Yosua 20

Luwuno kota tekaduduia

20:1-9

1 # Pod. 35:9-28; Win. 4:41-43; 19:1-13 Mepau Iramo i Ue ndi Yosua, 2”Pauako ira to Isaraeli, kanandio: Impontiso kota tekaduduia, anu Kupauakomiu telalo ndi Musa, 3nde ba isema mompepate mia nahi ipe'inungakono, ka lano nahina tinoono ta mompepate, mokompolai i raane, ranta luwuno kota atuu anu gagiomo po'ianga tekaduduiano inso a potuntu pontolosi rea. 4Ba ipolai a nte'asamokoa kota atuu, asalakono ka ipentade i arono pewowa kota ka ipauo teweweuno a mia memota'u i kota. Asalakono ka dome'eheakono ipo'ia i kota atuu, ka dompoweakono po'iangaano, ranta ka ipo'ia ndi ondae. 5Ba mansa anu mpotuntu tolosino rea atuu lumuluo mia anu mompepate atuu, nahi ta pineweengako ndi ondae, nde onae mompepate pe'asa miano nahina tinoono se'elu, ka se'eluno nahi o'aliaakono. 6Asalakono ka ipo'ia mpiha i kota atuu ranta ka iwinawa a nterisoa bawaa ka i binitara, ranta sando mpesomba langkai tempo atuu mate. Ka i'amba mia anu mompepate atuu moikoomo ipekule i kotano i rahano, ia kota te'insoano molai.”

7Onaemo ka to Isaraeli mpopakosi kota anu gagi kota tekaduduia: Kedesi i Galilea, a mentorukuno Napatali ka i Sikemi, a mentorukuno Eparai, ka i Kiriati-Araba, onaemo Heberoni, i torukuno Yehuda. 8Ka i asatowano koro Yarade, i sabaano oleo Yeriko domempakosio Beseri, i pada one, i korimbino torukuno, inso a tongku Rube, ka Ramoti i Gileadi inso a tongku Gadi, ka Golani i Basani, inso a tongku Manase. 9Onaemo luwuno kota anu pinakosi tiado luwuno to Isaraeli, ka tiado luwuno mia mehawe anu mpo'ia i olodo, ka sompo mia anu mompepate nahi pe'inungakono, molai ngkoraane, kasi dompepateo pontutu tolosi rea, ba napi winawa ia nterisoa bawaa.

Currently Selected:

Yosua 20: XMZ

Highlight

Compare

Copy