Ayubi 6
6
I Ayubi me'o'ole a nsambe'eno
6:1-30
1Ka i'amba sumangki i Ayubi,
2”Ha, bakanaano itinimba makatialino aroaku,
ka urasa'oku ninaa meronga a wawo pontimbaa!
3Mobeano manasa ta lumaloio one a ntahi;
onaemo pu'uno madaraomo pauku.
4Hangano, ana mpana inso ndi Ondae Anu Tedoa Pabawa tepaho a ngkoroiku,
ka rasuno i'osoo sumangaku;
langkaino pabawa-Do Ue Ala tinena umewai aku.
5Mekiilike kalide mo'ila umpeda ewo mongura?
Me'ongelike sapi umpeda kaangano?
6Ta kinaake kaanga motewe anu nahi pe'ohia
ke hinao naminoke a moputeno su'ului manu?
7Nahi kubehe umanggao,
luwuno atuu kaanga anu mokonte'u'ue aku.
8Ha, po'ineeomo ka ite'ihii po'emaku
ka Doweeakune Ue Ala hapa pine'osaiku!
9Po'ineeomo ka Dopemoikoo Ue Ala pirego aku,
po'ineeomo Dopotiio kae-Do ka mepate aku.
10Onaemo anu da gagi tareroku,
tendeano aku melonso mo'unde
i tempono pompemahakiku anu nahina pompehohawano,
hangano nahi kuhori humapuo pau-Do Anu Tedoa Mempori.
11Hapake rosoku, ranta kupolio mompetea,
hapake tuwuaku lembuiano, asalakono ranta ka kusabara?
12Hapake rosoku kana rosono watu?
Hapake koroiku inso a mala?
13Kombake nami hina mbo'u pontulungi ndi ongkue,
ka tekaduduia olai inso ndi ongkue?
14Isema umontoo pompehohawa a mpe'asa miano,
nahi doitoako Ira Anu Tedoa Pabawa.
15Luwuno pepaekompoku nahi domempine'ala-ala kana korono mo'are,
kana empehino korono mo'are anu waa moliu;
16uwoino mowewu hangano baku,
i larono tewuni seru baku,
17anu tempae i tempono motu'i-tu'i,
ka mokari a mpo'iangano tempono i'aluo mokula;
18melengku-lengkuako pelempano solono,
waa a mpada londa, ka i'amba moliu.
19Bawaano mia mpebalu-balu inso i Tema mpo'ungke uwoi
ka pebawaa inso i Sieba mperorohiakono,
20sine mokoko'iido hangano pompe'ala-alado atuu,
sahawedo i ra'ai mpe'o'ole ira.
21Kanandio-andio kanatuumo omiu ndi ongkue,
mansano imengkitao anu mongkokongiri, medoitokomiu.
22Hori akuke mepau, ’Impoweeakune hapa-hapa,
ke impoweeakune doi anu nahi pototono inso a arataamiu,
23ke impotola aku inso a ngkaedo iwali,
ke imentolosi akumo inso a ngkaeno mia lambaha?’
24Paguru akumo, asalakono aku menoro-noro;
ka tisoakune mongkona hapa kutesaa.
25Tedoa mompokomahaki luwuno pau anu moleo!
Sine hapake tinoono pontata inso ndi omiu atuu?
26Hapake tinoomiu mentatao pinauku?
Hapake pinauno mia anu nami hina pompe'osaiano butu kana angi telalo?
27Maupo a nana'ote nahina amano mpotende komiu undi,
ka sambe'emiu imeweweuo kana balu-balu.
28Kanandio-andio, impewolilimo ndi ongkue;
nahi aku megaupi i aromiu.
29Impepokulemo, siimo ihina gagi poweweu molengku,
impepokulemo, manasa ongkue mentee.
30Hinaoke molengku a eloku?
Nde langirano ngangaku nahi polioke mosisinggeo masolaa?”
Currently Selected:
Ayubi 6: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
