Ayubi 9
9
I Ayubi mokonto'orio nine onae nahi poko'ewai Ira Ue Ala
9:1-35
1Sine sumangki i Ayubi,
2”Mentee ntu'u, kuto'orio, nine kanandiomo teweweuno,
sine kana'umpe mia ka imentee i aro-Do Ue Ala?
3Tewala onae ineheno mekara-karaako Ira Ue Ala,
asa inso asa nsowu mpali onae nahi pokosangki Ira.
4Ondae Ue Ala atuu tedoa monto'ori ka tedoa moroso,
isemake anu mokompeteahako umewai Ira, ka kongko tekadudui?
5Ondaemo anu lumimba ira torukuno nahi domento'orio mia,
anu wowangunsuleo a laro ntekuda-Do;
6anu paheo tolino inso a mpo'iangano,
ranta karuno melelu-lelu;
7anu parentao mata oleo ka nahi saba,
ka tumutuwiakono pontondoni anano wula;
8anu asa-asa-Do wileo langi,
ka melempa a wawo bomba-bombano tahi;
9 #
Ayb. 38:31; Amo. 5:8 anu mokogagio anano wula Bidu, anano wula Belanti,
anano wula Karatika, ka luwuno pehowuno anano wula Rua Selata;
10anu weweuo luwuno wineweu langkai anu nahi kinookoo,
ka luwuno anu kinohali-haliako anu nahi pinokopau hadiono.
11Tewala Dolalo aku, nahi kukita Ira,
Ondae telalo, nahi kuto'ori Ira.
12Tewala Ondae morontu, isema ta umonsoi Ira?
Isema ta kumuahako Ira: Hapa wineweu-Miu?
13Ondae Ue Ala nahi Doponaa-naa tekuda-Do,
i totono pabawa-Do luwuno anu mpokowalio i Rahabi mpe'odo.
14Tamoako mbo'u ongkue, kana'umpe aku moko'ewai Ira,
mobiniki pepauku ndi Ondae?
15Maupo ongkue mentee, komba aku umewai Ira,
tendeano ongkue asalakono mo'ema pompehohawa ndi Ondae anu tumuntu aku.
16Tewala mebooli aku, Dosangki aku;
nahi kupokompe'ala-alao nine Ira behe rumongeo pepauku.
17Ondaemo anu rumawo-rawo aku a laro angi mokora,
anu mokohadioo mobelaku montonda po'ehe-Do,
18anu nahi po'inee aku menaa,
sine mokomowohiakune mopa'ia.
19Tewala mongkona roso,
Ondaemo anu lalu moroso!
Tewala mongkona moleoa,
isema moko'ewai Ira?
20Maupo mentee aku, ngangaku ongkueku
ta pauo ongkue nahi mentee;
maupo nahina salaku, Ira koa pauo ongkue sala.
21Nahina salaku! Nahi kuperioo koroiku,
kute'osaakono tuwuku!
22Luwuno mengkena koa, onaemo pu'uno ka kupotae:
anu mentee ka anu sala, oruano Dopokotampulao.
23Tewala mepobingko ponsepi mompepate,
Ondae pasinggirio nahina pompe'osaiano mia anu nahina salano.
24Tolino pineweengakoomo a ngkaedo mia mosa'o gaudo,
ka matado puu mpobitarano Dotutuwiomo;
tewala komba Ondae, isema mbo'u?
25Oleo ntumuwuku telalo magasiopo sekono asa mia puu mpelulu,
moliu nahi pongkita me'uraa,
26mepowulu telalo kana bangka gelaga,
kana rajawali anu montiu kaangano.
27Tewala kupewowoloo: Aku mingki kumolupeo pompemasusaku,
balio uwoi mataku, ka mawongko,
28onaemo ka kudoitoakono luwuno masusaku;
kuto'orio nine nahi Komiu motae nahina salaku.
29Pinauomo ongkue sala,
tembio ka kupokomasusao koroiku nahina tuduno?
30Maupo kuwo'ohiakono seru baku koroiku
ka kuwo'ohiakono sabo kaeku,
31Komiu motondu aku a laro rege,
ranta maupo sangkaku imokoburuakune.
32Hangano Ondae komba mia kana ongkue,
onaemo ka nahi kupokosangki Ira:
Aiwa toperonga-ronga lumako a mpebitaraa.
33Nahina po'oloti i olomami,
anu mokonaao kaeno a wawo mami orua kami!
34Po'ineeomo Doliahakono tarasulu-Do inso ndi ongkue,
kasi alu aku mondende i aro-Do.
35Ka nami kudoito mepau ndi Ondae,
hangano nahi kupokonto'orio salaku.”
Currently Selected:
Ayubi 9: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
