Ayubi 8
8
I Bilidadi kumorahakono moleo-Do Ue Ala
8:1-22
1Mepauomo i Bilidadi, to Suahi,
2”Hawe te'ipia mbo'u komepau kanatuu,
ka pinauno ngangamu kana angi anu umu'uru?
3Menteeke Ondae Ue Ala melengkuakono moleoa?
Menteeke Anu Tedoa Pabawa melengkuakono menteea?
4Tewala anamu mpoweweu iramo hala ndi Ondae,
asalakono Dopo'inee iramo ipabawai ira salado.
5Sine omue, tewala omue umungke Ira Ue Ala,
ka mo'ema pompehohawa inso ndi Ondae Anu Tedoa Pabawa,
6tewala moleoko ka mepau mentee,
manasa Ira mentade hangano omue
ka Ira wali mokomoikoo raha anu lano tiamu.
7Teweweumu i ndi'ipua ta tengkita kodei,
sine teweweumu lembuino ta gagi tedoa maramba.
8Kanandio-andio pesikenoakonomo mongkona luwuno mia nse'elu,
ka pekokoongakonomo hapa anu pinepenteedo uempu'udo.
9Hangano ontae, nana'ote indiawi, nahina tino'orito hapa-hapa;
hangano oleo ntumuwuto i tolino kana eo-eo.
10Komba ondaeke anu asalakono mempaguruko ka mepau ndi omue,
saru mpoluarako pau inso a mpinewowolodo anu molino?
11Mokotuwu koa ondauke tole tewala nahi a epe,
ke gelaga tuwu mewalo tewala komba a uwoi?
12Da kontuwuano, napi tempono sinewo,
onae moleu se'elu sekonopo ewo susua.
13Kanatuumo sala ntumuwu luwuno mia anu kumolupe Ira Ue Ala;
tampulaomo pomperorohiano mia anu mosa'o gauno,
14anu pinerorohino kana banano kaangga,
pompe'ala-alano kana inenano kaangga.
15Onae mehonda a rahano, sine rahano atuu nahi pentade moleo mpiha,
onae me'ini ndi onae, sine raha atuu nahi moroso.
16Onae kana pinopaho anu da molowulu a mokulano mata oleo,
harono melele a luwuno bonde.
17Luwuno hakano wewesio howuno watu,
mepinsolako a laro olo-olono watu atuu.
18Sine tewala onae binuta inso a mpo'iangano,
po'iangano atuu nami akuio mbo'u, ipotae: Napi kuhori kumitako!
19Menteeano, butu onae atuu ineheno tuwuno,
ka pinopaho susua mpe'umbaako inso a wita.
20To'oriomo, Ondae Ue Ala tumarima ira mia moleo,
ka nahi pokorosoo kaeno mia anu moweweu mosa'o.
21Da Ira koa weweuko mengingisi
ka wiwimu mebooli mawongko.
22Mia anu umo'aliaakomu ta mesoumbu mokoko'ii,
ka kemado mia mosa'u gaudo nahi ta hina mbo'u.”
Currently Selected:
Ayubi 8: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
