Imama 18

Memporino pekombiaa

18:1-30

1Ondae i Ue mepau ndi Musa, 2”Pepaumo a nto Isaraeli ka potaeako ira: Ongkuemo Ue, Ue Alamiu. 3Siimo impoweweu kana anu wineweudo mia i wita Masiri a mpo'iangamiu i ndi'ipua. Siimo mbo'u impoweweu kana anu wineweudo mia i wita Kana'a ba isua Aku wawa komiu. Siimo imentuwu montonda gaudo. 4Asalakono imeweweuo atora-Ku ka mpe'ini a pompakosi-Ku saru mentuwu mentondao luwuno atuu. Ongkuemo Ue, Ue Alamiu. 5#Neh. 9:29; Yeh. 18:9; 20:11-13; Luk. 10:28; Rom. 10:5; Gal. 3:12Mentee ntu'u omiu asalakono mpe'ini a pompakosi-Ku ka atora-Ku. Mia anu weweuo ta tuwu hangano onae. Ongkuemo Ue.

6Isemamokoa i olomiu si pewowaliakono pe'etu umpedano kai sungkeo anuno. Ongkuemo Ue. 7Si sungkeo anuno amamiu, ka sumungkeo anuno inemiu. Onae atuu inemiu, onaemo si sungkeo anuno. 8#Ima. 20:1-5, 10-21; Win. 27:20-23Si sungkeo anuno kombiano amamu, hangano anu atuu anuno amamu. 9Anuno pepaekompomu beine, moiko anano amamu maupo anano inemu, moiko anu hina i rahano amamu maupo anu hina a raha susua, si sungkeo anuno. 10Anuno ana beine inso a anamu tama ke anamu beine, si sungkeo, hangano anumu omuemu. 11Anuno ana beine inso a asa kombiano amamu anu hina inso ndi amamu, si sungkeo anuno, hangano onae pepaekompomu beine. 12Si sungkeo anuno pepaekompono amamu anu beine, hangano onae pepaekompono amamu. 13Si sungkeo anuno pepaekompono inemu anu beine, hangano onae pepaekompono inemu. 14Si sungkeo anuno kombiano pepaekompono tama amamu, si pewowaliakono kombiano, hangano onae kombiano pepaekompono amamu. 15Si sungkeo anuno ponimu beine, hangano onae kombiano anamu tama. Si sungkeo anuno. 16Si sungkeo anuno kombiano pepaekompomu tama, hangano anu atuu sungkeo anuno tama. 17Si sungkeo anuno asa beine ka anano beine. Si po'ala ana beine inso a anano tama ke inso a anano beine ka sungkeo anuno, hangano ondae rea ka ihimu. Wineweu atuu mokoburu. 18Si alao pepaekompono beine kombiamu gagi samburueno kai sungkeo anuno i larono beineno atuu da tuwu. 19Si rangkuhio beine tempono i'aluo wulano anu weweuo kai mokoburu kosungkeo anuno. 20Si pewowaliakono kombiano pe'asa miamu, ranta kau gagi mokoburu saru onae.

21Si peweengakono aasa anamu inso a luwuno anamu kai pinesombaako ndi Moloko, kasi ulaloo memporino nee-Do Ue Alamu. Ongkuemo Ue. 22Si poturi saru tama kana mewowaliako beine. Onae atuu asa anu mokoburu. 23Si pompewowaliako maupo kondehora hapamokoa, ranta kau gagi mokoburu saru kondehora atuu. Asa beine si pentade i arono asa kondehora ta mewowaliakono, hangano wineweu kanatuu nahi tekona.

24Si pokogagio mokoburu koroimiu inso a luwuno atuu, hangano atuu luwuno tongku anu Aku sumaario inso i aromiu, dompokomokoburuoomo koroido. 25Wita atuu gagiomo mokoburu ka Kupombaloakonomo salano ndi onae, ranta wita atuu lumua ira palilino. 26Sine, omiu asalakono mpe'ini mpiha a pompakosi-Ku ka atora-Ku, ka si mpoweweu maupo te'asa inso a luwuno anu mokoburu atuu, moiko bawaa ntu'u ke maupo mia hawe anu mpo'ia i tonga-tongamiu, 27hangano luwuno anu mokoburu atuu domeweweuomo palili wita se'eluno omiu, onaemo wita atuu gagi mokoburu, 28kasikoa luakomiu io wita atuu, tewala impokomokoburuo, kana umariomo iluakonomo tongku anu se'eluno omiu. 29Hangano sompo mia anu moweweu maupo hapamokoa inso a luwuno anu mokoburu atuu, mia atuu asalakono pinokotampula inso i tonga-tongano tongkuno. 30Onaemo pu'uno omiu asalakono me'inio anu lano tekona imeweweuo ndi Ongkue, kasi mpoweweu te'asa inso a gau anu mokoburu atuu, anu wineweudo se'eluno omiu, ka si meweweuo koroimiu mokoburuako luwuno atuu. Ongkuemo Ue, Ue Alamiu.”

Currently Selected:

Imama 18: XMZ

Highlight

Compare

Copy