Ayubi 7
7
Tuwu atuu mobea
7:1-21
1”Kombake mia asalakono memate-mateako i tolino,
ka luwuno oleono kana oleono mia tinambo?
2Kana asa ata anu mongkekewoi pe'engoa,
ke mia tinambo anu monsisikori tambono,
3kanandiomo kuwineeako luwuno wula anu nahina tuduno,
ka kutinantuiako luwuno wongi masusaa.
4Tewala lumako aku moturi, kupewowoloo: Te'ipiake kupewangu?
Sine wongi tehina ntu'u, ka ongkue ipabawai aku salalaro hawe umpeda meene.
5Wingo ka awu tumutuwio koroiku,
kuliku gagi motea, ka i'amba tepeha.
6Oleo ntumuwuku magasiopo itelalo sekonopo pongkalulua bana hinoru,
ka metompaako nahina pompe'osaia.
7Impewowoloomo, nine tuwuku butu pepuurino penaa;
mataku nahi ta mongkita mbo'u anu moiko.
8Mia anu kumita aku nahi ta kumita aku mbo'u,
tempono I'ungke aku, nahi kukongko mbo'u.
9Kana'umpe moliuno seru ka menae-nae tetadi,
kanatuu koa mbo'u mia anu metii a mpo'iangado mia mate nahi ta wali me'umbaako.
10Onae nahi pekule mbo'u i rahano,
ka onae, nahi to'orio mbo'u po'iangano.
11Onaemo pu'uno ongkue mbo'u nahi aku mo'ineeo ngangaku,
aku mepau a laro ma'isono sumangaku,
me'anaiki a laro masusano aroaku.
12Nde tahike ongkue andio ke naga,
ranta ka Iponaakune puu mpodagai?
13Tewala kupewowoloo: Poturiaku ta moweeakune pontarero,
ka pepomboleaku ta mokomonongkoo pompemasusaku,
14onaemo ka Ipodengkeakune ipiku
ka modengkeakune linolaro.
15Ongkue mbo'u inehekupo tinolonggeo
ka mate sekonopo tumembio masusaku.
16Te'osa aku, nahi kubehe tuwu ranta nahina tampulaano.
Po'inee akumo asa-asaku, hangano oleo ntumuwuku butu kana pepuurino penaa.
17 #
Pud. 8:5; 144:3 Nde hapake mia, ranta onae Ipelangkai
ka Iperioo,
18ka Itepohaweakono sompo mo'oru
ka I'arahakono sompo tempo?
19Hawe te'ipia mbo'u tempono Omiu nahi limbao pengkita-Miu inso ndi ongkue,
ka nahi po'inee aku asa-asaku ka kutengko'ala montele onuiku?
20Tewala moweweu aku hala, hapake anu kuweweuomo ndi Omiu,
Puu mpodagai mia?
Tembio ka Ipokogagi aku tiiano kae-Miu,
ranta ka kugagi tembiano koroiku?
21Tembio nahi I'ampunio halaku,
ka nahi pahihiakune salaku?
Hangano, kanandio-andio tepombole aku a laro pampawu,
ka I'amba umungke aku, sine nahi kukongko mbo'u.”
Currently Selected:
Ayubi 7: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
