Yoeli 3
3
Pohuku a luwuno iwalido to Isaraeli
3:1-8
1”Hangano menteeano a luwuno oleo atuu
ka a tempo atuu,
tempono Kupomuleo teweweuno
Yehuda ka Yerusale,
2Aku pumpu ira luwuno tongku
ka wawa ira mpetii a Lembono Yosapa;
Aku mekara-karaako ira i ra'ai
mongkona bawaa-Ku ka mia-Ku, Isaraeli,
hangano domensiarawo ira i olodo luwuno tongku
ka mpetia-tiao wita-Ku;
3hangano bawaa-Ku dompotendeakono undi,
mpeweengakono asa ana ntama hangano asa mia belesu,
ka me'asao asa ana beine hangano anggoro anu ta ininu.
4 #
Yes. 14:29-31; 23:1-18; Yer. 47:1-7; Yeh. 25:15–28:26; Amo. 1:6-10; Sep. 2:4-7; Sak. 9:1-7; Mat. 11:21-22; Luk. 10:13-14 Ka mbo'u, hapa penggoeamu saru Ongkue, hei Tirusi, Sidoni ka luwuno wita Pelisiti? Nde komiu mingki mensulooke wineweu-Ku? Tewala hinao wineweumiu ndi Ongkue, manasa magasi ka Aku koa ronga mosuleo wineweumiu atuu ndi omiu. 5Hangano omiu me'alao salaka ka wulaa-Ku ka mewawao arataa-Ku anu ntekokosi a luwuno pesombaamiu, 6saru me'asa ira to Yehuda ka to Yerusale a nto Yunani ka domempinoko'olai inso a wita-Do. 7Menteeano Aku lumelu ira inso a mpo'ianga ba isua ime'asa ira. Aku mosuleo wineweumiu atuu a wawo ulumiu. 8Aku umasa ira anamiu tama ka beine a nto Yehuda ka ondae ira me'asa ira anamiu atuu a nto Sieba, aasa tongku anu olai, hangano Dopauomo i Ue.”
Luwuno tongku inoluako mpetea
3:9-17
9Paleleomo mongkona andio i olodo tongku:
pepatindamo mpo'aropi peteaa,
patinda iramo puu mpetea;
asalakono luwuno sorodadu
me'umpeda ka melako!
10 #
Yes. 2:4; Mik. 4:3 Paluomo mata padekomu gagi ponai
ka luwuno piso pompolemu gagi kansai;
moikoomo mia anu nahi polio motae, ”Ongkue andio puu mpetea!”
11Irongamo me'aiwa,
hei luwuno tongku inso a luwuno siuno,
ka pepumpumo i ra'ai!
Ipotiiomo, oo Ue, luwuno sorodadu-Miu!
12Po'ineeomo luwuno tongku mpelelu ka melako
a Lembono Yosapa,
hangano i ra'ai Aku mentoro bitara ira
luwuno tongku inso a luwuno siuno.
13 #
Meng. 14:15, 19-20; 19:15 Ioomo ponsewo,
hangano sowia motahaomo;
aiwamo, sesaomo,
hangano ponsesaa anggoro bukeomo;
luwuno pohowua anggoro nami te'ula,
hangano hadioomo wineweudo mosa'o.
14Hadio mia, hadioomo mia
i lembono potantuia!
Oo, rangkuomo oleo-Do i Ue
i lembono potantuia!
15Mata oleo ka wula gagi wongi-wongi,
ka luwuno anano wula menaao wantado.
16 #
Amo. 1:2
Ondae i Ue mengaoli inso i Sioni,
inso i Yerusale Dopoporongeo pepau-Do,
langi ka tolino leelu.
Sine Ondae i Ue onaemo pepekaduduiado bawaa-Do,
bentedo to Isaraeli.
17”Ka komiumo mento'orio nine Ongkuemo Ue Alamiu,
anu mo'ia i Sioni, torukuno-Ku anu mempori.
Yerusale ta gagi mempori,
ka luwuno mia hawe nahi ira ntelaloio mbo'u.
Ronso tiano bawaa-Do i Ue
3:18-21
18Ia tempo atuu luwuno torukuno ta mompo'iti anggoro wo'ohu,
luwuno pongku wita mompowaa susu,
ka luwuno korono mo'are i Yehuda
ta mompowaa uwoi;
mata uwoi ta me'umbaako inso a raha-Do i Ue
ka bahoo lembono Sitimi.
19Masiri ta gagi boni-boni,
ka Edomi ta gagi pada one boni-boni,
hangano pompokonsii a nto Yahudi,
hangano mpo'uwu iramo reano mia anu nahina salano i witano.
20Sine Yehuda pino'iangi mpiha ranta nahina tampulaano
ka Yerusale a luwuno inule.
21Aku mombaloakono reado anu napi Kupombaloakono;
Ondae i Ue mo'ia i Sioni.”
Currently Selected:
Yoeli 3: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
