Yoeli 2

1Puuriomo tawuwua i Sioni

ka pebooliakono pepopoto'ori i torukuno-Ku anu mempori!

Po'ineeomo dompondidi-ndidi luwuno palili wita,

hangano oleo-Do i Ue hawe,

mentee ntu'u, oleo atuu rangkuomo;

2oleo wongi mpusu ka worikidi,

oleo menseru ka megawu nseru.

Kana towea mepansari a wawo luwuno torukuno

haweomo asa tongku anu langkai ka moroso;

anu kanatuu nahi hori hina

mompu'u i ndi'ipua,

ka umarino atuu nahi ta hina mbo'u

a luwuno inule, a tempo anu ta hawe.

3I arono piingko ikaano api,

i bungkuno langano api langkai.

Wita i arono kana Bonde Paradesi,

sine i bungkuno pada one londa,

ka nahina anu tola inso ndi onae.

4 # Meng. 9:7-9 Rupado kana ngara,

ka kana ngara mompalari dompelulu.

5Kana rerendeno kareta,

dompelonso-lonso a wawo luwuno punsudo torukuno;

kana ponggelo-nggelono langano api

anu kumaano piingko seami;

kana aasa tongku anu moroso,

baresino tetinda ta metea.

6I arono luwuno tongku mpondidi-ndidi,

luwuno rupa gagi tedoa momite.

7Kana peluludo puu mpetea,

kana sorodadu dompewuatako a rere watu;

singge mia melempa a mpesalaano,

nahi pansia inso a nsalano;

8ondae nahi dompedodanda,

singge mia melempa mpiha a nsalano;

ondae mperumpai a mpekorahakoado anu mpekansai,

baresido nahi te'otuhi.

9Ondae mponsapoi a laro ngkota,

mpelulu a rere watu,

mpomaru a laro luwuno raha,

mpewinso telalo a mpentangoa kana mia monako.

10 # Meng. 8:12 I arono tolino mondende,

langi melelu;

mata'oleo ka wula gagi wongi-wongi,

ka luwuno anano wula monaa wantano.

11 # Meng. 6:17 Ondae i Ue moporongeo pau-Do

i arono sorodadu-Do.

Mentee ntu'u, tedoa hadio sorodadu-Do,

moroso ntu'u anu meleluakono pau-Do.

Tedoa ntu'u mongkokongiri oleo-Do i Ue atuu.

Isema anu moko'ontoo?

Po'oluako ka dontepidi

2:12-17

12”Sine kanandio-andio,” kanandiomo pau-Do i Ue,

”pepokulemo ndi Ongkue tompaano aroamu,

saru mepuasa, mengese ka monsabangi.”

13Baliomo aroamu ka osi'i sangkamu,

pepokulemo ndi Ondae i Ue, Ue Alamu,

hangano Ondae me'aroa ka mompehohawa,

tedoa Ira sabara ka hadio ntu'u pompehohawa.

Me'o'ole Ira mingki mompotii masolaa.

14Ba mansa Ira wali me'o'ole,

ka Dobintao ronso,

gagi pesomba kaanga ka pesomba tinawa

ndi Ondae i Ue, Ue Alamu.

15Puuriomo tawuwua i Sioni,

pesusuaomo oleo puasa,

paleleomo tepumpua langkai.

16Pumpu iramo tongku andio,

pokomempori iramo bawaa,

pumpu iramo mia memota'u,

pumpu iramo nana'ote,

maupo nana'ote anu mo'uo.

Moikoomo umbu ngkoroi tama ipeluarako inso a bolongkono,

ka umbu ngkoroi beine inso a bolongko poturiano.

17Moikoomo luwuno sando mpesomba, puu pompekakaako-Do i Ue,

mengese i olono arono bansala ka meda mpontunua pesomba,

ka impotae, ”Oo Ue Ipehohawa iramo bawaa-Miu,

ka siimo Ipo'inee ira mia-Miu gagi tataa,

ranta luwuno tongku pasinggiri ira.

