Yunu 1
1
I Yunu molai inso a mpepoboi-Do i Ue
1:1-17
1 #
2Mok. 14:25
Haweomo pau-Do i Ue ndi Yunu anano i Amitai, kanandio, 2”Lakomo pontuturako i Niniwe, kota anu langkai atuu, pebooliakonomo pepopoto'ori ndi ondae, hangano wineweudo mosa'o haweomo ndi Ongkue.” 3Sine i Yunu molai lumako i Tarasisi, olai inso i aro-Do i Ue. Onae lumako i Yapo ka ihaweo i ra'ai asa kapala anu ta melungka lumako i Tarasisi. I'owahio sewano pelempaano, ka i'amba mewuatako a ngkapala atuu lumako i Tarasisi merongaako ira, olai inso i aro-Do i Ue.
4Sine Ondae i Ue mompotii umangi a ntahi, ka i'amba gagiomo opue langkai, ranta kapala atuu tedeimo koa ka iterawo. 5Mia mpo'angga a ngkapala atuu medoito, singge mia meboo-booli a mpinesombaino. Domentadio a laro ntahi luwuno inulano kapala atuu mpokomonongkoo. Kontongaano atuu, i Yunu metiiomo i larono kapala anu i totono ntu'u, mepombole i tu'ai ka tekoturi rodo. 6Haweomo petewawa a ngkapala atuu tepohaweakono ka ipotae, ”Kana'umpe omue mokompoturi rodo ntu'u? Pewangumo, peboolimo ndi Ondae Ue Alamu, bara'ura Ondae Ue Ala atuu Ira merio kita, kasi tomemasola.” 7Ka do'amba mpepau asa mia ka asa mia, ”Aiwamo tompotende undi, ka tomento'orio, hangano isema masolaa andio umalu kita.” Mpontende iramo undi ka undi atuu tedonta ndi Yunu.
8Dompotaeakono, ”Pauakami, hangano isema masolaa andio umalu kita. Hapa po'anggaamu ka isua insoamu? Hapa witamu ka inso a tongku isua omue?” 9Sangkino ndi ondae, ”Ongkue to Ibarani, kudoitoako Ira Ue, Ue Alano asa wawolangi anu mokogagio tahi molue ka wawo wita.” 10Luwuno mia atuu tedoa medoito ka dompotae ndi onae, ”Hapamo anu wineweumu?” Luwuno mia atuu mento'orio, nine onae molai, olai inso i aro-Do i Ue, hangano mongkona atuu ipauako iramo. 11Mpesikeno ira, ”Hapa anu asalakono kami meweweuo ndi omue, ka ipenaa-naa bombano tahi?” Hangano tahi tedoa langkai bombano. 12Isangki ira, ”Imentande akumo, impetadiakunemo a laro ntahi, manasa tahi ta menaa-naa ka nahi alukomiu mbo'u. Hangano kuto'orio, nine hangano koa ongkue ka i alukomiu opue langkai andio.” 13Luwuno mia atuu tendeano mpebose ira mewawao kapala atuu mepokule i wita, sine nahi domempolio, hangano tahi tedoa mebomba umalu ira. 14Ka do'amba mpebooli ndi Ondae i Ue, dompotae, ”Oo Ue si po'inee kami wainto memate hangano penaano mia andio. Si popotembia kami reano mia anu nahina salano, hangano Omiu Ue, moweweu Komiumo kana po'ehe-Miu.” 15Ka do'amba mentandeo i Yunu, ka mpetadiakono a laro ntahi. Umarino atuu tahi menaa-naaomo mebomba. 16Mia atuudo gagi tedoa ira medoito ndi Ondae i Ue, ka do'amba mpesombaako pesomba sinumbele ndi Ondae i Ue saru mpedandiako mpontanga.
17 #
Mat. 12:40
A pompakosi-Do i Ue haweomo asa bou langkai anu ta tumeleo i Yunu. I Yunu mo'ia a laro kompono bou atuu otolu oleo otolu wongi tehineno.
Currently Selected:
Yunu 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
