Ayubi 10
10
Hapake tinoo-Do Ue Ala mongkona marasaia?
10:1-22
1”Kute'osaakono tuwuku,
ineheku motolao masusaku,
ineheku mepau a laro marasaino laroku.
2Aku mepau ndi Ondae Ue Ala:
Siimo Ipokonsala aku,
sine Ipauakune tembio ka Ipekara-karaakune.
3Hapa ura-Miu moweweu pompokonsiia,
tumadio hasilino wineweuno kae-Miu,
ka mokorosoo tinoono mia mosa'o gauno?
4Nde hinaoke mata mia-Miu?
Nde kana pongkitano miake pongkita-Miu?
5Nde kana oleono miake luwuno oleo-Miu,
luwuno ta'u-Miu kana luwuno oleodo tama
6onaemo ka Ipo'ungke-ungkeakune salaku,
ka paresao halaku,
7kahinaano Ito'orio nine nahina salaku,
ka nahina maupo te'asa mia mokompotola aku inso a ngkae-Miu?
8Kae-Miumo anu mokogagio ka weweu aku,
sine lembuino mewolili Komiu ka mingki mepate aku?
9Ipewowoloomo nine Omiu anu weweu aku inso a wita pulu,
nde Komiu wali mokogagi aku pampawu?
10Komba Omiuke anu tumawa aku kana susu,
ka mokobaku aku kana keju?
11Omiu mokonaakune kuli ka ihi,
saru mosombuakune wuku ka ia.
12Tuwu ka petenunu mompehohawa Iweeakune,
ka pompekaria-Miu dumagaio penaaku.
13Sine ndiomo anu winuni-Miu i laro aroa-Miu;
kuto'orio nine onaemo andio tinoo-Miu:
14Tewala moweweu aku hala, Komiu dumagai aku,
ka nahi Komiu motola aku inso a nsalaku.
15Tewala ongkue sala, masola akumo!
Ka tewala ongkue mentee, nahi aku sapa tumandeo uluku,
ongkue bukeako pontetewehi ka mowohiako marasaiku.
16Tewala ongkue mompelangka-langkai,
Komiu lumulu aku kana singa,
ka wali mopokitao ndi ongkue pabawa-Miu anu tinengiriako.
17Komiu wawa ira sakosii susua ndi ongkue,
mokolangkaio tekuda-Miu ndi ongkue,
ka wawa ira sorodadu susua umewai aku.
18Tembio ka Ipo'inee aku meluarako inso a mpe'anakaa?
Laluopo kumate se'eluno napi domengkita aku mia!
19Gagi, kana nahi kuhori hina;
inso a mpe'anakaado i ine ongkue tetutu winawa a ngkaburu.
20Kombake oleo ntumuwuku butu tedei?
Po'inee akumo asa-asaku, ka kupokomawongko sarai,
21se'eluno napi kulako ka nahi kupekule mbo'u,
a wita anu wongi-wongi ka worikidi,
22a wita anu wongimpusu
kana worikidia, ka anu nahi te'atora,
isua wantano mewine mengkena saru wongi-wongia.”
Currently Selected:
Ayubi 10: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