Tembio ka ipinau i olodo luwuno tongku:

Isua Ira Ue Alado?”

Dandi-Do i Ue a tongku anu mentepidi

2:18-27

18Aroa-Do i Ue mawongkoakono wita-Do,

ka Dopehohawa ira bawaa-Do.

19Ondae i Ue sumangki ira bawaa-Do, Dopotae,

”Menteeano, Aku mo'oliwiakomiu

gandu, anggoro ka lana,

ka komiu memowohiakono;

Nahi Aku mo'inee komiu mbo'u

gagi tataa i olodo luwuno tongku.

20Ponsapoi inso i utara Aku moko'olaio inso ndi omiu,

ka Aku sumaario a wita anu mokari ka londa,

baresi i arono a ntahi i sabaano oleo,

ka baresi i bungkuno a ntahi i sumooano oleo.

Mana moboo ka mana oruno ta mewuatako,

hangano mongkokongiri ntu'u anu wineweuno.

21Si doito, hei wita,

peboo-boolimo ka po'undemo,

hangano mongkokongiri ntu'u anu wineweu-Do i Ue!

22Si medoito, hei luwuno kondehora i tongampada,

hangano wita pompakambia i pada one mololowulu,

keu mewua,

keu ara ka keu anggoro mompowee pompolino.

23Hei inuleno i Sioni, peboo-boolimo

ka po'undemo hangano Ondae i Ue, Ue Alamu!

Hangano Dopoweakomiumo

usa a pompu'uano tempo

ka Dopotiiakomiu usa,

usa a pokotompaano tempo kana se'eluno.

24Luwuno ponsesaa ta bukeako gandu,

ka po'ianga pomporo'ia hadio ntu'u anggoro ka lana.

25Aku momuleakomiu luwuno ta'u

anu hasilino piingko ikaano kosume mpelimba, kosume mpelonso,

kosume modoko mongkaa ka kosume mongkarasi,

sorodadu-Ku anu hadio Kutena ira i tonga-tongamiu.

26Komiu mpepotende mpongkaa ka memowohi,

ka komiu me'unde-undeo nee-Do i Ue, Ue Alamiu,

anu weweuo wineweu kinohali-haliako ndi omiu.

Bawaa-Ku nahi ira memongkoko'ii mbo'u ranta nahina tampulaano.

27Komiu koa mento'orio nine Ongkue kongko i olodo to Isaraeli,

ka nine Ongkuemo Ue, Ue Alamiu; nahina anu susua.

Bawaa-Ku nahi ira memongkoko'ii mbo'u ranta nahina tampulaano.”

Oleo-Do i Ue

2:28-32

28 # Tin. 2:17-21 ”Ta gagi lembuino,

nine Aku umuwuo Penaa-Ku a wawo luwuno mia,

luwuno anamiu tama ka beine ira mpopau anu ta gagi;

luwuno miamiu anu mota'u ira memo'ipi,

luwuno mangalitaumiu ira mpohawe hadio pongkita.

29A wawo luwuno mbo'u atamiu tama ka beine

Aku motiio Penaa-Ku a luwuno oleo atuu.

30Aku weweuo luwuno kinohali-haliako i langi ka i tolino: rea ka api ka hadio pebotono ahu. 31#Mat. 24:29; Mrk. 13:24-25; Luk. 21:25; Meng. 6:12-13Mata oleo ta baali gagi wongi mpusu ka wula gagi rea se'eluno napi hawe oleo-Do i Ue anu mongkokongiri. 32#Rom. 10:13Isemamo koa anu mebooli a nee-Do i Ue ta kinadudui, hangano i Torukuno Sioni ka i Yerusale ta hina tekaduduia; kana anu Dopauomo i Ue, sompo mia anu pinoboi-Do i Ue ta tewinso a luwuno mia anu tepotola.”

Currently Selected:

Yoeli 2: XMZ

Highlight

Compare

Copy