Yoeli 1
1
Puu mpau
1:1
1Pau-Do i Ue anu hawe ndi Yoeli anano i Petueli.
Pesapoido bawaano kosume gagi pohuku-Do i Ue
1:2–2:11
2Rongeomo andio, oo luwuno mia memota'u,
imenta'oomo birimiu, oo luwuno palili!
Horioke gagi kanandio i tempomiu,
ke i tempodo uempu'umiu?
3Imentutuluomo mongkona atuu a luwuno anamiu,
ka po'inee iramo anamiu mentutuluako ira anado,
ka luwuno anado a inule lembuino.
4Hapa anu binintano kosume mongkaa ntededei, ikaano kosume melakopi,
hapa anu binintano kosume mpelimba, ikaano kosume mpelonso,
ka hapa anu binintano kosume mpelonso, ikaano kosume modoko mongkaa.
5Hei anu wela molangu pewangumo, ka pengesemo!
Ponsabangimo, hei luwuno anu marampo'inu anggoro hangano anggoro wo'ohu,
hangano anggoro atuu rinontuomo inso a ngangamu!
6 #
Meng. 9:8
Hangano asa tongku lumako sumapoio witaku,
tongku anu moroso ka nahi pinokopau porokono;
ngisino kana ngisino singa,
ka tinduno kana tinduno singa waino.
7Iweweuo keu anggoroku roopu,
ka keu araku pudu-pudu;
kulino piingko ikulisio ka i'amba metadiakono,
ranta luwuno sampano gagi mopute.
8Ponsabangimo kana ana beine anu mesangkaako sawu po'inombo
hangano umbu ngkoroi, pinehohawano tempono imongura.
9Pesomba kaanga ka pesomba tinawa tampulaomo
inso a raha-Do i Ue;
ka pompemasusa iramo sando mpesomba,
puu pompekakaako-Do i Ue.
10Lere ropuomo,
wita mompokomasusa,
hangano gandu ropuomo,
anggoro mokariomo,
lana tedeimo koa.
11Imemokoko'iimo, hei luwuno puu mpelere,
imponsabangimo, hei luwuno puu mpo'angga lere anggoro ponsabangi
hangano gandu ka jelai,
hangano ropuomo sowia a lere.
12Keu anggoro mokariomo
ka keu ara moleuomo;
keu delima, keu kuruma ka keu apeli,
luwuno keu i tonga mpada mokariomo.
Mentee ntu'u, makuraomo mawongko
inso a luwuno anano mia.
13Pokonaomo sawu po'inombo ka ponsabangimo, hei luwuno sando mpesomba;
imperaalikimo, hei luwuno puu pompekakaako meda pontunua pesomba;
impewinsomo, imperatomo saru mompokona sawu po'inombo,
hei luwuno puu pompekakaako-Do Ue Alaku,
hangano pesomba kaanga ka pesomba tinawa,
pinenaa-naaakoomo inso a raha-Do Ue Alamu.
14Pesusuaomo oleo puasa,
paleleomo tepumpua langkai;
pumpu iramo mia memota'u
ka luwuno palili wita
a raha-Do i Ue, Ue Alamu,
ka impeboolimo ndi Ondae i Ue.
15 #
Yes. 13:6
Hei, oleo atuu!
Mentee ntu'u oleo-Do i Ue rangkuomo,
haweno gagi pabawa poropua inso ndi Ondae Anu Tedoa Pabawa.
16Kombake i arono matato
pingkoomo kaanga,
mawongkoa ka po'unde-unde
inso a raha-Do Ue Alato?
17Wuku mpinopaho gagi mokari a batuno wita,
luwuno goda moaomo ntu'u,
ka luwuno si'e terongkaomo,
hangano gandu pingkoomo.
18Luwuno pinotuwu mpe'anaiki ira ntu'u
ka luwuno bawaano sapi mbo'u pompemasusa,
hangano nami hina mbo'u ewo a mpada tiado;
asa bawaa mbo'u bembe bimba tetonda marasai.
19Ndi Omiu, oo Ue, aku mebooli,
hangano pingkoomo ikaano api
wita pompakambia i pada one,
ka langano api mokomo'aio
luwuno keu a ntonga mpada.
20Luwuno mbo'u kondehora mo'ila ntekewoi ndi Omiu,
hangano korono wela mo'are, mo'areomo,
ka wita pompakambia mbo'u i pada one pingkoomo ikaano api.
Currently Selected:
Yoeli 1: XMZ
Highlight
Share
Compare
Copy
Want to have your highlights saved across all your devices? Sign up or sign in
LAI 2021
