoitoo tuwuno pe'asa miamu. Ongkuemo Ue.

17 # Mat. 18:15 Si o'aliaakono pepaekompomu i laro aroamu. Asalakono kuahakono pe'asa miamu i arono ka nahi poweweuakomu halamu hangano onae. 18#Mat. 5:43; 19:19; 22:39; Mrk. 12:31; Luk. 10:27; Rom. 13:9; Gal. 5:14; Yak. 2:8Siimo potuntu pobalasi, ka siimo ponaa-naa aroa a luwuno mia pe'asa tongkumu, tendeano pehohawaomo pe'asa miamu kana koroimu. Ongkuemo Ue.

19Asalakono impe'ini a pompakosi-Ku. Si pompopokombia orua rupa pinotuwu, si mporawo i leremiu orua rupa inii ka si mpopake sangka anu wineweu inso a orua rupa sawuno.

20Tewala asa tama mewowaliako asa beine, asa ata anu pinatindaako tama susua sine napi tinolosi ka napi pinokomaradeka, manasa poweweu atuu asalakono hinuku. Sine kasi dohinuku mate orua ira, hangano beine atuu napi pinokomaradeka. 21Tama atuu asalakono mowawa pontolosi salano ndi Ondae i Ue a mpewowano Kema Tepotowoa, onaemo asa bimba lakino gagi pesomba pontolosi sala. 22Sando mpesomba asalakono moweweu pesintuwua tiano mia atuu mompake bimba lakino pesomba pontolosi sala ndi Ondae i Ue, hangano hala anu iweweuomo, ranta kai pohawe te'oninino halano atuu.

23Tewala mpewinso komiumo i wita atuu ka mpopaho mperupa-rupa pinopaho wua ngkeu, asalakono imentuduo luwuno wuano mokoburu. I larono otolu nta'u luwuno wua ngkeu atuu mokoburu ndi omiu ka si mengkaano. 24Sine ta'u anu ko'opaa luwuno wuano asalakono gagi pesomba mempori, asa po'unde-unde ndi Ondae i Ue. 25A nta'u ko'olima ka i'amba moiko impokaa wuano, kai mentiniangiako hasilino. Ongkuemo Ue, Ue Alamiu.

26 # Ima. 17:10; Win. 18:10 Si mpongkaa hapa anu da hinao reano. Si mpoweweu pontasere ke mpopau anu ta gagi. 27#Ima. 21:5Si mengkeruo wuu a wiwino ulumiu ka si mensolangio wiwino danggomiu. 28Si mensorekio koroimiu hangano mia mate ka si meduduhuo kulimiu gagi petondoni; Ongkuemo Ue. 29#Win. 23:17Si mensolangio memporino anamu beine ka impokogagio beine belesu, kasi mpoweweu pebelesua i wita atuu kai bukeako wineweu mokoburu. 30Asalakono impekakaakono luwuno oleo saba-Ku ka impelangkaio po'ianga mempori-Ku; Ongkuemo Ue. 31#Win. 18:11Si mpewolili a onituno mia mate ke a luwuno penaa anu mompau hapa anu ta gagi; si me'ungke ira kai megagi mokoburu hangano ondae. Ongkuemo Ue, Ue Alamiu.

32Omue asalakono impentade i arodo mia me'uwa, melangkai ira mia anu mota'u, ka doitoako Ira Ue Alamu. Ongkuemo Ue. 33#Pel. 22:21Tewala asa mia hawe mo'ia ndi omiu i witamiu, si mempokonsiio. 34Mia hawe anu mo'ia ndi omiu asalakono imentuduo mengkena kana to Isaraeli ntu'u i olomiu. Impehohawaomo kana koroimiu, hangano i ndi'ipua omiu mbo'u mia hawe i wita Masiri; Ongkuemo Ue, Ue Alamiu. 35#Win. 25:13-16Si mpoweweu molengku a laro mpopaua kara-kara, mongkona posongka, pongkati, ka ponsa'u. 36Asalakono impopake timbanga ka watu timbanga anu mentee, efa ka hini anu mentee; Ongkuemo Ue, Ue Alamiu anu wawakomiu mpeluarako inso i wita Masiri. 37Kanandiomo asalakono impe'ini a luwuno pompakosi-Ku da luwuno parenta-Ku saru weweuo luwuno atuu; Ongkuemo Ue.”

Currently Selected:

Imama 19: XMZ

Highlight

Compare

Copy