Obaja 1
1
Pompau anu ta gagi mongkona pohuku tiano Edomi
1-16
1 #
Yes. 34:5-17; 63:1-6; Yer. 49:7-22; Yeh. 25:12-14; 35:1-15; Amo. 1:11-12; Mal. 1:2-5 Pongkitano i Obaja.
Ndiomo pau-Do Ue Ala mongkona Edomi.
Kimerongeomo lele inso ndi Ondae i Ue,
ka asa mia tinena inoliwiomo i tongano luwuno tongku saru pe'oliwi,
”Impentademo, aiwa kato melako mpeteaakono Edomi.”
2”Menteeano, Aku weweuko kodei i olodo luwuno tongku,
omue kotedoa tinetewehi.
3Pompelangka-langkaino aroamu popandeikomo,
oo, omue anu mo'ia a luwuno aano watu,
a mpo'iangamu anu mantande;
omue anu motae i laro aroamu:
’Isemake anu polio motii aku i tolino?’
4Maupo upenee mantande kana singko,
tendeano maupo senomu ninaa i olodo luwuno anano wula,
inso i ra'ai mbo'u Aku motiiko,” kanandiomo pau-Do i Ue.
5Tewala temponomo wongi mia monako ke mia morontu hawe ndi omue,
maupo kana'umpe omue isolangiko, ipepateko
kombake ta monako montonda hadiono anu kinereno?
Tewala puu mpo'opu wua anggoro hawe ndi omue,
kombake ira mpobinta tore-toreano inopudo?
6Inuleno i Esau tedoa pinaresa,
arataano anu tewuni tedoa inungke!
7Hawe a tompa tida omue domensaariko
wali-walimu;
omue pinopo'oo, domenagiko sambe'emu.
Ondae anu mpe'asa mpongkaa saru omue mpota'oakomu oho.
Mongkona atuu nahi pokonto'orio.
8Kombake i tempo atuu, kanandiomo pau-Do i Ue,
Aku mokotampulao luwuno mia pande mosongka inso i Edomi,
ka monto'ori inso a mentorukuno Esau?
9Luwuno mbo'u puu mpeteamu, hei Temani, ira medoito,
ranta luwuno mia i mentorukuno Esau tampula pinepate.
10Hangano pobobarasaia a mpepaekompomu i Yako,
tataa ta lumimbuko,
ka omue kopinokotampula mpiha.
11I tempono upentade i olaiano,
kontongaado mia susua mentandeo pompolino Yerusale
ka mia mehawe mpewinsokio mpewowa langkaino
ka mpotendeakono undi,
omue mbo'u kana asa mia inso i olodo atuu.
12Si pe'uru-uruo pepaekompomu,
a oleo urasa'ono,
si po'undeako ira to Yehuda
a oleo mateado;
ka si hadio mpau
a oleo masukaraano.
13Si pewinso a mpewowa langkaido bawaa-Ku
a oleo urasa'odo,
ka si pemonongkoo masolaa anu umaluo
a oleo urasa'ono;
ka si rontuo pompolino
a oleo urasa'ono.
14Si pentade a sampanga
komokotampula ira mia anu mentola,
ka si peweengako ira miano anu mentola
a oleo masukaraa.
15Hangano oleo-Do i Ue rangkuomo umaluo luwuno tongku.
Kana anu wineweumu, kanandiomo ta wineweu ndi omue,
wineweumu ta mepokule umaluo ulumu omuemu.
16Menteeano, kana ime'inuomo tekuda-Ku iwawo torukuno-Ku anu mempori,
kanandio koa mbo'u luwuno tongku ira mpo'inu nahi dompenaa-naa;
tendeano ira mpompeguu inua,
ranta ka domegagi kana-kana nahi domekongko.
Tolaano bawaa-Do i Ue i Sioni
17-21
17Sine i torukuno Sioni ta hina mia anu tepotola;
torukuno atuu ta gagi po'ianga mempori,
ka inuleno i Yako ta mpe'ueo mbo'u witado.
18Inuleno i Yako ta gagi api
ka inuleno i Yusupu gagi langano api,
sekono inuleno i Esau megagi tu'ono gandu;
ira mentunuo ka mengkaano ka ipingko luwu,
ka nahina maupo te'asa mia anu tola inso i olodo inuleno i Esau, hangano Ondae i Ue mepau Iramo kanandio.
19Luwuno to Nege ira mpe'ueo mentorukuno Esau,
ka luwuno to Sepela ira mpe'ueo witado to Pelisiti.
Ira mpe'ueo wita Eparai ka wita Samaria,
ka suku Benami ira mpe'ueo wita Gileadi.
20Sorodadu Isaraeli inso a mia mentinadi
ira mpe'ueo witado to Kana'a hawe i Sarapati.
Luwuno to Yerusale anu mewinawa a laro pontadia anu kongko i Separadi,
ira mpe'ueo luwuno kota i Nege.
21Luwuno anu mpongkadudui ira mpewuatako a wawo Torukuno Sioni
ira mebitarao mentorukuno Esau;
ka poparentaa atuu ta gagi tia-Do i Ue.
Currently Selected:
Obaja 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
