Imama 17

Ponsumbelea ka mompesombaako pesomba

17:1-9

1Ondae i Ue mepau ndi Musa, 2”Pepaumo ndi Haruni, a luwuno anano ka a luwuno to Isaraeli, ka potaeako ira: Ndiomo pau anu parenta-Do i Ue: 3Sompo mia inso a nto Isaraeli anu monsumbele sapi ke bimba ke bembe i larono ke i bungkuno pekemaa, 4sine nahi wawao a mpewowano Kema Tepotowoa kai pinesombaako gagi pesomba ndi Ondae i Ue i arono Kema Mempori-Do i Ue, mongkona atuu asalakono pinototoiako a mia atuu gagi pasua rea; mia atuu mo'uwuomo rea ka asalakono pinokotampula inso i tonga-tongano tongkuno. 5Tinoono ka domewawao to Isaraeli pesomba sinumbele anu wela pinesombaakodo a mpada, kanandio-andio ndi Ondae i Ue a mpewowano Kema Tepotowoa ka dompeweengakono a sando mpesomba ka ipesombaakono ndi Ondae i Ue gagi pesomba tekaduduia. 6Sando mpesomba asalakono ipesiwuiakono reano a meda pontunua pesomba anu-Do i Ue i arono pewowano Kema Tepotowoa ka tumunuo tabano gagi woono anu mokomawongko Ira i Ue. 7Siimo mbo'u dompopesombaako pesombado a onitu kana bembe, hangano mesomba a onitu bembe onaemo monsosabo. Onaemo atuu anu asalakono gagi pompakosi ranta nahina tampulaano ndi omiu hawe a inulemiu. 8Asalakono pauako ira: Sompo mia inso a nto Isaraeli ke inso a mia hawe anu mpo'ia i tonga-tongado, anu mompesombaako pesomba tinunu ke pesomba sinumbele, 9sine nahi wawao a mpewowano Kema Tepotowoa kai pinesombaako ndi Ondae i Ue, manasa mia atuu asalakono pinokotampula inso a tongkuno.”

Pepo'onto mongkaa rea ke kondehora mate onaeno

17:10-16

10 # Teg. 9:4; Ima. 7:26-27; 19:26; Win. 12:16, 23; 15:23 ”Sompo mia inso a tongku Isaraeli ka inso a mia hawe anu mpo'ia i tonga-tongado anu mpokaa maupo reano hapamokoa, Ongkue-Ku umewaio anu mongkaa rea atuu ka mokotampulao inso i tonga-tongano tongkuno. 11#Ibr. 9:22Hangano penaa anu tuwu kongko a laro reano ka Kuweeakomiumo rea atuu i wawono meda pontunua pesomba kai mpoweweu pesintuwua tiano penaamiu; reamo anu moweweu pesintuwua molalo penaa. 12Onaemo pu'uno Kupepau a nto Isaraeli: Maupo te'asa mia i olomiu si hina mongkaa rea. Kanatuukoa mbo'u mia hawe anu mpo'ia i tonga-tongamiu nahi bisa ipongkaa rea. 13Sompo mia inso a nto Isaraeli ka inso a mia hawe anu mpo'ia i tonga-tongamiu anu mompoko'ala asa kondehora ke manu-manu anu moiko ikinaa, asalakono ime'uwuo reano kai mehowuiakono wita. 14Hangano rea atuumo penaano luwuno anu tuwu. Onaemo pu'uno mepau Akumo a nto Isaraeli: Reano hapamokoa anu tuwu si mengkaano, hangano rea atuumo penaano luwuno anu tuwu. Sompo mia anu mengkaano asalakono pinokotampula. 15Sompo mia anu mongkaa kondehora mate onaeno ke toreano kondehora lambaha, maupo bawaa ntu'u ke maupo mia hawe, asalakono ilomboo sangkano, koroino iwo'ohiakono uwoi ka onae mokoburu hawe sumoo oleo, umarino atuu ka i'amba nahi mokoburu. 16Sine, tewala onae nahi lomboo sangkano ka nahi wo'ohiakono uwoi koroino, onae ta tumembio salano onaeno.”

Currently Selected:

Imama 17: XMZ

Highlight

Compare

Copy